សារដ៏មានតម្លៃដែលសហគ្រិនក្មេងៗគួរដឹង!
អ្វីដែលសហគ្រិនក្មេងៗភាគច្រើនមិនដឹងនោះគឺថា ពួកគេមិនត្រូវរង់ចាំអូសបន្លាយពេលវេលាដើម្បីធ្វើជាអ្នកជំនួញនោះឡើយ។ រឿងពិតស្ថិតនៅត្រង់ថា អ្នកមិនគួររង់ចាំឲ្យមានអ្វីៗគ្រប់បែបយ៉ាងកើតមានឡើងក្នុងពេលដំណាលគ្នានោះទេ។
នៅពេលអ្នកឈានដល់ពេញវ័យ ជាពិសេសនៅពេលកំពុងរៀនមហាវិទ្យាល័យ គឺជាវ័យមួយល្អបំផុតនៅក្នុងឆាកជីវិតរបស់អ្នកដើម្បីចាប់ផ្តើមចេញរកស៊ី។ ហេតុអ្វី? អំឡុងពេលនេះអ្នកអាចកសាងភាពអស្ចារ្យសម្រាប់ខ្លួនឯងដូចជា ការសិក្សា ពង្រឹងអាជីពការងារ និងរៀនសូត្រឡើងវិញពីកំហុសរបស់អ្នកនៅពេលអ្នកបរាជ័យ។ នៅក្នុងវ័យនេះ ទោះបីជាបង្កើតកំហុសរាប់មិនអស់ ក៏អ្នកនៅមានឱកាសច្រើនដើម្បីកែប្រែកំហុសទាំងនោះសម្រាប់យកធ្វើជាបទពិសោធន៍របស់អ្នក។
នៅពេលអ្នករៀនចប់ថ្នាក់មហាវិទ្យាល័យ អ្វីៗវាអាចប្រែប្រួលមិនដូចការគិតរបស់អ្នកឡើយ។ អ្នកនឹងជួបរឿងលំបាកថ្មីៗ ដូចជា ការស្វែងរកអាជីពការងារ រកចំណូលឲ្យបានច្រើន កសាងគ្រួសារ និងរៀបចំគោលដៅជីវិត ហើយអ្នកនឹងមានអារម្មណ៍ថា អ្នកកាន់តែមានសម្ពាធដែលពេលខ្លះធ្វើឲ្យអ្នកគិតថា វាពិបាកនឹងទៅរួច។
នេះហើយជាមូលហេតុសំខាន់ដែលអ្នកគួរសួរខ្លួនឯងថា ហេតុអ្វីបានជាអ្នកមិនចាប់ផ្ដើមជំនួញនៅពេលនេះ? ហេតុអ្វីបានជាអ្នកមិនយកចិត្តទុកដាក់ឲ្យខ្លាំងក្នុងការស្រវាចាប់យកបទពិសោធន៍ក្នុងជំនួញ ការងារ និងអាជីពរបស់អ្នកសម្រាប់ពេលអនាគត? តើឱកាសនេះអ្នកមានប៉ុន្មានដងក្នុងមួយជីវិតរបស់អ្នក? ហេតុអ្វីបានជាអ្នកនៅរង់ចាំអ្វីៗគ្រប់យ៉ាងមាននៅក្នុងដៃទើបចាប់ផ្តើម?
និស្សិតដែលមានក្តីស្រមៃចង់ធ្វើជាសហគ្រិនមានក៏មិនតិចដែរ ប៉ុន្តែអ្នកដែលអាចសម្រេចក្តីសុបិន្តនេះ មានមិនច្រើននោះទេ។ ហេតុអ្វី? ពីព្រោះពួកគេមិនហ៊ានប្រថុយ អារម្មណ៍ភ័យខ្លាច គ្មានគំនិត ខ្វះយុទ្ធសាស្ត្រ មិនបង្កើតបទពិសោធន៍ និងខ្វះភាពជឿជាក់។ ពួកគេចំណាយពេលច្រើនស្ទើរតែពាក់កណ្តាលជីវិតរបស់ពួកគេនៅសាលារៀន ដំណើរកម្សាន្ត និងកម្មវិធីសប្បាយៗដែលគ្មានគោលការណ៍ច្រើនពេករហូតដល់ភ្លេចប្រឡូកខ្លួននៅក្នុងជីវិតជាក់ស្ដែង និងនៅក្នុងពិភពជំនួញ។
ពួកគេវក់វីនឹងទ្រឹស្ដីមេរៀន និងជីវិតកំប៉ិកកំប៉ុកប្រចាំថ្ងៃរាប់មិនអស់ ប៉ុន្តែបែរជាមិនបានរៀនសូត្រឲ្យបានច្រើននូវខ្លឹមសារមេរៀនដ៏មានតម្លៃជាច្រើននៅក្រៅសាលា។ នេះមានន័យថា បើអ្នកចង់ក្លាយជាអ្នកជំនួញម្នាក់នៅ ពេលអនាគត អ្នកមានរឿងជាច្រើនដែលអ្នកត្រូវធ្វើច្រើនណាស់ដែលលើសពីអ្វីដែលអ្នកគិត។
សហគ្រិនភាពជាដំណើរផ្លូវមួយដែលទាមទារឲ្យអ្នករៀនចេះគ្រប់គ្រងពេលវេលាឲ្យមានប្រសិទ្ធភាពដើម្បីផ្តោតទៅលើការងារជំនួញ ហ៊ានប្រថុយ មានទំនុកចិត្ត ចេះចាប់យកបទពិសោធន៍សម្រាប់អាជីពការងារ រៀនសូត្រអ្វីថ្មីៗ មានគំនិតច្នៃប្រឌិត ការបង្កើតទំនាក់ទំនងប្រកបដោយវិជ្ជាជីវៈ និងការប្រជ្រៀតខ្លួនជាមួយមនុស្សជោគជ័យនៅក្នុងវិស័យរបស់អ្នកឲ្យបានច្រើនជាទីបំផុតតាមដែលអាចធ្វើបាន៕
ប្រភព៖ Inc
