នៅ​ក្នុង​ជីវិត​ មិន​មែន​មនុស្ស​គ្រប់​គ្នា​សុទ្ធ​តែ​អាច​ជួប​រឿង​សមបំណង​គ្រប់​យ៉ាង​នោះ​ឡើយ វា​ប្រៀប​ដូច​ជា​អាកាសធាតុ​ដែល​ប្រែប្រួល​មិន​ទៀងទាត់ និង​មិន​អាច​ទស្សន៍ទាយ​បាន។ ជីវិត​មាន​តម្លៃ​ណាស់ ហេតុ​នេះ​បើ​ទោះ​ជា​អ្នក​បាន​ជួប​នូវ​រឿង​លំបាកៗ​ច្រើន​យ៉ាង​ណា​ក្ដី សូម​រក្សា​ការ​គិត​វិជ្ជមាន​និង​ភាព​រីករាយ​នៅ​ក្នុង​ចិត្ត។ មហា​សេដ្ឋី​ពិភពលោក លោក Andrew carnegie បាន​រក​ឃើញ​ថា «ទី​ណា​ដែលមាន​សំណើចនៃភាពរីករាយតិច ​ទី​នោះ​ក៏មាន​ភាពជោគជ័យរីកចម្រើនតិចដូចគ្នាដែរ (There is little success where there is little laughter)»។

(រូបភាព៖ Theqoute)

ជា​ការ​ពិត បើ​កាល​ណា​មនុស្ស​មាន​ភាព​រីករាយ​ ខួរក្បាល​ក៏​ភ្លឺ​ថ្លា​ គិត​រឿង​អ្វី​ក៏​រហ័សរហួន​និង​ធ្វើ​រឿង​អ្វី​ភាគ​ច្រើន​តែង​តែ​បាន​សម្រេចសមបំណង។ ប៉ុន្តែ​ តើ​ធ្វើ​ដូចម្ដេច​ទើប​អាច​​ឲ្យ​ខ្លួនឯង​​រក្សា​បាន​នៅ​ភាព​រីករាយ​គ្រប់​កាលៈទេសៈបាន? លោកគ្រូ ហោ ចាន់រដ្ឋា អ្នក​ស្រាវ​ជ្រាវ​ភាព​ជា​អ្នក​ដឹក​នាំ និង​ជា​អ្នក​ចងក្រង​សៀវភៅ «ភាព​ជា​អ្នក​មាន​កំពូល» ធ្លាប់​បាន​លើក​ឡើង​ថា កាល​ណា​ដែល​យើង​រក្សា​បាន​នៅ​ភាព​រីករាយ ខួរក្បាល​របស់​យើង​ក៏​ស្រស់ថ្លា រាងកាយ​ក៏​មាំមួន​មាន​ថាមពល។

លោក​បន្ត​ថា បើ​កាល​ណា​យើង​កើត​ទុក្ខ​ សោកសៅ ឈឺចាប់ នោះ​មាន​ន័យ​ថា​យើង​កំពុង​តែ​បំផ្លាញ​ និង​សម្លាប់​នូវ​កោសិកា​ខួរក្បាល​ខ្លួនឯង​ហើយ។ ភាព​រីករាយ​គឺ​ពាក់ព័ន្ធ​ជា​មួយ​នឹង​ ភាព​ស្មោះ​ត្រង់ មនុស្ស​បើ​កាល​ណា​គ្មាន​ភាព​ស្មោះត្រង់​គឺ​មិន​មាន​ភាព​រីករាយ​នោះ​ទេ ហើយ​អ្នក​ដែល​មិន​រីករាយ​គឺ​ប្រហែល​ជា​មក​ពី​មនុស្ស​នោះ​មិន​មាន​ភាព​ស្មោះ​ត្រង់។ ដូច្នេះ​ ដើម្បី​ផ្ដល់​ភាព​រីករាយ​ដល់​ខ្លួនឯង សូម​រក្សា​ការ​គិត​វិជ្ជមាន និង​ប្រកាន់​ខ្ជាប់​នូវ​ភាព​ស្មោះ​ត្រង់​ក្នុង​ជីវិតជា​និច្ច។

ភាព​រីករាយ​គឺ​ជា​ឱសថ​សម្រាប់​ជីវិត ជាង​នេះ​ទៅ​ទៀត​ភាព​រីករាយ​គឺ​ជា​ផ្លូវ​នាំ​មនុស្ស​ទៅ​កាន់​ភាព​ជោគជ័យ​ ផ្ដល់​ភាព​រីករាយ​ដល់​ខ្លួន​ឯង​ពី​មួយ​ថ្ងៃ​ទៅ​មួយ​ថ្ងៃ ដើម្បី​ភាព​រីក​ចម្រើន និង​ការ​អភិវឌ្ឍន៍​ក្នុង​ជីវិត៕

ដោយ៖ ជួប ស្រីរ័ត្ន