ទស្សនចំនួន ១០ឃ្លា របស់ជ័ងជឺ ដែលអ្នកគួរអាននិងយកទៅគិតឲ្យបានហ្មត់ចត់
ជ័ងជឺជាទស្សនវិទូរបស់ចិនបុរាណ បាននិយាយថា «សមិទ្ធផលគឺជាការចាប់ផ្ដើមនៃភាពបរាជ័យ។ កិត្តិនាមគឺជាការចាប់ផ្ដើមនៃភាពអាម៉ាស់។» រស់នៅក្នុងពិភពលោកមួយដែលមនុស្សភាគច្រើនតាមស្វះស្វែងរកភាពជោគជ័យនិងកេរ្តិ៍ឈ្មោះល្បីល្បាញសម្រាប់ខ្លួនឯង បុគ្គលដែលប្រតិបត្តិខ្លួនទៅតាមច្បាប់របស់ធម្មជាតិ បុគ្គលដែលដើរតាមបេះដូងរបស់ខ្លួនឯងដោយមិនត្រូវបានរង្គោះរង្គើពីរឿងរ៉ាវខាងក្រៅ និងនៅតែអាចជឿជាក់លើខ្លួនឯងដូចជាជ័ងជឺ និងឡៅជឺជាដើម ពិតជាបុគ្គលដែលគួរឲ្យគោរពកោតសរសើរនៅក្នុងលោកនេះពិតមែន។ បុគ្គលភាគច្រើនបង្រៀនឲ្យយើងធ្វើល្អនិងលះបង់អាក្រក់។ ផ្ទុយស្រឡះទៅវិញ ការបង្រៀនរបស់ជ័ងជឺមានលក្ខណៈជាផ្លូវកណ្ដាល ដោយមិនឲ្យយើងជាប់ជំពាក់ទាំងសេចក្ដីល្អឬសេចក្ដីអាក្រក់របស់ខ្លួននោះឡើយ។
ការបង្រៀនរបស់គាត់ធ្វើឲ្យយើងវិលត្រឡប់ទៅកាន់ធម្មជាតិរបស់ខ្លួនឯងវិញ និងមិនធ្វើឲ្យយើងសម្ដែង ធ្វើពុតធ្វើជាមនុស្សល្អម្នាក់នៅក្នុងសង្គមនោះឡើយ។ អ្វីដែលយើងច្រើនតែមើលឃើញថាផ្ទុយគ្នាតាមពិតទៅគឺជារបស់តែមួយប៉ុណ្ណោះ។ ពួកវាមានដើមកំណើតតែមួយ។ ដូចជាល្អនិងអាក្រក់ ជោគជ័យនិងបរាជ័យ កិត្តិនាមនិងភាពអាម៉ាស់ ប្រៀបបានទៅនឹងជីវិតដែលអ្នករស់នៅបានច្រើនមួយថ្ងៃតែអ្នកក៏អាចមើលឃើញវាថាកាត់បន្ថយអស់មួយថ្ងៃបានដែរ។ ការពិតនេះមានភាពស៊ីជម្រៅជាខ្លាំងដែលអ្នកគួរយកវាមកសញ្ជឹងគិតនៅក្នុងជីវិតរបស់អ្នក។
ខាងក្រោមនេះគឺជាទស្សនចំនួន១០ឃ្លារបស់ជ័ងជឺ ដែលអ្នកគួរអាននិងយកទៅគិតឲ្យបានម៉ត់ចត់៖
- «កំណើតនៃមនុស្សគឺជាកំណើតនៃទុក្ខសោករបស់គាត់។»
- «ភាពរីករាយដែលល្អឥតខ្ចោះគឺការដែលមិនមានភាពរីករាយ។ ការសរសើរដែលល្អឥតខ្ចោះគឺជាការដែលមិនមានការសរសើរ។»
- «មេឃនិងដីមិនធ្វើអ្វីទាំងអស់។ ប៉ុន្តែមិនមានអ្វីដែលពួកគេមិនធ្វើនោះឡើយ។»
- «គ្មាននរណាម្នាក់ហាក់ដូចជាដឹងថាតើវាមានប្រយោជន៍ប៉ុណ្ណាក្នុងការដែលឥតមានប្រយោជន៍ទាល់តែសោះ។»
- «សមិទ្ធផលគឺជាការចាប់ផ្ដើមនៃភាពបរាជ័យ។ កិត្តិនាមគឺជាការចាប់ផ្ដើមនៃភាពអាម៉ាស់។»
- «សំឡេងនៃទឹកនិយាយពីអ្វីដែលខ្ញុំគិត។»
- «ការគួរសមដែលល្អបំផុតមានសេរីភាពពីបែបបទគួរសមទាំងឡាយ។ ចរិយាដែលល្អបំផុតមានសេរីភាពពីការព្រួយបារម្ភទាំងឡាយ។ បញ្ញាដែលល្អឥតខ្ចោះមិនមានការព្រាងទុកមុន។ ក្ដីស្រឡាញ់ដែលល្អឥតខ្ចោះមិនមានការបកស្រាយ។ ភាពស្មោះត្រង់ដែលល្អឥតខ្ចោះមិនផ្ដល់នូវការធានា។»
- «យើងជាប់ជំពាក់ទៅនឹងទស្សនយល់ឃើញរបស់ខ្លួនឯងប្រៀបបានទៅនឹងអ្វីគ្រប់យ៉ាងត្រូវពឹងផ្អែកទៅលើវាយ៉ាងដូច្នោះ។ ប៉ុន្តែទស្សនរបស់យើងមិនមានភាពឋិតថេរនោះឡើយ។ ដូចទៅនឹងរដូវស្លឹកឈើជ្រុះនិងរដូវរងា ពួកវារសាត់ទៅបន្តិចម្ដងៗ។»
- «នៅពេលស្បែកជើងសមល្មម ជើងត្រូវបានបំភ្លេច។ នៅពេលខ្សែក្រវាត់សមល្មម ក្បាលពោះត្រូវបានបំភ្លេច។ នៅពេលបេះដូងយល់ស្រប និងការជំទាស់ត្រូវបានបំភ្លេច។»
- «សេចក្ដីសុខដែលល្អឥតខ្ចោះគឺជាអវត្តមាននៃការស្វះស្វែងរកសេចក្ដីសុខ។»
អត្ថបទទាក់ទង៖ កម្រងគតិចំនួន៩របស់ទស្សនវិទូ តៅ ជ័ងជឺ ដែលអ្នកគួរតែបានអានម្ដងនៅក្នុងជីវិត
ដោយ៖ ស្រីពៅ
