ពាក្យកុហកដ៏ពេញនិយមចំនួន ៤ឃ្លា ដែលឪពុកម្ដាយរបស់អ្នកបានប្រាប់អ្នករឿងលុយកាក់ និងជីវិតការងារ
តើអ្នកធ្លាប់បដិសេធន៍គំនិត ឬទស្សនៈឪពុកម្ដាយរបស់អ្នកដែរឬទេទាក់ទងទៅនឹងលុយកាក់ និងជីវិតជាក់ស្តែង? ចូរក្រឡេកមមើលពាក្យ ៤ឃ្លា ខាងក្រោមនេះ តើអ្នកធ្លាប់បានស្ដាប់អ្នកមានគុណរបស់អ្នកនិយាយវាប្រាប់អ្នកដែរឬអត់?
- កូនត្រូវមានជំនាញច្បាស់លាស់មួយ ហើយរើសយកជំនាញនោះជាមុខរបរចិញ្ចឹមជីវិតរបស់កូន។ អ្នកដែលមានជំនាញមិនច្បាស់លាស់ ជីវិតអ្នកនោះមិនមានស្ថិរភាពទេ ហើយក៏មិនគេចផុតពីភាពក្រីក្រដែរ។
- បានអាជីពមួយ កូនត្រូវតែទៅរៀននៅសាលា ហើយបើចង់ប្តូរអាជីពក៏ត្រូវតែទៅរៀននៅសាលាដែរ។ សាលារៀនគឺជាកន្លែងវិនិយោគដ៏ល្អបំផុត។
- មានលុយមិនប្រាកដថា មានអ្វីៗគ្រប់យ៉ាងនោះទេ។
- ចេះ១០មិនស្មើអ្នកប្រសព្វមួយនោះទេ។
តាមពិតទៅ ឪពុកម្តាយរបស់អ្នកប្រហែលជាមិនបានយកពាក្យសម្តីទាំងនេះមកនិយាយក្នុងពេលដំណាលគ្នានោះទេ។ ក៏ប៉ុន្តែអ្នកប្រហែលជាធ្លាប់បានស្តាប់ឮពួកគេនិយាយដូច្នេះពេញមួយ ជីវិតរបស់អ្នក។ ឥឡូវនេះ ដល់ពេលដែលអ្នកសាកល្បងមកស្វែងយល់ការបកស្រាយចំណុចទាំងនេះឲ្យបានលម្អិតដូចខាងក្រោមនេះ៖
១.អ្នកត្រូវមានជំនាញច្បាស់លាស់មួយ ហើយរើសយកជំនាញនោះជាមុខរបរចិញ្ចឹមជីវិតរបស់អ្នក
នេះមិនពិតទាំងស្រុងទេ។ សូមចាំថា អាជីពណាមួយ វាគ្រាន់តែជាមុខរបរមួយប៉ុណ្ណោះ។ នេះមានន័យថា វាជាជំនាញមួយដែលអ្នកធ្វើរហូតដល់អ្នកបានរកឃើញមុខរបរផ្សេងទៀតដែលល្អប្រសើរជាងនេះ រកចំណូលបានច្រើនជាងនេះ និងធ្វើឲ្យអ្នកចាប់អារម្មណ៍កាន់តែខ្លាំង។ មិនខុសពីសំលៀកបំពាក់នោះទេគឺថា អាជីពការងារមួយអ្នកអាចប្ដូរវាបាន។ អ្នកអាចយកវាមកស្លៀកបាន តែវាមិនអាចប្រាប់អ្នកផ្សេងបានថា អ្នកជាមនុស្សបែបណាឲ្យប្រាកដនោះទេ។
ប្រសិនបើអ្នកមានអាជីពមួយដែលអ្នកមិនពេញចិត្តដើម្បីធ្វើយកតែលុយ លុយដែលបានមកពីអាជីពនោះវាមិនអាចធ្វើឲ្យអ្នកពេញចិត្តខ្លួនឯងឡើយ។ អ្នកធ្វើដោយសារតែអ្នកចង់បានលុយប៉ុណ្ណោះ មិនមែនអ្នកចូលចិត្តការងារនោះទេ។ នេះជាមូលហេតុមួយដែលធ្វើឲ្យអ្នកគេងមិនចង់ក្រោកពីគ្រែ។ ចេះជំនាញមួយបានជ្រៅជ្រះ គឺជារឿងសំខាន់ ប៉ុន្តែវាក៏ជាចំណុចមួយដែលអ្នកត្រូវយកចិត្តទុកដាក់ផងដែរ។ ហេតុដូច្នេះហើយ ពេញមួយជីវិតរបស់អ្នក ហេតុអ្វីបានជាអ្នកមិនចង់មានបទពិសោធន៍ ឬចំណេះដឹងលើមុខជំនាញជាច្រើនទៀត?
២. អ្នកត្រូវតែទៅរៀននៅសាលា ដើម្បីរៀនចាប់យកអាជីពមួយ
ពិភពលោកបានផ្លាស់ប្ដូរហើយ។ អ្វីដែលកាន់តែពិសេសជាងមុនទៅទៀតគឺថា ការចង់បានចំណេះដឹងខ្លាំងពូកែឈានដល់តំណែងកំពូលៗ គឺអាចរកបានគ្រប់ទីកន្លែងសម្រាប់នរណាដែលមាន Wifi អ៊ីនធឺណិត និងមហិច្ឆតាខ្ពស់នៅក្នុងដៃ បើទោះបីជាមុខជំនាញមួយចំនួននៅមិនទាន់ធ្វើបានដូចជា ពេទ្យ ឬច្បាប់ក៏ដោយ។ ប៉ុន្តែឧទាហរណ៍ថា ប្រសិនបើអ្នកបានដឹង ឬទទួលបានព័ត៌មានជាមុនថា មិនត្រឹមតែជំនាញពីរទាំងនេះទេដែលអាចឲ្យអ្នករកចំណូលបានច្រើនជាងនេះ នោះប្រហែលជាមនុស្សភាគច្រើននឹងជ្រើសរើសវិធីផ្សេងក្រៅពីនេះ។
រឿងនេះគឺពិតជាកើតមានមែន។ សាលារៀនមិនមែនជាកន្លែងវិនិយោគដ៏ល្អបំផុតដែលមិនអាចប្រកែកបាននោះឡើយ ជាពិសេសសម្រាប់សហគ្រិន។ សេដ្ឋកិច្ចថ្មីទាមទារការស្វែងរកនរណាម្នាក់ដែលមានសមត្ថភាពរៀនសូត្រអភិវឌ្ឍចំណេះដឹងរបស់ខ្លួនបានគ្រប់ស្ថានភាព បានគ្រប់ទីកន្លែង។ តើអ្នកគួរចំណាយពេលសិក្សា និងងប់ងុលនឹងអ្វីដែលជាទ្រឹស្ដីនៅសាលារៀន ឬ ចំណាយពេលលើការអប់រំដែលអាចឲ្យអ្នកយកមកអនុវត្តនៅក្នុងពិភពលោកជាក់ស្ដែងបាន? នេះហើយដែលការអប់រំនាំ មកនូវផលចំណេញត្រឡប់មកវិញ។
៣.មានលុយមិនប្រាកដថា មានអ្វីៗគ្រប់យ៉ាង
ចំណុចនេះសំខាន់ខ្លាំងណាស់។ ជាការពិត មានលុយមិនប្រាកដថា មានអ្វីៗគ្រប់យ៉ាងទេ តែមានលុយ អ្នកមានអ្វីៗភាគច្រើនដែលអ្នកចង់បាន។ វាប្រៀបដូចជាខ្យល់អុកស៊ីហ្សែនដែលមនុស្សម្នាក់ៗត្រូវការជាចាំបាច់ដើម្បីដកដង្ហើមរស់សម្រាប់ទៅធ្វើរឿងផ្សេងៗទៀត។ អ្នកអាចអង្កេតដោយបានខ្លួនឯងទៅលើមនុស្សដែលគ្មានលុយ។ ពួកគេនឹងនិយាយពីវាគ្រប់ពេល។ ពួកគេព្យាយាមធ្វើពុតថា ពួកគេនៅតែមានអារម្មណ៍ធម្មតាដូចជាគ្មានរឿងអ្វីប្រសិនបើពួកគេមានលុយច្រើនក៏ដោយ។ តាមពិតទៅ ពួកគេកំពុងកុហកខ្លួនឯង។ ពិតហើយ លុយវាគ្រាន់តែក្រដាសប៉ុណ្ណោះ។ វាមិនមានតម្លៃទេ បើគេមិនចាយវា។ ប៉ុន្តែតើអ្នកនឹងពិបាកដកដង្ហើមប៉ុណ្ណានៅពេលគ្មានលុយ?
នៅក្នុងទិដ្ឋភាពជាក់ស្ដែង លុយបានក្លាយជាឧបករណ៍ដ៏ពេញនិយមដើម្បីដោះដូរសេរីភាព។ វាជាអំណាចដើម្បីធ្វើឲ្យមនុស្សផ្សេងទៀតធ្វើអ្វីៗដើម្បីអ្នកសម្រាប់ការងារដែលអ្នកមិនចង់ធ្វើ ឬមិនអាចធ្វើដោយខ្លួនឯងបាន។ វាជាអំណាចដែលធ្វើឲ្យអ្នកមានពេលវេលាកាន់តែច្រើនទៅផ្ដោតអារម្មណ៍លើអ្វីដែលអ្នកចង់ធ្វើ។ ក៏ប៉ុន្តែ នេះមិនមែនមានន័យថា អ្នកដែលមានលុយទាំងអស់ សុទ្ធតែសប្បាយចិត្តនោះទេ ឬអ្នកដែលគ្មានលុយមិនសប្បាយចិត្តនោះដែរ ហើយវាក៏ មិនមែនមានន័យថា មានលុយគេមិនអាចមើលងាយ ឬមិនអាចរំលោភបំពាននោះដែរ។
តាមពិតវាក៏ជាអន្ទាក់ ហើយធ្វើឲ្យអ្នកមានសេរីភាពកាន់តែតិចផងដែរ ប្រសិនបើអ្នកមិនចេះគ្រប់គ្រងវាឲ្យបានត្រឹមត្រូវទេនោះ។ ក្នុងន័យនេះ អ្នកមិនត្រូវធ្លាក់ខ្លួនជាទាសករនៃលុយនោះទេ។ អ្នកត្រូវតែឲ្យលុយធ្វើជាទាសកររបស់អ្នក។ អ្វីដែលអ្នកត្រូវស្រវាតោងយកឲ្យបាន គឺសេរីភាពរបស់អ្នក ពីព្រោះលុយគឺជាមធ្យោបាយមួយដែលអាចជួយឲ្យអ្នកឆាប់សម្រេចបានក្តីសុបិននេះបាន ប្រសិនបើអ្នកមានភាពឆ្លាតវៃក្នុងរឿងគ្រប់គ្រងនេះ។
៤.ចេះ ១០ មិនស្មើអ្នកប្រសព្វមួយ
នេះជាគំនិតហួសសម័យមួយ។ ការពិតវាមិនដូច្នេះទេ! អ្នកដែលមានបទពិសោធន៍ និងជំនាញសំបូរបែប អ្នកនោះទេដែលមានអត្ថិភាពកាន់តែខ្លាំងក្លានៅយុគសម័យបច្ចេកវិទ្យានាសតវត្សទី២១នេះ។ នៅពេលបច្ចុប្បន្ននេះ មិនថា អ្នករៀនច្បាប់ វេជ្ជបណ្ឌិត កសិករ អាជីវករ អ្នកជំនួញ ឬមុខរបរអ្វីផ្សេងទេ អ្នកត្រូវចេះជំនាញឲ្យបានច្រើន។ ក្រៅពីអាជីពផ្ទាល់ខ្លួនអ្នកត្រូវចេះពីជំនាញទំនាក់ទំនង លក់ ទីផ្សារ ចេះប្រើបច្ចេកវិទ្យា ចេះនយោបាយ សេដ្ឋកិច្ច វប្បធម៌ និងមានភាពច្នៃប្រឌិតជាដើមដើម្បីយកជំនាញទាំងនេះមកចាក់បំពេញជំនាញផ្ទាល់ខ្លួនណាមួយរបស់អ្នក។ អ្នកមិនគួរស្លាប់ក្រឡានៅបឺតជញ្ជក់ពឹងលើជំនាញមួយរបស់អ្នកបានឡើយ។ ពិភពលោកប្រែប្រួលលឿនណាស់ ជំនាញរបស់អ្នកអាចនឹងស្លាប់នៅថ្ងៃណាមួយ ប្រសិនបើអ្នកមិនចេះបត់បែន។ អ្នកស្គាល់ពិភពលោកកាន់តែច្បាស់ នោះអ្នកនឹងដឹងថា អ្នកគួរឈរនៅកន្លែងណាខ្លះ ហើយគួរត្រៀមខ្លួនបែបណាសម្រាប់ចរន្តសកលភាវូបនីយកម្មដែលកំពុងបន្តដំណើរឥតឈប់?
អត្ថបទទាក់ទង៖ តើអ្នកចាត់ទុកថា ការរកលុយគួរតែជាគោលដៅចុងក្រោយរបស់អ្នកដែរឬទេ?
ដោយ៖ ខេវិន
ប្រភព៖ Entrepreneur
