មេរៀន៣ ដែលភរិយាលោក Obama ផ្កាំផ្ញើទៅកាន់និស្សិតបញ្ចប់មហាវិទ្យាល័យ
នៅក្នុងកាលៈទេសៈដែលពិភពលោកកំពុងរងគ្រោះដោយសារតែការវាយលុយពីជំងឺកូវីដ ១៩ ភរិយាលោកអូប៉ាមា គឺលោកស្រី Michelle Obama បានលើកឡើងនូវសារចំនួន ៣ សម្រាប់ផ្តាំផ្ញើនិស្សិតដែលបញ្ចប់ថ្នាក់មហាវិទ្យាល័យ។ សាររបស់លោកស្រីដែលធ្វើឡើងតាមរយៈខ្សែវីដេអូ បានបង្កប់នូវការលើកទឹកចិត្តដ៏សំខាន់សម្រាប់និស្សិតគ្រប់រូបដើម្បីយកឈ្នះស្ថានភាពដ៏តឹងតែងនេះ។
១.ឆាកជីវិតមនុស្សម្នាក់ៗ វាមិនទៀងទាត់ទេ
មានពេលខ្លះអ្នកមានអារម្មណ៍ថា ជីវិតរបស់អ្នកប្រែជាធ្លាក់ចុះដល់បាត ហើយអ្នកនឹងសង្ឃឹមថា វាអាចវិលត្រឡប់ទៅរកសភាពដើមវិញ ហើយនេះគឺជារឿងមួយក្នុងចំណោមរឿងរ៉ាវជាច្រើនទៀតដែលអ្នកត្រូវជួបនៅក្នុងជីវិតរបស់អ្នក។ នៅក្នុងទិដ្ឋភាពបែបនេះ លោកស្រី Michelle Obama បានជំរុញឲ្យនិស្សិតបញ្ចប់ការសិក្សាប្រើស្ថានភាពនេះទៅជាឱកាសមួយមិនត្រឹមតែដើម្បីផ្ដោតទៅលើការកសាងអាជីពការងារមួយប៉ុណ្ណោះទេ ក៏ប៉ុន្តែត្រូវផ្ដោតផងដែរថា តើពួកគេចង់ក្លាយជាមនុស្សបែបណា?
“អ្នកមានឱកាសដើម្បីរៀនសូត្រមេរៀនដ៏មានតម្លៃជាច្រើនបានលឿនជាងអ្នកជំនាន់មុន។ អ្នកអាចរៀនសូត្រពីវាជាមួយមនុស្សវ័យក្មេងឯទៀតដែលចង់កែប្រែពិភពលោកទាំងមូល ទោះបីជាស្ថានភាពទាំងនោះវាមានភាពច្របូកច្របល់យ៉ាងណាក៏ដោយ” ។ លោកស្រី Michelle Obama បញ្ជាក់។
២.ឲ្យតម្លៃ និងគោរពសិទ្ធិអ្នកដទៃ
ភាពស្មោះត្រង់ សុចរិតភាព ការយល់ចិត្តថ្លើមគ្នា និងការអាណិតអាសូរគឺជាគុណសម្បត្តិដ៏ពិសេសដើម្បីបង្ហាញការឲ្យតម្លៃ និងការគោរពសិទ្ធិរបស់អ្នកដទៃនៅពេលជួបគ្រាលំបាក។
លោកស្រី Michelle បានលើកឡើងដូច្នេះថា៖“ ការគោរពឲ្យតម្លៃអ្នកដទៃ មិនធ្វើឲ្យអ្នកបរាជ័យឡើយ។ អ្នកមិនគួរនិយាយថា មនុស្សដែលបរាជ័យមិនគួរត្រូវបានគោរពឲ្យតម្លៃនោះឡើយ។ អ្នកត្រូវគិតថា នេះគឺជាផ្លូវជីវិតដ៏លំបាកមួយដែលកើតចេញពីជម្រើសរបស់ពួកគេ។ មនុស្សដែលនិយាយកុហក បន្ទោសអ្នកដទៃ និងមិនខ្វល់ខ្វាយពីសិទ្ធិ និងប្រយោជន៍របស់អ្នកដទៃ មានន័យថា ពួកគេកំពុងមើលរំលងកិច្ចការសំខាន់នៅក្នុងជីវិតរបស់ខ្លួន” ។
អតីតប្រធានាធិបតីទី ៤៤ រូបនេះបានបន្តទៀតថា មនុស្សម្នាក់ៗត្រូវសម្រេចចិត្តប្រើសិទ្ធិ និងសំឡេងរបស់ខ្លួនដើម្បីធ្វើការងារដែលចាំបាច់ក្នុងជីវិត ហើយបន្សល់ទុកនូវស្នាដៃមួយដែលធ្វើឲ្យពិភពលោកល្អប្រសើរជាងអ្វីដែលពួកគេបានឃើញពីមុនមក។
៣.ចែកសារសំឡេងរបស់អ្នកទៅកាន់ពិភពលោក
ទោះបីជាមនុស្សមួយចំនួនមានអារម្មណ៍ថា មើលមិនឃើញ ហើយត្រូវបានគេមើលរំលងនៅពេលនេះក៏ដោយ ពួកគេគួរតែចែករំលែកនូវសារសំឡេងរបស់ពួកគេទៅកាន់ពិភពលោកតាមលទ្ធភាពដែលអាចធ្វើបាន។ គ្មានអ្វីអាចផ្លាស់ប្ដូរបានឡើយប្រសិនបើមនុស្សម្នាក់ៗ មិនបានបង្កើតប្រវត្តិសាស្ត្រ គំនិត និងបទពិសោធន៍របស់ខ្លួន។
“វាអាស្រ័យលើខ្លួនអ្នកផ្ទាល់ដើម្បីនិយាយប្រឆាំងទៅនឹងភាពឃោរឃៅ ភាពមិនស្មោះត្រង់ អំពើអាក្រក់ និងទង្វើគ្មានសីលធម៌ផ្សេងៗទៀត។ វាអាស្រ័យលើខ្លួនអ្នកផ្ទាល់ដើម្បីពួតដៃគ្នាជាធ្លុងមួយប្រកបដោយដោយសន្តិភាព សេចក្ដីថ្លៃថ្នូរ និងការគោរពដើម្បីប្រយុទ្ធប្រឆាំងទាមទាររកភាពយុត្តិធម៌” ។ លោកស្រី Michelle Obama បញ្ជាក់បន្ថែម។
លោកស្រី Michelle ក្រើនរំលឹកថា ដើម្បីសម្រេចបានការងារទាំងនេះ អ្នកត្រូវធ្វើឡើងដោយមានគម្រោង និងមធ្យោបាយជាច្រើនដើម្បីធ្វើឲ្យមានការផ្លាស់ប្ដូរក្នុងប្រវត្តិសាស្ត្រ ហើយការផ្លាស់ប្ដូរនោះចាប់ផ្តើមចេញពីផ្ទះរបស់មនុស្សម្នាក់ៗ។ នេះជារបៀបដែលអ្នកត្រូវបំពេញសម្រាប់មនុស្សជំនាន់ក្រោយដោយក្តីសង្ឃឹម និងដោយបើកចំហ ទោះបីជាស្ថិតនៅក្នុងកាលៈទេសៈណាក៏ដោយ៕
អត្ថបទទាក់ទង៖
ដំបូន្មានអប់រំមួយរបស់លោក Obama ទៅកាន់កូនស្រីទាំងពីរ
ដោយ៖ ខេវិន
ប្រភព៖ Weforum
