លោកសោម សម្បត្តិ៖ យុវជនដែលនៅលីវគួរសន្សំចំណុច៣យ៉ាងនេះដើម្បីភាពជោគជ័យទៅថ្ងៃក្រោយ
នាយកប្រតិបត្តិក្រុមហ៊ុនថ្នាំពណ៌ជាតិ Cam-paint លោកសោម សម្បត្តិ បានលើកឡើងថាយុវជនដែលនៅលីវគួរសន្សំចំណុចទាំង៣ យ៉ាង ដើម្បីភាពជោគជ័យទៅថ្ងៃក្រោយ ទី១គឺកម្លាំងកាយ ទី២គឺកម្លាំងចិត្តនិងទី៣គឺកម្លាំងប្រាជ្ញា។
«បើអ្នកក្រពេលនៅក្មេងមិនមែនជារឿងលំបាកនោះទេ តែបើអ្នកក្រពេលអ្នកចាស់នោះទើបលំបាក។ ដូច្នេះហើយ ដើម្បីការពារនូវភាពក្រីក្រនិងភាពលំបាក យុវជនដែលនៅលីវគួរសន្សំចំណុចទាំង៣នេះ»។ លោកសោម សម្បត្តិបានលើកឡើង។
ទី១គឺកម្លាំងកាយ។ បើទោះបីជាអ្នកគ្មានចំណេះវិជ្ជាក៏ដោយ តែប្រសិនជាអ្នកមានកម្លាំងកាយ អ្នកអាចប្រើប្រាស់កម្លាំងរបស់អ្នកទៅធ្វើការរកប្រាក់កម្រៃទ្រទ្រង់គ្រួសារនិងជីវភាពបាន។ អ៊ីចឹងហើយ យុវជនគួរមើលថែសុខភាពឲ្យបានល្អនិងឲ្យបានរឹងមាំ។
បន្ថែមពីលើនេះ យុវជនគួរសន្សំកម្លាំងចិត្ត។ ជាការពិតណាស់ ក្នុងឆាកជីវិត ផ្លូវដំណើរមិនមែនជារឿងងាយស្រួលនោះទេ ពោលគឺមានឧបសគ្គនិងបញ្ហារាប់មិនអស់ដែលអ្នកត្រូវជម្នះ។ ដូច្នេះហើយ អ្នកត្រូវតែសន្សំកម្លាំងចិត្តឲ្យខ្លាំងព្រោះកម្លាំងចិត្តនេះហើយដែលជួយអ្នកឲ្យបន្តទៅមុខបើអ្នកជួបបញ្ហានិងចង់បោះបង់ម្តងៗ។
ចំណុចសំខាន់ទី៣គឺកម្លាំងប្រាជ្ញា។ ការមានកម្លាំងកាយនិងកម្លាំងចិត្តនឹងជួយឲ្យអ្នករស់បាននៅក្នុងសង្គម។ តែប្រសិនជាអ្នកចង់ជោគជ័យ អ្នកត្រូវតែមានកម្លាំងប្រាជ្ញាមួយទៀតព្រោះអ្នកត្រូវតែគិតលើសនិងគិតប្លែកខុសពីមនុស្សធម្មតា។ ម៉្យាងវិញទៀត កម្លាំងប្រាជ្ញាក៏ជួយអ្នកដោះស្រាយនូវបញ្ហាទាំងឡាយប្រកបដោយភាពវ៉ៃឆ្លាតនិងជួយអ្នកឲ្យជោគជ័យក្នុងជីវិត។
សូមបញ្ជាក់ថាសហគ្រិនជោគជ័យរូបនេះបានថ្លែងក្នុងសិក្ខាសាលាក្រោមប្រធានបទ«អាថ៌កំបាំងកសាងគ្រួសារដ៏មានសុភមង្គល » ដែលប្រព្រឹត្តិនៅCJCCកាលពីថ្ងៃ១៣ សីហា ២០១៧៕
ដោយ៖ អុឹង មុយយូ
