សុភាសិតអង់គ្លេស៖ «គ្រប់ពពកទាំងអស់សុទ្ធតែមានខ្សែឆ្នូតពណ៌ទឹកមាស។»
គ្រប់ពេលដែលយើងជួបនឹងស្ថានភាពលំបាកណាមួយ ភាគច្រើនយើងតែងតែងប់ងុលនឹងភាពងងឹតនៃស្ថានភាពនោះ ហើយមើលមិនឃើញពីពន្លឺនៃស្ថានភាពលំបាកទាំងនោះឡើយ។ តាមពិតទៅ នៅពេលអ្នកសង្កេតឲ្យមែនទែនចូលទៅក្នុងជីវិតអ្នកនិងមនុស្សដទៃទៀតនៅលើលោកនេះ នោះអ្នកនឹងរកឃើញការពិតមួយថា គ្មាននរណាម្នាក់ដែលអាចរួចផុតពីសេចក្ដីទុក្ខបាននោះឡើយ។ មានរូបគឺមានទុក្ខ។ ប៉ុន្តែ បញ្ហាគឺស្ថិតនៅលើអ្នកប៉ុណ្ណោះ។ ស្ថិតនៅលើអ្នកយ៉ាងដូចម្ដេច ? ស្ថិតនៅលើអ្នកត្រង់ថាតើអ្នកសម្លឹងមើលបញ្ហាទាំងនោះនៅក្នុងផ្លូវយ៉ាងដូចម្ដេច ? ហើយចំណុចនេះឯងទើបជារឿងសំខាន់បំផុតនៅក្នុងជីវិតរបស់អ្នក។
សុភាសិតអង់គ្លេសមួយបានពោលឡើងថា Every cloud has a silver lining. ដែលស្មើនឹងអត្ថន័យរបស់ភាសាខ្មែរយើងថា «គ្រប់ពពកទាំងអស់សុទ្ធតែមានខ្សែឆ្នូតពណ៌ទឹកមាស។» ខ្សែឆ្នូតពណ៌ទឹកមាសនេះគឺសំដៅលើព្រះអាទិត្យដែលនៅពីក្រោយពពក ហើយពន្លឺរបស់វាចាំងផ្លាតត្រូវជាមួយនឹងពពក ដែលធ្វើឲ្យយើងមើលឃើញពន្លឺម្យ៉ាងដែលហាក់ដូចជាមានខ្សែឆ្នូតពណ៌ទឹកមាសលេចចេញនៅក្បែរផ្ទាំងពពក។ ពពកប្រដូចបានទៅនឹងស្ថានភាពលំបាក និងទុក្ខក្រៀមក្រំទាំងឡាយដែលអ្នកមាន រីឯខ្សែឆ្នូតពណ៌ទឹកមាសនោះប្រៀបបានទៅនឹងចំណុចវិជ្ជមានដែលបានបង្កប់នៅក្នុងរឿងរ៉ាវអកុសលដែលអ្នកបានជួបប្រទះនោះ។
មនុស្សយើងគឺតែងតែងប់ងុលនឹងទុក្ខលំបាករបស់ខ្លួនរហូតមើលមិនឃើញពីពន្លឺ ដែលអាចជាគតិអប់រំជីវិត ឬជាឱកាសល្អៗ ដែលបានជះមកនៅខាងមុខពួកគេនោះឡើយ។ អ្នកណាក៏មានទុក្ខដែរ ទុក្ខតិច ទុក្ខច្រើន ប៉ុន្តែគ្មាននរណាម្នាក់ដែលគ្មានទុក្ខសោះឡើយនោះទេ។ ហេតុនេះហើយទើបពេលដែលអ្នកមានទុក្ខ អ្នកត្រូវចេះសម្លឹងមើលមនុស្សជុំវិញខ្លួនអ្នកដែលពួកគេមានទុក្ខខ្លាំងជាងអ្នក។ ការធ្វើបែបនេះនឹងធ្វើឲ្យអ្នកបើកចិត្តទូលាយជាងមុន ហើយមើលឃើញថាបញ្ហាអ្វីៗសុទ្ធតែជារឿងធម្មតា ជាផ្នែកមួយនៃធម្មជាតិរបស់មនុស្ស ហើយជារឿងដែលអាចដោះស្រាយបាន។
អ្នកត្រូវចាំថា គឺជាឧបសគ្គនិងទុក្ខលំបាកវេទនាអស់ទាំងនោះហើយដែលជួយចាក់ឫសឲ្យភាពរឹងមាំរបស់អ្នក ភាពអត់ធន់របស់អ្នក និងការដែលចេះមើលឃើញសេចក្ដីសុខនៅក្នុងភាពសាមញ្ញៗក្នុងជីវិតនេះ ព្រោះកាលណាអ្នកធ្លាប់ជួបទុក្ខ នោះសូម្បីតែរបស់បន្តិចបន្តួចក៏អាចធ្វើឲ្យអ្នកមានក្ដីសុខបានដែរ។
ជីវិតមានឡើងមានចុះ គឺជារឿងធម្មជាតិរបស់មនុស្សនោះទេ។ អ្វីដែលសំខាន់គឺនៅពេលដែលអ្នកមានទុក្ខ អ្នកត្រូវចេះរកមើលខ្សែឆ្នូតពណ៌មាសដែលបង្កប់នៅក្នុងពពកនៃជីវិតរបស់អ្នក។ នៅពេលនោះ សេចក្ដីទុក្ខកម្រិតណាក៏មិនអាចយកឈ្នះអ្នកបានដែរ៕
ដោយ៖ ស្រីពៅ
