សម្ដីចំនួន ១០ ដែលជួយឲ្យអ្នកដឹកនាំជីវិតប្រកបដោយបញ្ញា
ឡៅជឺ មានសម្ដីមួយឃ្លាថា «ដើម្បីទទួលបានចំណេះដឹង ត្រូវបន្ថែមជារៀងរាល់ថ្ងៃ។ ដើម្បីទទួលបានបញ្ញា ត្រូវដកចេញជារៀងរាល់ថ្ងៃ។» ហេតុអ្វីបានជាត្រូវដកចេញការយល់ដឹងរបស់អ្នកបន្តិចម្ដងៗជារៀងរាល់ថ្ងៃដើម្បីសម្រេចឲ្យបាននូវបញ្ញា ? ដើម្បីមើលឃើញអ្វីៗបានច្បាស់លាស់ មើលឃើញអ្វីៗទៅតាមភាពពិតរបស់វា នោះអ្នកមិនអាចយកកែវយឹតចាស់របស់អ្នកដែលអ្នកធ្លាប់តែប្រើរាល់ដងដើម្បីមកមើលការពិតអំពីអ្វីៗនៅក្នុងជីវិតអ្នកនោះទេ។ អ្នកត្រូវលាងសម្អាតកែវយឹតរបស់អ្នកឲ្យជ្រះស្អាត ដកចេញបន្តិចម្ដងៗនូវទស្សនរបស់អ្នកដែលអ្នកធ្លាប់មានអំពីជីវិត នោះទើបអ្នកអាចមើលឃើញថាការពិតជាអ្វីពិតប្រាកដ។ នេះហើយគឺជាបញ្ញា ហើយវាផ្ទុយពីការទទួលបាននូវចំណេះដឹងក្នុងលោកនេះ ដែលតម្រូវឲ្យអ្នកត្រូវបន្ថែមជារៀងរាល់ថ្ងៃ។
អត្ថបទថ្ងៃនេះយើងបានចងក្រងនូវសម្ដីចំនួន១០ ដែលជួយឲ្យអ្នកដឹកនាំជីវិតប្រកបដោយបញ្ញា៖
១) «ពេលខ្ញុំអាយុ១៦ឆ្នាំ ខ្ញុំធ្លាប់គោរពមនុស្សណាដែលមានសម្ភារល្អប្រណិត។ ពេលនេះខ្ញុំគោរពមនុស្សណាដែលមានសន្តិសុខខាងក្នុងចិត្ត។» ជនអនាមិក
២) «ទន់ភ្លន់និងរឹងមាំក្នុងពេលតែមួយគឺជាការផ្សំគ្នាមួយដែលមនុស្សតិចតួចណាស់អាចសម្រេចវាបាន។» Yasmin Mogahed
៣) «ភាពមានបានដែលអស្ចារ្យបំផុតគឺជាការរស់នៅយ៉ាងរីករាយជាមួយនឹងរបស់តិចតួច។» ផ្លាតូ
៤) «ភាពមានបានដែលអស្ចារ្យបំផុតគឺជាភាពក្រីក្រនៃការចង់បាន។» Seneca
៥) «ដឹងពីរបៀបនៃការស្ដាប់ ហើយអ្នកនឹងទទួលបានការចំណេញសូម្បីតែពីមនុស្សដែលនិយាយអាក្រក់។»
៦) «បើទោះជាអ្នកចំណាយពេលនៃជីវិតរបស់អ្នកទៅលើការសម្លាប់ អ្នកនឹងមិនបានធ្វើឲ្យសត្រូវរបស់អ្នកវិនាសអស់ទៅនោះទេ។ តែបើអ្នកកម្ចាត់ចេញសេចក្ដីខឹងក្រោធរបស់អ្នក នោះសត្រូវពិតប្រាកដរបស់អ្នកនឹងវិនាសចោលអស់។» Nagarjuna
៧) «មិនមែនជាជនដែលមានតិចតួចពេកនោះទេ តែគឺជនដែលស្រេកឃ្លានចង់បានកាន់តែច្រើន ទើបជាអ្នកក្រ។» Seneca
៨) «ដើម្បីទទួលបានចំណេះដឹង ត្រូវបន្ថែមជារៀងរាល់ថ្ងៃ។ ដើម្បីទទួលបានបញ្ញា ត្រូវដកចេញជារៀងរាល់ថ្ងៃ។» ឡៅជឺ
៩) «មនុស្សល្អមិនត្រូវការច្បាប់ដើម្បីប្រាប់ពួកគេឲ្យធ្វើអ្វីៗឲ្យមានការទទួលខុសត្រូវនោះទេ រីឯមនុស្សមិនល្អនឹងស្វែងរកផ្លូវនៅជុំវិញច្បាប់។» ផ្លាតូ
១០) «កុំព្យាយាមធ្វើជាមនុស្សជោគជ័យ តែធ្វើជាមនុស្សដែលមានតម្លៃ។» អាល់ប៊ឺត អាញស្តាញ
ដោយ៖ ស្រីពៅ
