ជីវប្រវត្តិសង្ខេបនិងសម្ដី​របស់​លោក​សាក់ឡូចំនួន ១០ ដែល​អ្នក​គួរ​បាន​អាន​



Charles Chaplin ឬ​អ្នក​កំប្លែង​សាក់ឡូ ត្រូវ​បាន​គេ​រាប់​ចូល​ក្នុង​ចំណោម​តួអង្គ​ដ៏​សំខាន់​បំផុត​មួយ​នៅ​ក្នុង​ប្រវត្តិសាស្ត្រ​របស់​ឧស្សាហកម្ម​ខ្សែ​ភាពយន្ត។ គាត់​កើត​នៅ​ឆ្នាំ​១៨៨៩​និង​ស្លាប់​នៅ​ឆ្នាំ​១៩៧៧។ បន្ថែម​ពី​លើ​ជា​អ្នក​កំប្លែង​របស់​អង់គ្លេស​មួយ​រូប​ដែល​មនុស្ស​ភាគច្រើន​បាន​ដឹង គាត់​ក៏​ជា​អ្នក​ដឹកនាំ​រឿង និង​អ្នក​សរសេរ​រឿង​ផង​ដែរ។ កុមារភាព​របស់​គាត់​នៅ​ក្នុង​ទីក្រុង​ឡុងដុង​ត្រូវ​ឆ្លងកាត់​ភាព​ក្រីក្រ​និង​ការ​លំបាក​ជាច្រើន។

ឪពុក​របស់​គាត់​អវត្តមាន ឯ​ម្ដាយ​របស់​គាត់​មាន​បញ្ហា​ហិរញ្ញវត្ថុ​ដែល​ធ្វើឲ្យ​គាត់​ត្រូវ​បាន​បញ្ជូន​ទៅWorkhouse ដែល​ជា​ស្ថាប័ន​ផ្ដល់​កន្លែង​ស្នាក់នៅ​និង​ការងារ​ដល់​មនុស្ស​ដែល​មិន​មាន​សមត្ថភាព​ទ្រទ្រង់​ជីវិត​ខ្លួនឯង អស់​ចំនួន​២ដង​មុន​ពេល​គាត់​មាន​អាយុ​៩ឆ្នាំ។ នៅ​ពេល​គាត់​មាន​អាយុ​១៤​ឆ្នាំ ម្ដាយ​របស់​គាត់​ត្រូវ​បាន​បញ្ជូន​ទៅ​មន្ទីរពេទ្យ​ព្យាបាល​ជំងឺ​ផ្លូវចិត្ត។ មូលហេតុ​នេះ​ហើយ​ទើប​គាត់​ត្រូវ​ដើរ​សម្ដែង​តាំង​តែ​អាយុ​នៅ​តិច​ម្ល៉េះ។ រហូត​ដល់​ឆ្នាំ​១៩១៨ គាត់​ក៏​បាន​ក្លាយ​ជា​តួអង្គ​ដ៏​ល្បីល្បាញ​បំផុត​មួយ​នៅ​លើ​ពិភពលោក។ ស្នាដៃ​របស់​គាត់​មួយ​ដែល​មាន​ចំណងជើង​ថា The Great Dictator នៅ​ក្នុង​ឆ្នាំ​១៩៤០ ដែល​បាន​និយាយ​ចំអក​ឲ្យ​មេដឹកនាំ អាដុល ហ៊ីត្លែរ បាន​បង្ក​ឲ្យ​មាន​ការ​ជជែក​ដេញដោល​ជាច្រើន​រហូត​ទាល់តែ​គាត់​ត្រូវ​បាន​បង្ខំ​ឲ្យ​ចាកចេញ​ពី​សហរដ្ឋអាមេរិក​ហើយ​ទៅ​តាំង​ទី​លំនៅ​នៅ​ឯ​ប្រទេស​ស្វីស​វិញ។


យ៉ាងណាមិញ The Great Dictator រួម​ជាមួយ​នឹង​ស្នាដៃ​ដទៃ​ទៀត​របស់​គាត់ ច្រើន​តែ​ជាប់​ចំណាត់ថ្នាក់​នៅ​ក្នុង​តារាង​នៃ​រឿង​ដែល​អស្ចារ្យ​បំផុត​គ្រប់​ពេល​ណាៗ​ទាំងអស់។ ខាងក្រោម​នេះ​គឺជា​សម្ដី​របស់​លោក​សាក់ឡូ ដែល​អ្នក​គួរ​បាន​អាន៖

) «ដើម្បី​សើច​យ៉ាង​ពិត​ប្រាកដ អ្នក​ត្រូវ​អាច​ទទួល​នូវ​ការ​ឈឺចាប់​របស់​អ្នក និង​លេង​ជាមួយ​វា។»

) «ជីវិត​គឺជា​សោកនាដកម្ម​នៅ​ពេល​សម្លឹង​មើល​ឲ្យ​ជិត ប៉ុន្តែ​ជា​រឿង​កំប្លែង​នៅ​ពេល​សម្លឹង​មើល​ឲ្យ​បាន​ឆ្ងាយ។»

) «ភាព​សាមញ្ញ​គឺជា​រឿង​ដែល​ពិបាក​ក្នុង​ការ​សម្រេច​បាន។»

) «ខ្ញុំ​គឺជា​ពលរដ្ឋ​របស់​ពិភពលោក។»

) «បើ​អ្នក​ពិត​ជា​ស្មោះត្រង់​ជាមួយ​ខ្លួនឯង វា​គឺជា​អ្នក​ណែនាំ​ផ្លូវ​ដ៏​អស្ចារ្យ​មួយ។»

) «ឃាតកម្ម​មួយ​ធ្វើឲ្យ​ក្លាយ​ជា​មនុស្ស​អាក្រក់ ឃាតកម្ម​មួយ​លាន​ធ្វើឲ្យ​ក្លាយ​ជា​វីរបុរស។»

) «គ្រឿងម៉ាស៊ីន​គួរតែ​ក្លាយ​ជា​ការ​ប្រទាន​ពរ​សម្រាប់​មនុស្សជាតិ មិនមែន​បណ្ដាសា​នោះ​ទេ។»

) «ខ្ញុំ​សង្ឃឹម​ថា​ការ​កម្សាន្ត​ដែល​ខ្ញុំ​បាន​ផ្ដល់​ឲ្យ​នឹង​មាន​ឥទ្ធិពល​គង់វង្ស​បាន​យូរ​ខ្លះៗ​សម្រាប់​មនុស្ស។ ខ្ញុំ​ព្យាយាម​បង្ហាញ​ពី​ភាព​ស្រស់​ស្អាត​ដែល​មិន​ត្រឹមតែ​ឲ្យ​តម្លៃ​ទៅលើ​លក្ខណៈ​ខាង​ផ្លូវកាយ​និង​ឈុត​ឆាក​ប៉ុណ្ណោះ​ទេ តែ​ជា​អារម្មណ៍​មូលដ្ឋាន​គ្រឹះ​ដ៏​ពិត​ប្រាកដ​របស់​មនុស្សជាតិ។ ភាព​ស្រស់​ស្អាត។ ភាព​ស្រស់​ស្អាត​គឺជា​អ្វី​ដែល​ខ្ញុំ​ផ្ដល់​ឲ្យ។»

) «ដោយសារ​តែ​ការ​កំប្លែង យើង​ត្រូវ​បាន​រំជើបរំជួល​តិច​ជាង​មុន​ពី​ការ​ប្រែប្រួល​នៃ​ជីវិត។»

១០) «សំណាង​និង​អភ័ព្វ​រសាត់​មក​រក​មនុស្ស​ដោយ​ឥត​ព្រាង​ទុក​ប្រៀប​បាន​នឹង​ពពក។»

ដោយ៖ ស្រីពៅ

X
5s