កំហុស ៥ដែលអ្នកត្រូវជៀសវាងនៅពេលធ្វើជាអ្នករកស៊ី
ផ្លូវជាអ្នកជំនួញ គឺពោរពេញទៅដោយហានិភ័យរាប់មិនអស់ ហើយវាក៏ជាវិថីដែលធ្វើឲ្យអ្នកទទួលបានរង្វាន់តបស្នងដ៏គួរឲ្យពេញចិត្តផងដែរនៅពេលអ្នកធ្វើវាបានសម្រេច។ គ្មាននរណាម្នាក់អាចមកប្រាប់អ្នក ឬធានាពីរបៀបដើម្បីអាចឲ្យអ្នកដើរទៅកាន់ក្តីសុបិន្តមួយនេះឲ្យជោគជ័យ ១០០% ត្រូវការពេលប៉ុន្មាន និងត្រូវការខិតខំប្រឹងប្រែងកម្រិតណានោះឡើយ។ ប៉ុន្តែគុណសម្បត្តិលើវិថីជំនួញគឺមានរាប់មិនអស់ ហើយអ្វីដែលសំខាន់ អ្នកគួរជៀសវាងឲ្យបានកំហុស ៥ ខាងក្រោមនេះ៖
- ស្រវ៉ាតោងចាប់ភាពជោគជ័យមិនត្រូវកន្លែង
ប្រសិនបើអ្នកមិនបានប្រុងប្រយ័ត្នទេ អ្នកអាចធ្លាក់ចូលក្នុងអន្ទាក់នៃភាពជឿជាក់ថា សម្ភារៈមួយចំនួនធ្វើឲ្យអ្នកមើលទៅជាមនុស្សជោគជ័យ។ នោះជាផ្នត់គំនិតមួយដែលយល់ថា ជោគជ័យគឺអញ្ចឹងឯង។ ជារឿយៗអ្នកបានព្យាយាយចាយលុយទិញមធ្យោបាយជាច្រើនដែលនាំទៅរកភាពជោគជ័យ និងសុភមង្គលទាំងមិនដឹងថា ការពិតភាពជោគជ័យក្នុងជីវិតរបស់ពួកគេគឺជាអ្វីពិតប្រាកដ។ វិធីមួយដែលអ្នកអាចគេចចេញពីអន្ទាក់មួយនេះគឺត្រូវគិត និងសរសេរទុកថា ភាពជោគជ័យរបស់អ្នកមានន័យបែបណានៅ ក្នុងពិភពលោកមួយនេះ។ សូមប្រុងប្រយ័ត្ននូវអ្វីដែលអ្នកកំពុងផ្តោត និងបោះជំហានឲ្យជាលំដាប់ទៅកាន់គោលដៅនោះ។ - ទំនាក់ទំនងដែលគ្មានវិជ្ជាជីវៈ
ក្នុងនាមជាអ្នកជំនួញ អ្នកនឹងមានទំនាក់ទំនងជាមួយមនុស្សច្រើនប្រភេទរាប់ទាំងដៃគូជំនួញ បុគ្គលិក ឬអតិថិជនមកពី ប្រភពផ្សេងៗគ្នា។ នៅក្នុងបរិបទនេះ អ្នកអាចនៅមានចំណុចខ្វះខាតក្នុងការប្រើភាសាទំនាក់ទំនង ឬជំនាញទំនាក់ទំនងរបស់អ្នកនៅមានកម្រិត។ នេះជាហានិភ័យមួយក្នុងនាមជាអ្នករកស៊ី ពីព្រោះវាអាចធ្វើឲ្យប៉ះពាល់ដល់កេរ្តិ៍ឈ្មោះ និងភាពជាអ្នកដឹកនាំរបស់អ្នក។ ហេតុដូច្នេះហើយអ្នកត្រូវដឹងថា តើគួរទំនាក់ទំនងបែបណាជាមួយបុគ្គលិក ដៃគូជំនួញ អតិថិជន ឬមនុស្សជុំវិញអ្នក? - ខ្សោយភាពដឹកនាំជាអ្នកបម្រើ
ជាទូទៅមនុស្សគ្រប់គ្នាយល់ថា អ្នកដឹកនាំត្រូវបង្កើតអ្នកដឹកនាំឲ្យបានច្រើន និងត្រូវធ្វើឲ្យមនុស្សគ្រប់គ្នាដើរតាម។ ក៏ប៉ុន្តែនៅក្នុងបរិបទជំនួញ អ្នកដឹកនាំដែលតាំងខ្លួនជាអ្នកបម្រើគឺមានមិនច្រើនទេ។ ដើម្បីដោះស្រាយបញ្ហា នេះ អ្នកត្រូវអនុវត្តភាពជាអ្នកដឹកនាំដែលមានឆន្ទះបម្រើពិតៗ និងដាក់ខ្លួន។ ភាពជាអ្នកដឹកនាំជាអ្នកបម្រើរបស់អ្នកមានន័យថា ត្រូវផ្តល់បរិយាកាសជំនួញមួយដែលផ្តល់ជូនសេវាកម្មបានយ៉ាងល្អដល់អតិថិជន បុគ្គលិក និងបុគ្គលផ្សេងៗទៀតដែលពាក់ព័ន្ធនៅក្នុងជំនួញរបស់អ្នកឲ្យអស់ពីចិត្តពីថ្លើម។ - អតិថិជនចាំតែត្រូវរហូត
នេះគឺជាការយល់ខុសរបស់អ្នកជំនួញទូទៅដែលអាចធ្វើឲ្យអ្នកអស់កម្លាំងចិត្ត និងបាក់ទឹកចិត្ត។ ជំនួញរបស់អ្នកមិនល្អគ្រប់ដប់ទេ ដូច្នេះហើយចង់ឬមិនចង់ពេលខ្លះអ្នកទទួលរងថ្មបាក់ពីអតិថិជនមួយចំនួន។ ការប្រកាន់គោលការណ៍ខាងលើមានន័យថា អ្នកបានផ្តល់ឱកាសឲ្យអតិថិជនមួយចំនួនតូចមកបង្កព្យុះភ្លៀងដល់អាជីវកម្មក៏ដូច ជាបុគ្គលិករបស់អ្នក។ ជំនួសឲ្យការយល់ឃើញបែបនេះ អ្នកគួរចូរយកគំនិតមួយថា អ្នកឲ្យតម្លៃ និងគោរពអតិថិជនទាំងអស់។ ប៉ុន្តែពេលខ្លះពួកគេមិនចាំតែត្រូវរហូតនោះឡើយ។ ដូច្នេះហើយអ្នកត្រូវច្បាស់ថា មនុស្សគ្រប់គ្នាមិនមែនសុទ្ធតែជាគោលដៅអតិថិជនរបស់អ្នកឡើយ។ - ដេញស្រវ៉ាតោងចាប់លុយជំនួសសេរីភាព
អ្នកប្រហែលជាយល់ថា លុយគឺជាគោលដៅចុងក្រោយរបស់អ្នក។ បើអ្នកយល់បែបនេះ គឺអ្នកកំពុងបង្កើតកំហុសដ៏ធំមួយនៅក្នុងជីវិត។ ថ្វីត្បិតតែអ្នកបើកជំនួញនៅក្នុងដៃដើម្បីស្វែងរកប្រាក់ចំណេញ និងចូលរួមអភិវឌ្ឍសង្គមក៏ពិតមែន ក៏ប៉ុន្តែសូមចាំថា អ្នកត្រូវរកលុយដើម្បីយកវាទៅដូរនឹងសេរីភាពរបស់អ្នកដែលជាគោលដៅវែងឆ្ងាយរបស់អ្នក ។ ការផ្តោតលើការរកចំណូលក្នុងរយៈពេលខ្លីមិនធ្វើឲ្យអ្នកមានសេរីភាពពិតប្រាកដឡើយ។ ផ្ទុយទៅវិញ អ្នកគួរផ្តោតលើចំណុចខ្លាំង និងភាពរីកចម្រើនអាជីវកម្មរបស់អ្នកនោះអ្នកនឹងមានលុយកាន់តែច្រើន៕
ប្រភព៖ Entrepreneur
