ថ្ងៃនេះ​យើង​បាន​ដកស្រង់​នូវ​គតិ​ចំនួន ៨ឃ្លា ​ពី​ព្រះអង្គ Haemin Sunim ជា​ព្រះសង្ឃជនជាតិ​កូរ៉េ​ខាងត្បូងមួយ​អង្គ​ និង​ជា​អ្នក​និពន្ធ​សៀវភៅ The Things You Can See Only When You Slow Down។ 

១) «មនុស្ស​មួយ​ចំនួន​និយាយ​ថា​ ពួកគេ​ពិត​ជា​មិន​ដឹង​ឡើយ​ថា ​ពួកគេ​កំពុង​ស្វែងរក​អ្វី​នៅ​ក្នុង​ជីវិត។ នេះ​ប្រហែល​ជា​មក​ពី ជាជាង​ចូល​ទៅ​ឲ្យ​ជិតស្និទ្ធ​ជាមួយ​នឹង​ថា​តើ​ពួកគេ​មាន​អារម្មណ៍​បែប​ណា ពួកគេ​បាន​ដឹកនាំ​ជីវិត​របស់​ពួកគេ​ដោយ​អាស្រ័យ​ទៅលើ​ការ​រំពឹង​ទុក​របស់​អ្នកដទៃ។ រស់នៅ​ជីវិត​របស់​អ្នក​មិនមែន​ដើម្បី​ធ្វើឲ្យ​អ្នកដទៃ​រីករាយ​នោះ​ទេ តែ​ដើម្បី​បំពេញ​នូវ​អ្វី​ដែល​បេះដូង​របស់​អ្នក​ត្រូវការ។»

២) «យើង​ដឹង​ពី​ពិភពលោក​តាមរយៈ​បង្អួច​នៃ​ចិត្ត​របស់​យើង​ប៉ុណ្ណោះ។ នៅ​ពេល​ចិត្ត​របស់​យើង​រញ៉េរញ៉ៃ ពិភពលោក​ក៏​បែប​នេះ​ដែរ។ នៅ​ពេល​ចិត្ត​របស់​យើង​ស្ងប់ ពិភពលោក​ក៏​បែប​នេះ​ដែរ។ ស្គាល់​ពី​ចិត្ត​របស់​យើង​គឺ​មាន​ភាព​សំខាន់​ស្មើគ្នា​ដូច​ទៅ​នឹង​ការ​ដែល​ព្យាយាម​ផ្លាស់ប្ដូរ​ពិភពលោក​ដែរ។»

៣) «កុំ​ប្រយុទ្ធ​ជាមួយ​អារម្មណ៍​អវិជ្ជមាន​របស់​អ្នក។ ចូរ​សង្កេត​ និង​ចង​មិត្ត​ភាព​ជាមួយ​ពួកវា។»

៤) «ជីវិត​បង្រៀន​យើង​តាមរយៈ​កំហុស​របស់​យើង។»

៥) «បុគ្គល​ដែល​នាំ​អ្នក​ទៅ​រក​ការ​ភ្ញាក់​សតិ​ខាង​វិញ្ញាណ​មិនមែន​ជា​បុគ្គល​ដែល​សរសើរ​អ្នក​ឬ​ធ្វើ​ល្អ​ដាក់​អ្នក​នោះ​ឡើយ។ វិញ្ញាណ​របស់​អ្នក​អាច​ចូល​ទៅ​ជ្រៅ​បាន​ដោយសារតែ​មាន​មនុស្ស​ដែល​គំរោះគំរើយ​ដាក់​អ្នក​និង​ផ្ដល់​ការ​លំបាក​ដល់​អ្នក។ ពួកគេ​គឺជា​គ្រូ​ខាង​វិញ្ញាណ​របស់​អ្នក​ដែល​បន្លំ​ខ្លួន​ប៉ុណ្ណោះ។»

៦) «មូលហេតុ​ដែល​យើង​គិត​ថា​យើង​ល្អ​ជាង​អ្នកដទៃ​គឺ​ដោយសារតែ​ភាព​ដែល​អន់​ជាង​នៅតែ​ពួន​សម្ងំ​ពី​ក្រោយ​យើង។ អារម្មណ៍​នៃ​ភាព​ដែល​ល្អ​ជាង​មាន​អត្ថិភាព​ដោយសារតែ​មាន​អារម្មណ៍​នៃ​ភាព​ដែល​អន់​ជាង។»

៧) «មនុស្ស​ដែល​គួរឲ្យ​គ្រោះថ្នាក់​បំផុត​គឺជា​មនុស្ស​ដែល​មាន​ជំនក់​ចិត្ត​តែ​ខ្វះ​បញ្ញា។»

៨) «បញ្ញា​មិនមែន​ជា​អ្វីមួយ​ដែល​យើង​ត្រូវ​ប្រឹងប្រែង​ដើម្បី​ទទួល​បាន​នោះ​ឡើយ។ ផ្ទុយទៅវិញ វា​កើតឡើង​ដោយ​ធម្មជាតិ​នៅ​ពេល​យើង​បន្ថយ​ល្បឿន​និង​សង្កេត​ឃើញ​អ្វី​ដែល​មាន​នៅ​ទីនោះ​ស្រាប់។»

ដោយ៖ ស្រីពៅ

អត្ថបទទាក់ទង៖ គតិបណ្ឌិត​១០​ឃ្លា ដែល​អាច​ផ្ដល់​ចម្លើយ​ដល់​សំណួរ​ដែល​អ្នក​មាន​នៅ​ក្នុង​ទី​ជម្រៅ​នៃ​បេះដូង​របស់​អ្នក