នាយិកាក្រុមហ៊ុននុំស្រួយលីលីចែករំលែកគន្លឹះធ្វើអាជីវកម្មដំបូងឲ្យទទួលជោគជ័យ
សហគ្រិនស្រ្តីឆ្នើមកម្ពុជា លោកជំទាវឧកញ៉ា កែវ មុំ នាយិកានៃក្រុមហ៊ុនផលិតនំស្រួយលីលី ដែលជាក្រុមហ៊ុនកំពុងមានប្រជាប្រិយភាពខ្លាំងព្រមទាំងមានការទទួលស្គាល់លំដាប់ថ្នាក់ជាតិ និងអន្តរជាតិ។ នៅក្នុងកិច្ចសម្ភាសន៍ចែករំលែកគន្លឹះអាជីវកម្មជាមួយក្រុមការងារ Bizkhmer លោកជំទាវបានលើកឡើងថា ចំពោះការបើកដំណើរការអាជីវកម្ម គឺមិនពិបាកខ្លាំងនោះទេ តែអ្វីដែលសំខាន់នោះគឺការធ្វើវាឲ្យមាននិរន្តរភាពទើបជារឿងដែលពិបាកសម្រាប់អ្នកធ្វើអាជីវកម្ម។
ជាមួយគ្នានេះលោកជំទាវបានចែករំលែកទៀតថា ចំពោះការចាប់ផ្ដើមដំណើរការអាជីវកម្មដំបូងអ្វីដែលយើងត្រូវធ្វើនោះគឺសិក្សាទៅលើទីផ្សារថាតើក្នុងពេលបច្ចុប្បន្ននៅលើទីផ្សារគេមានតម្រូវការអ្វី ហើយចំពោះយើងខ្លួនឯងត្រូវដឹងថាតើយើងស្រលាញ់ពេញចិត្តធ្វើអាជីវកម្មនោះដែរឬទេ។ លោកជំទាវបន្តដោយសង្កត់ធ្ងន់ថា "ទោះបីជាយើងឃើញអាជីវកម្មដែលយើងស្រលាញ់នោះ អ្នកដទៃគេធ្វើទៅបរាជ័យ ក៏ប៉ុន្តែមិនប្រាកដទេថាយើងធ្វើអាជីវកម្មនោះទៅនឹងបរាជ័យដូចគេនោះ"។ ពោលគឺយើងត្រូវមានទស្សនៈវិស័យរបស់ខ្លួនឯងឲ្យច្បាស់លាស់ យើងត្រូវមានបេសកកម្មដែលយើងអាចមើលឃើញថាយើងត្រូវដើរផ្លូវណាដែលអាចទទួលបានជោគជ័យ ហើយយើងក៏ត្រូវសិក្សាទៅលើការធ្វើអាជីវកម្មរបស់អ្នកដទៃថាតើហេតុអ្វីបានជាគេធ្វើទៅមិនជោគជ័យ ដូច្នេះយើងអាចយកចំណុចនេះមកសិក្សាហើយបញ្ជៀសផ្លូវដើររបស់យើង នោះយើងនឹងទទួលបានជោគជ័យ។
នេះជាការលើកឡើងបន្តែមរបស់នាយិការូបនេះ។ ទន្ទឹមគ្នានេះដែរសហគ្រិនស្រ្តីឆ្នើមរូបនេះបានលើកឡើងបន្តថា នាពេលបច្ចុប្បន្នពិភពលោកកំពុងរីកចម្រើនដែលគេហៅថាពិភពលោកនៅក្នុងដៃ ដូច្នេះសម្រាប់យុវជនក្នុងសម័យនេះ ប្រសិនបើពួកគាត់ពិតជាចង់ធ្វើអាជីវកម្មពិតមែនគឺមិនខ្វះទេព័ត៌មានដែលពួកគាត់អាចស្វែងរកបានតាមរយៈទូរស័ព្ទទំនើប តាមរយៈមិត្តភក្ដិសាច់ញ្ញាត្តិ ឬតាមរយៈការចែករំលែកបទពិសោធន៍នៅតាមបណ្ដាសមាគមន៍នានាជាដើម។ លោកជំទាវ ឧកញ្ញា កែវ មុំ "កុំបាក់ទឹកចិត្តពេលដែលយើងជួបបញ្ហា ត្រូវគិតថាមិនមែនយើងធ្វើមិនកើតនោះទេ ប៉ុន្តែមកពីយើងធ្វើវាមិនទាន់បាន យើងធ្វើវាមិនទាន់ត្រូវ ទើបវាមិនទាន់ត្រូវ"៕
អត្ថបទដោយ៖ ជួប ស្រីរ័ត្ន
