ហេតុផល ៤ យ៉ាង ប្រឹងប្រែងធ្វើការកាន់តែច្រើនតែមិនសូវចំណេញដល់អាជីវកម្មរបស់អ្នក
ដើម្បីទទួលបានជោគជ័យនៅក្នុងយុគអាជីវកម្មសម័យថ្មី អ្នកត្រូវគិតគូរអំពីអ្វីៗតាមរបៀបថ្មី អ្នកត្រូវធ្វើអ្វីៗតាមរបៀបថ្មីក៏ដូចជានិយាយថា "លាហើយ" ទៅនឹងទម្លាប់ និងគំនិតចាស់ៗដែលលែងមានប្រយោជន៍ទៅទៀត។
ផ្នត់គំនិតដ៏ធំបំផុតមួយក្នុងចំណោមផ្នត់គំនិតផ្សេងៗទៀតដែលត្រូវផ្លាស់ប្តូរគឺថា តើអ្នកយល់ឃើញយ៉ាងណាចំពោះការងាររបស់អ្នក? តាមពិតទៅ រឿងដែលត្រូវផ្ដោតយកចិត្តទុកដាក់ជាងគេ គឺលទ្ធផលការងារនៅទីបញ្ចប់។ ហេតុដូច្នេះហើយ ពេលវេលាធ្វើការ ៨ម៉ោង វាលែងជារឿងសំខាន់ទៀតហើយ ហើយការខិតខំប្រឹងប្រែងធ្វើការ វាក៏មិនមែនជាជម្រើសដ៏ល្អទៀតនោះដែរ។
ខាងក្រោមនេះនឹងបង្ហាញថា ហេតុអ្វីប្រឹងប្រែងធ្វើការកាន់តែច្រើនមិនចំណេញដល់អាជីវកម្មរបស់អ្នក?
១. កុំប្រឹងធ្វើការកាន់តែខ្លាំង ប៉ុន្តែធ្វើការដោយឆ្លាតវៃ
នៅក្នុងផ្នត់គំនិតរបស់ប្រជាជនអាមេរិកគឺ "ប្រឹងប្រែងធ្វើការឲ្យកាន់តែច្រើន”។ ប៉ុន្តែនៅក្នុងបរិបទអាជីវកម្ម នេះមិនមែនជាមធ្យោបាយដ៏ត្រឹមត្រូវនោះឡើយ។ មានមូលហេតុមួយក្នុងចំណោមហេតុផលធំបំផុតដែលអាជីវកម្មមួយបរាជ័យគឺដោយសារពួកគេខិតខំ ប្រឹងប្រែងធ្វើការឈានដល់ចំណុចមួយដែលម្ចាស់អាជីវកម្ម និងបុគ្គលិកអស់ថាមពលមិនអាចដំណើរការលើសពីនេះទៀតបានទេ ហើយពេលវេលាដែលផ្តល់ឲ្យក៏មិនមានលើសពី២៤ម៉ោងដែរ។
ការប្ដេជ្ញាចិត្ត ការប្រឹងប្រែង និងការតស៊ូពិតជាមានសារៈសំខាន់ក្នុងការទទួលបានជោគជ័យក្នុងអាជីវកម្មខ្នាតតូច។ ប៉ុន្តែការធ្វើការដោយឆ្លាតវៃ មានន័យថា អ្នកទទួលបានជំរុញឲ្យគោលដៅរបស់អ្នកកាន់តែឆាប់ដល់ ជាមួយនឹងធនធាន ថាមពល និងគំនិតសំបូរបែបដើម្បីធ្វើជំនួញរបស់អ្នកបានឈានឡើងដល់កម្រិតខ្ពស់ជាងនេះទៀត។
២. ធ្វើការមិនសំខាន់ សំខាន់ការងារនោះត្រូវធ្វើឲ្យហើយ
ម្ចាស់អាជីវកម្មភាគច្រើនបានចាប់ផ្ដើមអាជីវកម្មរបស់ខ្លួនដោយសារតែពួកគេយល់ឃើញថា ខ្លួនពិតជាធ្វើបានល្អនៅក្នុងអាជីពការងារនៅក្នុងក្រុមហ៊ុនណាមួយដែលខ្លួនធ្លាប់បានធ្វើពីមុនមក។ ប៉ុន្តែ នៅក្នុងបរិបទការងារជាអ្នកធ្វើការឲ្យគេ វាខុសពីអ្នកដែលធ្វើជំនួញដោយខ្លួនឯង។ នៅពេលអ្នកធ្វើការឲ្យគេ អ្នកត្រូវបានបង្ខំឲ្យធ្វើការ ហើយមានការងារខ្លះដែលអ្នកមិនអាចសម្រេចបាន ធ្វើទាំងលំបាក ទាំងបង្ខំចិត្ត។ អ្នកបានលក់ពេលវេលារបស់អ្នក ហើយព្យាយាមប្រឹងប្រែងដើម្បីឲ្យសមិទ្ធផលកើតមានឡើង។
យ៉ាងណាមិញ នៅពេលអ្នកចាប់ផ្តើមជំនួញដោយខ្លួនឯង ការខិតខំប្រឹងប្រែងធ្វើការទាំងនោះវាលែងសូវសំខាន់ទៀតហើយ។ អ្វីដែលសំខាន់គឺស្ថិតនៅត្រង់ថា ទោះការងារនោះស្រួល ឬលំបាកក្តី អ្នកត្រូវតែធ្វើឲ្យបានប្រកបដោយគុណភាព។ មូលហេតុគឺ ស្ថិតនៅត្រង់ថា ប្រសិនបើអ្នកធ្វើមិនបាន គូប្រជែងរបស់អ្នកនឹងធ្វើបាន ហើយអ្នកគឺជាអ្នកបរាជ័យទាំងកណ្តាលទី។
៣. ភាពរវល់មិនអាចបង្កើតអាជីវកម្មដ៏ល្អមួយបានទេ
ពេលខ្លះ អ្នកអាចបាត់បង់ម្ចាស់ការធ្លាក់ទៅដល់ចំណុចមួយនៅក្នុងអាជីវកម្មដែលអ្នកនឹងមិនច្បាស់ថា នឹងត្រូវធ្វើអ្វីទៀតជាបន្ទាប់។ ឬក៏ពេលខ្លះ អ្នកដឹងពីអ្វីត្រូវធ្វើ ប៉ុន្តែអ្នកគ្រាន់តែ មិនចង់ធ្វើវាតែប៉ុណ្ណោះ។ ដូច្នេះអ្នកក៏សម្រេចចិត្តមិនធ្វើវា ដោយយកលេសថា អ្នកកំពុងជាប់រវល់ខ្លាំងនៅក្នុងការងារជំនួញរបស់អ្នក។ ភាពរវល់នេះ គឺជាសកម្មភាពមួយដែលប្រើថាមពល និងចំណាយពេលវេលាដ៏ឥតប្រយោជន៍បំផុតមួយដែលរារាំងដល់មុខជំនួញរបស់អ្នក។
ជាបុគ្គលិកម្នាក់ អ្នកនឹងទទួលបានរង្វាន់លើកទឹកចិត្តនៅពេលចៅហ្វាយរបស់អ្នកមើលមកអ្នកហាក់បីដូចជា អ្នកកំពុងរវល់ណាស់អ៊ីចឹង។ ប៉ុន្តែតាមពិតទៅ រយៈពេលធ្វើការដែលមានផលិតភាពបំផុតក្នុងមួយថ្ងៃគឺត្រឹមតែ ៣ម៉ោងប៉ុណ្ណោះ។ ចុះម៉ោងដែលនៅសល់ពីនេះ តើអ្នកយកទៅធ្វើអ្វីខ្លះ? ពេលវេលារបស់អ្នកមានតម្លៃខ្លាំងណាស់ សូមប្រើវាឲ្យចំទិសដៅ និងបានប្រយោជន៍មកវិញ។ នៅក្នុងបរិបទជំនួញ អ្នកត្រូវដឹងពីភាពខុសគ្នារវាងអ្វីដែលត្រូវធ្វើ និងអ្វីដែលចាំបាច់ត្រូវធ្វើឲ្យបាន។
៤. ការបង្ខិតបង្ខំ និងការគាបសង្កត់នាំទៅរកការបែកបាក់ និងហត់នឿយ
នៅក្នុងគ្រប់ទិដ្ឋភាពទាំងអស់របស់មនុស្ស ការបង្ខិតបង្ខំ និងការគាប់សង្កត់ គឺមិនមែនជាជម្រើសមួយដើម្បីអាចសម្រេចបានលទ្ធផលប្រកបដោយគុណភាព និងប្រសិទ្ធភាពបានទេ។ សម្រាប់អ្នកជំនួញក៏ដូចគ្នាដែរ នៅពេលអ្នកយកវិធីទាំងនេះទៅអនុវត្តនៅ ក្នុងការងាររបស់អ្នក មិនយូរមិនឆាប់ ទាំងបុគ្គលិកទាំងអ្នកនឹងជួបបញ្ហាសុខភាព មានភាពនឿយហត់ ស្ត្រេស ហើយនៅទីបំផុតឈានទៅរកការបោះបង់តែម្តង។ នេះជាតឹកតាងមួយបង្ហាញថា ការប្រឹងប្រែងគ្មានឈប់សម្រាក វាមិនមែនជាជម្រើសដ៏ល្អបំផុតឡើយសម្រាប់អាជីវកម្ម។ អ្នកត្រូវមានពេលវេលាសម្រាប់សម្រាក ពីព្រោះអ្នកមិនមែនជាគ្រឿងម៉ាស៊ីននោះឡើយ ហើយអ្វីដែលចាំបាច់គឺជ្រើសរើសភាពឆ្លាតវៃមកជំនួសវិញ៕
ប្រភព៖ addicted2success
