តើអ្នកជំនួញគួរធ្វើការប៉ុន្មានម៉ោងក្នុងមួយថ្ងៃ?
ភាពជាអ្នកជំនួញ អ្នកត្រូវការខិតខំប្រឹងប្រែងខ្លាំងណាស់។ សម្រាប់មនុស្សមួយចំនួន ភាពជាអ្នកជំនួញ ឬសហគ្រិន មានន័យថា ពួកគេបោះបង់ធ្វើការឲ្យគេចោល ហើយចាប់យកអាជីពរកស៊ីដោយខ្លួនឯង។ អ្នកខ្លះបានរកស៊ីដោយមិនចាំបាច់រៀននៅមហាវិទ្យាល័យ ខណៈដែលខ្លះទៀតរៀនឆ្លៀតរកស៊ីឲ្យខ្លួនឯងបណ្តើរ ធ្វើការឲ្យគេបណ្ដើរ។
ទោះបីជាអ្នកក្លាយជាជំនួញតាមវិធីណាក៏ដោយ អ្នកត្រូវមានការប្ដេជ្ញាចិត្តក្នុងការលះបង់ពេលវេលាដ៏ច្រើនរបស់អ្នកនៅជាមួយនឹងវា។ ក៏ប៉ុន្តែសំនួរសួរថា តើអ្នកត្រូវការចំណាយពេលពេលច្រើនប៉ុណ្ណាដើម្បីជោគជ័យក្នុងកិច្ចការជំនួញរបស់ អ្នក?
ថ្វីត្បិតតែមានក្រុមហ៊ុនខ្លះប្រើក្បួន ៩ មក ៥ (9-to-5) ឬ ៤០ម៉ោងក្នុងមួយសប្ដាហ៍ អ្នកជំនួញជាច្រើនយល់ថា នៅក្នុងទិដ្ឋភាពជាក់ស្ដែងគឺពួកគេត្រូវការពេលច្រើនជាង ៤០ម៉ោងក្នុងមួយសប្ដាហ៍នេះទៅទៀត។ សម្រាប់សហគ្រិនក្មេងៗវិញ នេះប្រហែលជាបញ្ហាចោទមួយរបស់ពួកគេ ត្បិតអីពួកគេមិនអាចស្មានត្រូវឲ្យប្រាកដថា ត្រូវធ្វើការប៉ុន្មានម៉ោងក្នុងមួយថ្ងៃ ឬក្នុងមួយសប្ដាហ៍លើកិច្ចការរកស៊ីរបស់ពួកគេនោះទេ។
ដូចនេះតើអ្នកជំនួញគួរធ្វើការប៉ុន្មានម៉ោងក្នុងមួយសប្ដាហ៍? ជាមួយនឹងភាពស្រពិចស្រពិលជាច្រើនក្នុងការផ្តល់ចម្លើយមួយនេះ អ្នកជំនួញទាំងអស់ត្រូវសិក្សាស្វែងយល់ពីផលិតភាពការងារនៅក្នុងអាជីវកម្មរបស់ខ្លួនដើម្បីស្វែងរកចម្លើយពិតប្រាកដមួយសម្រាប់ខ្លួនឯង។
គ្មានចម្លើយពិតប្រាកដណាមួយត្រូវបានលាតត្រដាងចំពោះសំនួរខាងលើទេ
អ្នកជំនួញគ្រប់រូប មិនគួរកំណត់ស្តង់ដារចំនួនម៉ោងធ្វើការដើម្បីឲ្យអាជីវកម្មរបស់ខ្លួនជោគជ័យនោះទេ។ ការយកចំនួនម៉ោងធ្វើការមកធ្វើជាមូលដ្ឋានដើម្បីវាស់ស្ទង់ភាពជោគជ័យក្រុមហ៊ុនរបស់អ្នក គឺវាគ្មានន័យឡើយ។ អ្នកត្រូវដឹងថា អ្នកត្រូវតែធ្វើការរហូតដល់អ្នកអាចសម្រេចបានលទ្ធផលមួយដែលអ្នកចង់បាន មិនថា អ្នកទើបតែចាប់ផ្តើមចេញលក់ជាលើកដំបូង មានអ្នកទិញដំបូង ឬអាចរកចំណូលបានក្នុងឆ្នាំដំបូងដល់ទៅ ៦ខ្ទង់នោះទេ។ ប្រសិនបើអ្នកអាចប្រើពេលត្រឹមតែ ២០ ម៉ោង ឬដល់ទៅ ៧០ម៉ោងក្នុងមួយសប្ដាហ៍ទើបអាចសម្រេចផែនការរបស់អ្នកបាន អ្នកត្រូវតែចំណាយពេលតាមហ្នឹងដែរ។
ម្ចាស់ជំនួញខ្លះស្វែងរកភាពជោគជ័យដោយធ្វើការ ៣០ម៉ោង ឬតិចជាងនេះក្នុងមួយសប្ដាហ៍ ខណៈដែលអ្នកជំនួញខ្លះទៀតយល់ថា ធ្វើការ ៩៥ ម៉ោងក្នុងមួយសប្ដាហ៍ ឬ ១៤ម៉ោងក្នុងមួយថ្ងៃដើម្បីក្លាយជាសេដ្ឋី។ អ្នកខ្លះទៀតដូចជាលោក Gary Vaynerchuk សេដ្ឋីអាមេរិកដើមកំណើតបេឡារូសបានឲ្យយោបល់ថា សហគ្រិនថ្មីថ្មោងត្រូវចំណាយពេលជាមួយនឹងមុខជំនួញរបស់ខ្លួនរហូតដល់ ១៨ម៉ោងក្នុងមួយថ្ងៃនៅឆ្នាំដំបូង។ ចំណែកមហាសេដ្ឋីអាមេរិក Elon Musk ធ្លាប់និយាយថា លោកបានប្រើពេលរហូតដល់ ទៅ ៨០ ទៅ ១០០ ម៉ោងឯណោះក្នុងមួយសប្តាហ៍នេះបើយោងតាមការចេញផ្សាយរបស់សារព័ត៌មាន Businessinsider។
ចំពោះសេដ្ឋី Vaynerchuk លោកថា ដើម្បីឲ្យក្តីសុបិនរបស់អ្នកក្លាយជាការពិត អ្នកត្រូវការលះបង់ច្រើនខ្លាំងណាស់។ លោកបន្តថា ធ្វើជាអ្នកជំនួញ អ្នកមានការងារសំខាន់ៗជាច្រើនត្រូវធ្វើ គេងមិនឆ្អែត មិនសូវមានពេលសម្រាប់មនុស្សដែលអ្នកស្រលាញ់ ហើយថែមទាំងគ្មានពេលគ្រប់គ្រាន់ដើម្បីបង្កើតកម្មវិធីសប្បាយៗ និងថែទាំសុខភាពរបស់អ្នកទៀតផង។ សុភមង្គលរបស់អ្នកទំនងក៏មិនទទួលបាន ១០០% ផងដែរ។
ទោះបីជាបែបនេះក្តី ការស្រាវជ្រាវរបស់សាកលវិទ្យាល័យ Harvard បានរកឃើញថា ការធ្វើការងារច្រើនម៉ោង អាចធ្វើឲ្យផលិតភាព និងសុខភាពរបស់អ្នកចុះខ្សោយ។ ខណៈដែលមានអ្នកជំនួញល្បីៗជាច្រើននៅលើពិភពលោកជំរុញឲ្យអ្នកធ្វើការពី ៦០ ទៅ ១០០ម៉ោងក្នុងមួយសប្ដាហ៍ ការស្រាវជ្រាវតាមបែបវិទ្យាសាស្ត្រមិនយល់ស្របទៅនឹងដំបូន្មានមួយនេះឡើយ។ ជាការពិត វាគ្មានចម្លើយដ៏សុក្រឹតណាមួយដែលប្រាប់អ្នកថា អ្នកត្រូវចំណាយពេលលើកិច្ចការជំនួញរបស់អ្នកឲ្យបានប៉ុន្មានម៉ោងក្នុងមួយសប្ដាហ៍នោះទេ។
មុននឹងស្វែងរកចម្លើយពិតប្រាកដមួយសម្រាប់ខ្លួនឯង អ្នកត្រូវតាមដានមើលពីសុខភាពផ្លូវកាយ និងផ្លូវចិត្តរបស់អ្នក។ អ្នកត្រូវពិនិត្យមើលលក្ខខណ្ឌការងាររបស់អ្នកថា អ្នកចង់បានអ្វី? ចង់បានជោគជ័យកម្រិតណា? វាមានផលិតភាពកម្រិតណា? ស្ថានភាពរបស់ អ្នកមិនដូចអ្នកជំនួញទាំងនោះទេ។ ហេតុដូច្នេះហើយ សូមកុំព្យាយាមធ្វើតាមតែអ្វីដែលបុគ្គលទាំងនោះសរសេរបង្ហោះនៅលើបណ្តាញសង្គម ឬប្រព័ន្ធផ្សព្វផ្សាយនានា៕
ដោយ៖ ដោយ
ប្រភព៖ Businessnewstodaily
