តើអ្នកអាចចាប់ផ្តើមបើកជំនួញនៅមុនអាយុ ២៥ឆ្នាំដោយវិធីណា?
មានយុវជនវ័យក្មេងមិនតិចទេនៅពេលបច្ចុប្បន្ននេះដែលមានក្តីស្រមៃចង់ធ្វើជាអ្នកជំនួញដ៏ជោគជ័យមួយនៅពេលអនាគត។ ពួកគេយល់ថា វិធីនេះបើជោគជ័យនឹងធ្វើឲ្យពួកគេក្លាយជាអ្នកមាន មានសេរីភាពហិរញ្ញវត្ថុ និងអាចរួមចំណែកអភិវឌ្ឍសង្គមបានទៀតផង។ សូមមិនបដិសេធន៍ទេចំពោះគំនិតផ្តួចផ្តើមរកស៊ីរបស់អ្នក ក៏ប៉ុន្តែវិថីមួយនេះ គឺមានហានិភ័យ និងឧបសគ្គច្រើនណាស់ មិនងាយស្រួលដូចអ្នកគិតនោះឡើយ។
យ៉ាងណាក៏ដោយ អត្ថបទនេះព្យាយាមលើកយកចំណុចចំនួន ៧ សម្រាប់និស្សិត ឬប្រិយមិត្តដែលមានបំណងចង់បើកជំនួញទាំងវ័យក្មេង ដើម្បីយកទៅពិចារណាដូចខាងក្រោម។
១.ជ្រើសរើសការងារល្អមួយដែលទាក់ទងនឹងជំនួញដែលអ្នកចង់ធ្វើ
ប្រសិនបើអ្នកចង់បើកជំនួញលក់សំលៀកបំពាក់ អ្នកគួរតែមានបទពិសោធន៍ក្នុងវិស័យនេះ។ អ្នកគួរធ្វើការឲ្យហាងលក់សំលៀកបំពាក់បណ្ដើររៀនសូត្របណ្ដើរដើម្បីដកស្រង់យកចំណេះដឹង និងបទពិសោធន៍ជាមុនសិនមុននឹងចេញរកស៊ីខ្លួនឯង។ បទពិសោធន៍ និងចំណេះដឹងជួយឲ្យអ្នកយល់ច្បាស់ពីរបៀបគ្រប់គ្រង ដំណើរការ ទិញលក់ និងគន្លឹះរកស៊ីក្នុងវិស័យរបស់អ្នក។
២.មានសហប្រតិបត្តិការល្អពីគំនិតជំនួញរបស់អ្នក
នៅពេលអ្នកមានគំនិតចង់បើកអាជីវកម្មមួយជាមួយមិត្តភក្តិ ឬដៃគូអាជីវកម្មផ្សេងៗទៀត អ្នកត្រូវប្រាកដថា ពួកគេយល់ស្របគំនិតរបស់អ្នក និងមានការប្តេជ្ញាចិត្តបំពេញកិច្ចការនេះឲ្យបានជោគជ័យតាមគោលដៅកំណត់។ អ្នកត្រូវមានការគាំទ្រគ្នាទៅវិញទៅមកលើបេសកកម្មក្រុមហ៊ុន ការសម្រេចចិត្ត និងសកម្មភាពផ្សេងៗទៀត ត្បិតអីការសហការគ្នាជាធ្លុងមួយនៅក្នុងក្រុមការងារ នឹងជំរុញឲ្យអាជីវកម្មរបស់អ្នកមានភាពរីកចម្រើន។
៣.មានទេពកោសល្យ ឬជំនាញក្នុងមុខជំនួញរបស់អ្នកច្បាស់លាស់
ប្រសិនបើ អ្នកយល់ថា ខ្លួនឯងមិនសូវមានជំនាញ ឬចំណេះដឹងច្បាស់លាស់ពីមុខជំនួញដែលអ្នកនឹងធ្វើនោះទេ អ្នកមិនគួរហ៊ានប្រថុយពេកនោះឡើយ។ ចំណុចនេះគឺចាំបាច់ណាស់ពីព្រោះថា បើអ្នកមិនមានជំនាញដ៏ប៉ិនប្រសព្វក្នុងមុខជំនួញរបស់អ្នកទេ អ្នកនឹងប្រឈមមុខនឹងហានិភ័យខ្ពស់ និងងាយបរាជ័យ។
៤.យកចិត្តទុកដាក់ឲ្យបានខ្លាំងបំផុតលើគំនិតជំនួញរបស់អ្នក
តើអ្នកចង់រកស៊ីអ្វី? ចង់លក់ផលិតផល ឬសេវាកម្មអ្វី? តើអ្នកមានដឹងថា ផលិតផល ឬសេវាកម្មរបស់អ្នកមានតម្រូវការខ្ពស់ដែរឬទេ? នរណាខ្លះជាអតិថិជនគោលដៅ? តើអ្វីទៅជាចំណុចខ្លាំង និងចំណុចខ្សោយនៃគំនិតអាជីវកម្មរបស់អ្នក? តើអ្នកអាចប្រកួតប្រជែងជាមួយគូប្រជែងនៅលើទីផ្សារដែរឬទេ? នេះជាសំនួរសំខាន់ៗដែលអ្នកត្រូវវិភាគឲ្យបានស៊ីជម្រៅជាទីបំផុតមុននឹងឈានជើងហក់ប្រឡូកក្នុងអាជីវកម្ម។
៥.បង្កើតបណ្ដាញទំនាក់ទំនងជាមួយអ្នកជំនួញដូចគ្នាឲ្យបានច្រើន
ការបង្កើតទំនាក់ទំនងឲ្យមានប្រសិទ្ធភាពនៅក្នុងមុខជំនួញគឺពិតជាមានសារសំខាន់ខ្លាំងណាស់។ អ្នកត្រូវពិនិត្យមើលថា នរណាខ្លះដែលអ្នកគួរជ្រើសរើសធ្វើជាដៃគូទំនាក់ទំនង? តើពួកគេអាចជួយផ្តល់ចំណេះដឹង និងបទពិសោធន៍ជាច្រើននៅក្នុងមុខជំនួញរបស់អ្នកដែរឬទេ? តើពួកគេមានសក្ដានុពលអ្វីដែលជួយឲ្យអ្នកជោគជ័យក្នុងមុខជំនួញ? មធ្យោបាយដ៏ល្អមួយគឺអ្នកគួរបង្កើតទំនាក់ទំនងឲ្យបានច្រើនជាមួយអ្នកជំនួញនានា ជាពិសេសអ្នកជំនួញដែលរកស៊ីនៅក្នុងវិស័យរបស់អ្នកតែម្ដង។
៦.មានភាពជឿជាក់លើគំនិតជំនួញរបស់អ្នក
មុនពេលអ្នកចាប់ផ្តើមរកស៊ី អ្នកត្រូវប្រាកដខ្លួនឯងថា គំនិតរកស៊ីរបស់អ្នកនឹងដំណើរការទៅរលូន ហើយនឹងមានសក្ដានុពលកាន់តែខ្លាំងឡើងនៅពេលអនាគត។ អ្នកមិនគួរមានភាពសង្ស័យលើគំនិតជំនួញរបស់អ្នក ហើយត្រូវធ្វើឲ្យវាអាចដំណើរការបានយ៉ាងពិតប្រាកដ។ អ្នកអាចសាកល្បងធ្វើតេស្តវានៅលើទីផ្សារជាមុនសិន ឬស្នើសុំគំនិតយោបល់ពីមិត្តភក្តិ ឬអ្នកជំនាញដើម្បីកែលំអរកមើលចំណុចខ្វះខាតបន្ថែម។
៧.ព្យាយាមប្រឹងប្រែងឲ្យអស់សមត្ថភាព
អ្នកត្រូវទទួលស្គាល់ថា ភាពជាអ្នកជំនួញ អ្នកនឹងត្រូវលះបង់ពេលវេលាច្រើនណាស់ដើម្បីផ្ដោតលើកិច្ចការមួយនេះ។ វាត្រូវការចក្ខុវិស័យច្បាស់លាស់ ខិតខំប្រឹងប្រែងព្យាយាម តស៊ូ អត់ធ្មត់ ភាពច្នៃប្រឌិត និងបត់បែនច្រើនដើម្បីគ្រប់គ្រងវា។ នេះជាអ្វីដែលអ្នកជំនួញនៅលើសាកលលោកបានដើរ និងកំពុងបន្តធ្វើវាតទៅមុខទៀត៕
ដោយ៖ ខេវិន
ប្រភព៖ Businessnewsdialy
