អនុវត្តគន្លឹះទាំង៥នេះ នឹងជួយឲ្យអ្នកមានគំនិតច្នៃប្រឌិតខ្ពស់!
គំនិតច្នៃប្រឌិត គឺពិតជាមានសារសំខាន់ខ្លាំងណាស់ សម្រាប់ធ្វើកិច្ចការផ្សេងៗ ជាពិសេសនោះការរកស៊ីតែម្តង។ ចំពោះអ្នកដែលមានគំនិតច្នៃប្រឌិតខ្ពស់ ពួកគេនឹងទទួលបានការចាប់អារម្មណ៍ខ្លាំងពីមនុស្សជុំវិញខ្លួន ដែលជំរុញឲ្យផែនការ ឬ ការងារដែលខ្លួនកំពុងធ្វើឆាប់សម្រេចបានលឿន ប្រកបទៅដោយលទ្ធផលល្អជាទីពេញចិត្ត។ ដើម្បីធ្វើឲ្យអ្នកមានគំនិតច្នៃប្រឌិតខ្ពស់ គួរអនុវត្តគន្លឹះសំខាន់ៗទាំងនេះ៖
១) រៀនធ្វើការជាក្រុម៖ មនុស្សម្នាក់ បើទោះបីជាមានភាពឆ្លាតវៃខ្ពស់តាំងពីកំណើតប៉ុណ្ណាក្តី ប៉ុន្តែវានៅតែមានដែនកំណត់។ ប៉ុន្តែប្រសិនបើគេធ្វើការជាមួយមនុស្សផ្សេងៗទៀតក្នុងក្រុមវិញ នោះវានឹងជួយឲ្យគំនិតថ្មីៗផុសឡើងជាបន្តបន្ទាប់ តាមរយៈការផ្តល់យោបល់ ការពិភាក្សា និង ការស្រាវជ្រាវជុំគ្នាជាដើម ព្រោះមនុស្សម្នាក់ៗសុទ្ធតែមានគំនិតផ្សេងៗពីគ្នា ដូច្នេះហើយ អ្នកអាចចាប់យកគំនិតរបស់អ្នកដទៃក្នុងក្រុមនោះ ច្នៃបង្កើតចេញជាអ្វីមួយដែលថ្មី និង ប្លែក។ ការរៀនធ្វើការជាក្រុមនេះ ពិតជាអាចជួយឲ្យអ្នកមានគំនិតច្នៃប្រឌិតខ្ពស់ ដែលមិនគួរមើលរំលងឡើយ។
២) ធ្វើអ្វីដែលអ្នកពេញចិត្ត៖ មិនថា ការងារនោះពិបាកប៉ុណ្ណាទេ ប៉ុន្តែប្រសិនបើអ្នកពិតជាពេញចិត្តមែន នោះដំណោះស្រាយគឺនៅតែមានជានិច្ច។ វាជាផ្នែកមួយដែលជួយឲ្យអ្នក មានគំនិតច្នៃប្រឌិតផងដែរ ព្រោះកាលណាធ្វើអ្វីដែលខ្លួនពេញចិត្តនោះ គឺប្រាកដជាព្យាយាមស្វែងរកអ្វីដែលថ្មីៗ និង មានប្រយោជន៍ដើម្បីសម្រេចការងារនោះ។ ដូច្នេះហើយ គួរធ្វើអ្វីដែលខ្លួនពេញចិត្តប្រសើរជាង ធ្វើអ្វីមួយដើម្បីគ្រាន់តែផ្គាប់ចិត្តអ្នកដទៃ។ ប្រសិនបើមិនដូច្នោះទេ អ្នកនឹងមិនអាចអភិវឌ្ឍគំនិតរបស់ខ្លួនឲ្យកាន់តែប្រសើរនោះឡើយ ព្រោះថា អ្វីដែលកំពុងធ្វើគឺគ្រាន់តែធ្វើឲ្យតែរួចពីដៃ ជាមួយនឹងអារម្មណ៍ធុញទ្រាន់ប៉ុណ្ណោះ។
៣) ស្តាប់យោបល់ពីអ្នកដទៃ៖ គ្មានមនុស្សណាដែលល្អគ្រប់ដប់នោះទេ ពោលគឺតែងតែមានបញ្ហាជៀសមិនផុត។ក្នុងស្ថានភាពនេះ ប្រសិនបើអ្នកព្យាយាមធ្វើតែតាមគំនិតរបស់ខ្លួនទាំងស្រុង ដោយមិនស្តាប់យោបល់ ឬ គំនិតរបស់អ្នកដទៃទេ នោះមានន័យថា អ្នកមិនបើកឱកាសដល់ខ្លួនឯងក្នុងការទទួលយកគំនិតថ្មីៗដែលអ្នកប្រហែលជាមិនអាចគិតដល់។ ក្នុងន័យនេះ មិនមែនមានន័យថា អ្នកត្រូវធ្វើតាមគំនិតរបស់អ្នកដទៃនោះទេ ប៉ុន្តែត្រូវស្តាប់គេក្រែងមានអ្វីដែលថ្មី និង មានប្រយោជន៍ដល់ការគិតរបស់អ្នក។
៤) ធ្វើដំណើរទៅកន្លែងផ្សេងៗ៖ ប្រសិនបើអ្នកនៅតែមួយកន្លែង ដោយមិនព្រមទៅណានោះ វានឹងធ្វើឲ្យមានអារម្មណ៍ថា តានតឹង និងលែងមានគំនិតអ្វីថ្មីទៀតហើយ។ ប៉ុន្តែសម្រាប់អ្នកដែលចូលចិត្តដើរកម្សាន្តទៅកាន់កន្លែងផ្សេងៗនោះ វាជួយឲ្យអ្នកជួបអ្វីដែលថ្មីៗ និង មានប្រយោជន៍សម្រាប់ការគិត។ ជាក់ស្តែងមានអ្នកជំនួញជាច្រើនបានធ្វើដំណើរទៅកាន់បរទេស ក្នុងគោលបំណង៖ទី១ គឺដើម្បីកម្សាន្ត និង ទី ២ដើម្បីជួបអ្វីដែលថ្មីៗសម្រាប់យកមកអនុវត្តរកស៊ីក្នុងប្រទេសវិញ។
៥) ឈប់គេចវេសពីបញ្ហា៖ ថ្វីត្បិតតែបញ្ហា គឺជាអ្វីដែលមនុស្សគ្រប់គ្នាមិនចង់ជួប ប៉ុន្តែវាជារឿងជៀសមិនផុតនោះឡើយ ព្រោះជាតែងផ្សារភ្ជាប់ជាមួយជីវិតរបស់មនុស្សម្នាក់ៗគ្រាន់តែតិច ឬ ច្រើនប៉ុណ្ណោះ។ ដូច្នេះហើយ ប្រសិនបើអ្នកជួបបញ្ហាអ្វីមួយ សូមកុំព្យាយាមរត់គេច ប៉ុន្តែត្រូវព្យាយាមដោះស្រាយឲ្យអស់ពីលទ្ធភាពទើបជាជម្រើសដ៏ល្អ។ ការព្យាយាមដោះស្រាយបញ្ហានេះ នឹងជួយឲ្យអ្នកមានភាពរឹងមាំក្នុងការគិត និងមានគំនិតថ្មីៗជានិច្ច ព្រោះថាបញ្ហាទាំងនោះគឺជាគ្រួដ៏សំខាន់ក្នុងការបណ្ដុះគំនិតរបស់អ្នក៕
ដោយ៖ អ៊ុន ភក្តី
