សញ្ញាសំខាន់ៗ៥យ៉ាង ដែលបញ្ជាក់ថា អ្នកមាននិស្ស័យធ្វើជំនួញពីធម្មជាតិ!
ចង់ក្លាយជាបុគ្គលជោគជ័យម្នាក់ ក្នុងវិស័យជំនួញមិនមែនជារឿងងាយស្រួលនោះឡើយ ព្រោះវាទាមទារនូវចំណុចសំខាន់ៗជាច្រើន។ ក្នុងនោះដែរ មនុស្សមួយចំនួនគ្មាននិស្ស័យក្នុងការរកស៊ីនោះឡើយ ដូច្នេះទោះបីជាមានឱកាសល្អ និង មានការលើកស្ទួយពីក្រុមគ្រួសារប៉ុណ្ណាក៏ដោយ ក៏មិនអាចជោគជ័យជាដុំកំភួននោះដែរ។
ចំណែកអ្នកខ្លះវិញ គឺមានទេពកោសល្យ និង និស្ស័យពីធម្មជាតិតែម្តង ជាហេតុនាំឲ្យពួកគេអាចជោគជ័យខ្លាំងក្នុងវិស័យជំនួញ ទោះបីជាមានបញ្ហាជាច្រើនកើតឡើងក៏ដោយ។ ខាងក្រោមនេះ ជាសញ្ញាសំខាន់ៗដែលបញ្ជាក់ថា អ្នកកើតមកមាននិស្ស័យខ្លាំងក្នុងការជំនួញ៖
១) ចូលចិត្តផ្តើមគំនិត៖ អ្នករកស៊ីចំណាន គឺត្រូវតែជាមនុស្សដែលមានគំនិតថ្មីៗដែលខ្លួនរកឃើញ និង មិនធ្វើអ្វីដែលចម្លងតាមគេទាំងស្រុងនោះឡើយ ព្រោះមនុស្សទាំងអស់ត្រូវតែអ្វីដែលថ្មី និង ប្លែក ហើយមានប្រយោជន៍សម្រាប់ការរស់នៅជាក់ស្តែងរបស់ពួកគេ។ ដូច្នេះហើយ បើអ្នកជាមនុស្សដែលតែងមានគំនិតថ្មីៗ ក្នុងការធ្វើកិច្ចការផ្សេងៗមានន័យថា អ្នកមាននិស្ស័យក្នុងការរកស៊ីហើយ។
២) មានគោលដៅច្បាស់លាស់៖ ក្នុងការធ្វើជំនួញ គឺត្រូវតែមានគោលដៅច្បាស់លាស់ បើមិនដូច្នោះទេ អ្នកនឹងត្រូវបរាជ័យមិនខាន ព្រោះមានឧបសគ្គជាច្រើនដែលកើតមាន។ ប្រសិនបើអ្នកជាមនុស្សដែល មានគោលដៅច្បាស់លាស់ និង មិនដែលរារែកចំពោះអ្វីដែលខ្លួនចង់ធ្វើនោះ វាជាសញ្ញាមួយបញ្ជាក់ថា អ្នកសមជាបុគ្គលជោគជ័យក្នុងវិថីជំនួញ។
៣) មានសិល្បៈក្នុងការដឹកនាំមនុស្ស៖ ដើម្បីធ្វើជំនួញប្រកបដោយជោគជ័យ មិនមែនមានន័យថា អ្នកត្រូវចេះគ្រប់យ៉ាងនោះទេ ព្រោះមនុស្សមិនអាចមានលទ្ធភាពធ្វើបែបនេះឡើយ ប៉ុន្តែអ្វីដែលសំខាន់នោះ គឺសិល្បៈក្នុងការដឹកនាំ និង ប្រើប្រាស់មនុស្ស។ សិល្បៈដឹកនាំមនុស្សជារឿងសំខាន់បំផុត ព្រោះថា អ្នកអាចធ្វើឲ្យមនុស្សដែលមានសមត្ថភាពជួយធ្វើការងារឲ្យអ្នកយ៉ាងអស់ពីចិត្ត នាំឲ្យការងាររកស៊ីរីកចម្រើនទៅមុខជាបន្តបន្ទាប់។
៤) ពូកែទំនាក់ទំនង៖ និយាយអំពីការរកស៊ី គឺមិនអាចមិននិយាយអំពីការទំនាក់ទំនងនោះឡើយ ព្រោះពេលខ្លះមិនមែនដោយសារតែផលិតផល ឬ សេវាកម្មរបស់អ្នកល្អជាងគូប្រជែងនោះទេ ប៉ុន្តែចំណុចពិសេសនោះ គឺអ្នកពូកែទំនាក់ទំនងដែលនាំឲ្យអតិថិជននឹកឃើញដល់អ្នកមុនគេ។
៥) មានភាពអត់ធ្មត់ខ្ពស់៖ ជោគជ័យក្នុងការធ្វើជំនួញ មិនមែនគ្រាន់តែនិយាយ និង ធ្វើធម្មតា អាចសម្រេចនោះឡើយ ពោលគឺទាល់តែមានការខិតខំខ្លាំង ហើយក៏ត្រូវតែមានភាពអត់ធ្មត់ផងដែរ។ ដូច្នេះហើយ ការអត់ធ្មត់ គឺជាចំណុចសំខាន់ដែលត្រូវតែមាន ព្រោះមិនមែនគ្រប់យ៉ាងអាចកើតឡើងតាមការចង់បាននោះឡើយ ពោលគឺពេលខ្លះវាទាមទារពេលវេលាសមស្រប៕
ដោយ៖ រតនា វិចិត្រ
