រឿងល្អទាំង៥យ៉ាងនេះនឹងកើតឡើង ប្រសិនបើអ្នកធ្វើការនៅក្រុមហ៊ុនដែលទើបបើកថ្មី
មនុស្សជាច្រើន តែងប្រាថ្នាចង់ធ្វើការនៅក្រុមហ៊ុនធំៗ និង ល្បីដើម្បីទទួលបានប្រាក់ខែខ្ពស់ និង មានមុខមាត់នៅក្នុងសង្គម ដូច្នេះហើយអ្នកទាំងនោះហាក់មិនសូវចង់ធ្វើការនៅក្រុមហ៊ុនដែលទើបនឹងបើកថ្មី ជាពិសេសមានលក្ខណៈតូចតាចនោះឡើយ។ ប៉ុន្តែបើនិយាយបែបផ្សេង ការធ្វើការនៅក្រុមហ៊ុនដែលទើបនឹងបើកថ្មី គឺពិតជាមានរឿងល្អដែលអ្នកប្រហែលជាមិនធ្លាប់គិតឃើញនោះឡើយ។
ខាងក្រោមនេះ គឺជាចំណុចល្អៗជាច្រើននៅពេលអ្នកធ្វើការនៅក្រុមហ៊ុនទើបនឹងបើកថ្មី៖
១) ជាកន្លែងហាត់ក្បាច់គុនចម្រុះ៖ នៅពេលអ្នកធ្វើកាន់តែច្រើនមុខ នោះអ្នកក៏កាន់តែចេះ និង ស្គាល់ការងារច្រើនផងដែរ។ ចំពោះការធ្វើការនៅក្រុមហ៊ុនធំៗវិញ គឺអ្នកធ្វើតែមួយផ្នែកប៉ុណ្ណោះ ព្រោះក្រុមហ៊ុននោះគេរៀបចំជាប្រព័ន្ធស្រេចទៅហើយ។ ប៉ុន្តែសម្រាប់ក្រុមហ៊ុនថ្មោងថ្មីវិញ គឺមិនទាន់រៀបចំអ្វីជាប្រព័ន្ធច្បាស់លាស់នៅឡើយ។ ថ្វីត្បិតតែមើលទៅក្រុមហ៊ុនថ្មី ហាក់ដូចជាផ្តល់ភាពស្មុគស្មាញដល់អ្នក ប៉ុន្តែវានឹងផ្តល់ចំណេះដឹងគ្មានដែនកំណត់ដល់អ្នក ជាពិសេសវាជាកន្លែងដែលអ្នកអាចហាត់ក្បាច់គុណចម្រុះជាច្រើន ដើម្បីសាងអនាគតនៅពេលខាងមុខ។
២) បណ្ដុះភាពតស៊ូក្នុងការងារ៖ ជាធម្មតាទេ ចំពោះក្រុមហ៊ុនថ្មីប្រាកដជា មានការងារជាច្រើនដែលត្រូវការរៀបចំ និង បំពេញឲ្យបានល្អ ដូច្នេះវាទាមទារឲ្យបុគ្គលិកទាំងអស់មានការអត់ធ្មត់ និង តស៊ូក្នុងការងារ។ ចំពោះអ្នកដែលធ្វើការនៅក្រុមហ៊ុនបែបនេះ ចង់មិនចង់គឺត្រូវតែធ្វើការច្រើន ហើយក៏តែចេះតស៊ូដែរ ព្រោះបើមិនដូច្នោះទេ ប្រាកដជាលាឈប់ពីការងារមិនខាន។
៣) បង្កើតទម្លាប់ប្រឹងប្រែងអស់សមត្ថភាព៖ ពេលខ្លះ មនុស្សមិនទទួលបានជោគជ័យ គឺមិនមែនដោយសារតែខ្សោយនោះទេ ប៉ុន្តែដោយសារតែពួកគេគ្រាន់តែធ្វើលំៗឲ្យតែរួចពីដៃ។ ការមិនប្រឹងប្រែងនេះហើយ ដែលជាចំណុចមួយពិបាកនាំឲ្យសម្រេចការងារ។ ចំពោះក្រុមហ៊ុនថ្មីៗទាំងឡាយ គឺអាចប្រឈមមុខនឹងការដួលរលំទៅវិញដោយងាយបំផុត ប្រសិនបើគ្រប់គ្នានៅក្នុងក្រុមហ៊ុនមិនប្រឹងប្រែងឲ្យអស់ពីសមត្ថភាពទេនោះ។ ដូច្នេះហើយ នៅពេលអ្នកឈានជើង ចូលក្នុងក្រុមហ៊ុនប្រភេទនេះអ្នកនឹងបង្កើតការប្រឹងប្រែងឲ្យអស់ពីសមត្ថភាព ដើម្បីធ្វើឲ្យសម្រេចអ្វីដែលចង់បានមិនខាន។
៤) យល់ច្បាស់អំពីតម្លៃនៃការងារក្រុម៖ ក្រុមហ៊ុនមួយដែល គ្មានការសហការគ្នាបានល្អទេ ប្រាកដជាមិនអាចដំណើរការទៅបានដោយរលូនឡើយ ពោលគឺប្រាកដជាត្រូវបរាជ័យនៅពេលណាមួយមិនខាន។ សម្រាប់ក្រុមហ៊ុនថ្មីវិញគឺរឹតតែមិនអាចខ្វះនូវការសហការគ្នារវាងសមាជិកក្រុមទាំងអស់នោះឡើយ បើមិនដូច្នេះទេប្រាកដជាដួលឆាប់មិនខាន។ ដូច្នេះហើយនៅពេលអ្នកធ្វើការឲ្យក្រុមហ៊ុនដែលទើបនឹងបើកថ្មី អ្នកនឹងយល់ច្បាស់អំពីតម្លៃនៃការងារក្រុមមិនខាន។
៥) ឆាប់ឡើងបុណ្យសក្តិ៖ នៅពេលក្រុមហ៊ុនដែលទើបនឹងបើកថ្មីនោះ ប្រាកដជាមានកន្លែងទំនេរជាច្រើនដែលរងចាំអ្នកមានសមត្ថភាពមកកាន់កាប់ ជាពិសេសទៀតនោះនៅពេលដែលក្រុមហ៊ុនស្គាល់ការរីកចម្រើន។ ចំពោះបុគ្គលិកថ្នាក់ខ្ពស់វិញ ក្រុមហ៊ុនពិតជាត្រូវការអ្នកដែលស្គាល់ការងារក្រុមហ៊ុនច្បាស់លាស់ ព្រោះបើរើសយកអ្នកដែលមិនដែលស្គាល់ ឬ មិនដែលធ្វើការនៅក្រុមហ៊ុននោះ ប្រាកដជាត្រូវចំណាយពេលវេលាយូរទើបអាចយល់អំពីការងារបាន។ ដូច្នេះ បុគ្គលិកដែលធ្វើការនៅក្រុមហ៊ុនប្រភេទនេះ ងាយនឹងឡើងបុណ្យសក្តិណាស់ ជាពិសេសអ្នកដែលមានសមត្ថភាព៕
ដោយ៖ អ៊ុន ភក្តី
ប្រភព៖ www.lifehack.org & www.fastcompany.com
