ចំណុចគោលទាំង៥ ដែលអ្នកត្រូវគិតឲ្យច្បាស់សិន មុនពេលសម្រេចចិត្តរកស៊ី ដើម្បីកុំឲ្យមានវិប្បដិសារីធ្ងន់ធ្ងរថ្ងៃក្រោយ
ថ្វីត្បិតតែ គោលដៅនៃការរកស៊ីគឺដើម្បីទទួលបានប្រាក់ចំណេញច្រើន និង រីកចម្រើនពីមួយឆ្នាំទៅមួយឆ្នាំនោះ តែវាមិនមែនជារឿងងាយឡើយ ហើយមានមនុស្សក៏មិនតិចដែរ ដែលបរាជ័យហើយបាក់ស្បាត និង មានវិប្បដិសារីដោយសារតែការរកស៊ីបរាជ័យ។ ដូច្នេះហើយដើម្បីបញ្ចៀសបញ្ហា អ្នកគួរត្រៀមខ្លួនឲ្យរួចរាល់សិន៖
១) បទពិសោធន៍ និង ជំនាញ៖
សូមកុំគិតថា ការងាររកស៊ីងាយស្រួលដូចការគិតឲ្យសោះ ព្រោះបើមិនមានបទពិសោធន៍ និង ជំនាញច្បាស់លាស់នោះទេ គឺប្រៀបដូចជាយកលុយទៅចាក់ចោលអ៊ីចឹង។ ដូច្នេះហើយចំណុចសំខាន់ដែលអ្នក ត្រូវតែដឹងច្បាស់ពីខ្លួនឯងនោះ ថាតើខ្លួនមានបទពិសោធន៍ និង ជំនាញផ្នែកអាជីវកម្មនោះហើយឬនៅ ដើម្បីកុំឲ្យស្ដាយក្រោយ និង បាក់ស្បាតថ្ងៃក្រោយ។
២) ដើមទុន៖
បើមានតែគំនិត និង បទពិសោធន៍ តែ ខ្វះដើមទុននោះក៏មិនស្រួលដែរ ព្រោះក្នុងពេលដំណើរការអាជីវកម្មនោះ គឺតែងតែមានការចំណាយ ជាពិសេសក្នុងរយៈពេលប៉ុន្មានខែដំបូងៗ គឺពិបាកក្នុងការរកចំណូលខ្លាំងណាស់។ ត្រូវតែសន្សំឬ រកវិធីយ៉ាងណាដើម្បីប្រាកដថា ដើមទុនរបស់អ្នកគឺសមរម្យ ដើម្បីអាចដំណើរការ និង អាចទប់ទល់ក្នុងរយៈពេលមួយដែលមិនទាន់រកចំណូលបាន។
៣) ផលិតផល ឬ សេវាកម្មដែលថ្មី ឬ ប្លែកពីគេ
ក្នុងជំហានក្នុងការរកស៊ី និង ការដើរចូលក្នុងទីផ្សារនោះ វាទាមទារឲ្យមានផលិតផល ឬសេវាកម្មដែលថ្មី និង ប្លែកពិសេសជាងក្រុមហ៊ុនផ្សេងៗទៀត ដើម្បីទាក់ទាញ់ការចាប់អារម្មណ៍របស់អតិថិជន។ បើអ្នកមិនទាន់រកឃើញទេ ហើយគ្រាន់តែចង់រកស៊ីដែលចម្លងតាមគេទាំងស្រុងនោះប្រាកដជា ងាយនឹងបរាជ័យខ្លាំងណាស់។
៤) ការអត់ធ្មត់៖
ដូចដែលបានលើកឡើងហើយថា ការរកស៊ីមិនចេះតែស្រួលដូចការគិតនោះឡើយ ដូច្នេះហើយ ត្រូវតែរៀនអត់ធ្មត់ និង តស៊ូឲ្យខ្លាំងបំផុត ទើបអាចជោគជ័យ។ មនុស្សជាច្រើនជ្រួលជ្រើមចង់រកស៊ីខ្លាំងណាស់ ប៉ុន្តែនៅពេលជួបការលំបាកបន្តិចបន្តួច ក៏បាក់ទឹកចិត្ត ហើយសម្រេចចិត្តបោះបង់ទៅវិញ។
៥) ត្រៀមចិត្តឲ្យបានប្រសិនបើបរាជ័យ៖
វាជាចំណុចសំខាន់បំផុតមួយដែល អ្នកត្រូវតែគិត និង ត្រៀមខ្លួនឲ្យហើយ ព្រោះថា អ្វីៗគឺមិនអាចមើលដឹងនោះឡើយ។ ដូច្នេះបើបរាជ័យមែន អ្នកត្រូវគិតថា វាជាបទពិសោធន៍សំខាន់មួយសម្រាប់ជីវិត ដើម្បីរកឃើញផ្លូវជោគជ័យនៅថ្ងៃក្រោយ។ បើអ្នកមិនត្រៀមបែបនេះទេ អ្នកនឹងបាក់ស្បាតនៅថ្ងៃក្រោយពេល ហើយលែងចង់ធ្វើអ្វីទៀតហើយ៕
ដោយ៖ អ៊ុន ភក្តី
