ត្រូវហ៊ានលះបង់ ៣យ៉ាងនេះសិន មុនពេលបោះជំហានជោគជ័យក្នុងវិស័យជំនួញ
កិច្ចការជំនួញមិនមែនជារឿងងាយស្រួល ដូចការគិតនោះឡើយ ព្រោះបើវាងាយស្រួលនោះ ប្រហែលជាគ្រប់គ្នាសុទ្ធតែជាសេដ្ឋីអស់ហើយ។ មុននឹងឈានទៅដល់ភាពជោគជ័យនៃការរកស៊ី ទាល់តែមានការលះបង់ខ្ពស់ណាស់ ព្រោះថា ក្នុងពេលដំណើរការនោះមិនដឹងថា ត្រូវប្រឈមនឹងបញ្ហាអ្វីខ្លះនោះទេ។ ខាងក្រោមនេះ គឺជាចំណុចសំខាន់ៗមួយចំនួន ដែលលោកអ្នកត្រូវហ៊ានលះបង់ ដើម្បីជោគជ័យនៅពេលខាងមុខ៖
១) ប្រាក់ចំណូលក្នុងគ្រាដំបូង
រាល់អាជីវកម្មថ្មីថ្មោងទាំងអស់ សុទ្ធតែត្រូវប្រឈមនឹងការពិបាកចំពោះការទទួលបានប្រាក់ចំណូលក្នុងរយៈពេលដំបូងៗ នៃដំណើរការ។ មនុស្សភាគច្រើន មានអារម្មណ៍មិនសូវជាស្ងប់ប៉ុន្មានទេ ព្រោះពួកគេធ្លាប់ទទួលបានប្រាក់ចំណូលប្រចាំខែតាមរយៈការងាររបស់ខ្លួន ហើយនៅពេលបោះបង់ការងារដោយងាកមករកស៊ី តែមិនទាន់ឃើញផលចំណេញ។ ក្នុងស្ថានភាពនេះ អ្នកត្រូវតែស៊ូទ្រាំឲ្យបាន ព្រោះថា នេះគឺជាដំណាក់កាលដ៏សំខាន់មួយ ក្នុងការឈានទៅរកភាពជោគជ័យ។ បើមិនអាចស៊ូទ្រាំនឹងការលះបង់ប្រាក់ចំណូលទាំងនេះទេ នោះអ្នកមិនអាចឲ្យការខិតខំរបស់អ្នកសម្រេចគោលដៅនោះឡើយ ដូច្នេះហើយត្រូវតែទ្រាំឲ្យបាន។
២) ពេលវេលា
កាលពីធ្វើការឲ្យគេ លោកអ្នកប្រាកជាធ្វើការបន់ឲ្យតែដល់ម៉ោងប៉ុណ្ណោះដើម្បី សម្រាក។ ប៉ុន្តែពេលបើកអាជីវកម្មខ្លួនឯង អ្នកមិនអាចធ្វើបែបនេះទៀតឡើយ។ ពេលវេលាគឺពិតជាសំខាន់ខ្លាំងណាស់ ព្រោះវាមិនដែលរង់ចាំនណាម្នាក់ឡើយ។ ដូច្នេះហើយ លោកអ្នកត្រូវតែហ៊ានលះបង់ពេលវេលាផ្ទាល់ខ្លួន ដើម្បីធានាថា អាជីវកម្មថ្មីរបស់អ្នក ដំណើរការទៅ ប្រកបដោយភាពវិជ្ជមាន។
៣) ការខាតបង់
មិនមែនរាល់អាជីវកម្មថ្មីថ្មោងទាំងអស់ សុទ្ធតែជោគជ័យដូច ការគ្រោងទុកនោះឡើយ ព្រោះគ្មានអ្វីដែលអាចទាយទុកបានជាមុនឡើយ។ ក្នុងស្ថានភាពនេះ លោកអ្នកដែលចង់បើកអាជីវកម្មទាំងឡាយ ត្រូវតែត្រៀមចិត្តត្រៀមកាយឲ្យហើយ មុននឹងសម្រេចចិត្តឈានជើងក្នុងវិស័យជំនួញ។ ការត្រៀមខ្លួនជាស្រេច ដើម្បីប្រឈមនឹងការខាតបង់នេះ គឺ ដើម្បីឲ្យចិត្តរបស់អ្នក មិនបោះបង់ក្តីសុបិនរបស់ខ្លួនដោយងាយ ជាពិសេសនៅពេលខាតបង់ ឬ បរាជ័យ៕
ដោយ៖ BizKhmer
