ចំពោះអ្នកស្រលាញ់សត្វ អាចពិចារណាគំនិត Startup មួយចំនួនដើម្បីរកប្រាក់ចំនូលបាន
គ្រួសារមួយចំនួនចាត់ទុកសត្វចិញ្ចឹមដូចជាសមាជិកគ្រួសាររបស់ខ្លួន ទាំងការផ្តល់ចំណី ទាំងការស្រលាញ់ ការថែទាំ និងមនោសញ្ចេតនា។
ដោយសារការស្រលាញ់នេះដែរ វាក៏អាចជួយអ្នកឲ្យប្រាក់ចំនូលបានដូចគ្នាតាមរយៈអាជីវកម្មបែបតូចៗ ឬជា startup មួយចំនួនគួរឲ្យចាប់អារម្មណ៍ដូចខាងក្រោមនេះ៖
១) សេវាកម្មបង្ហាត់បង្រៀនសត្វ
វាជារឿងដ៏អស្ចារ្យមួយដែលសត្វស្រុក និងបក្សីមួយចំនួនមានខួរក្បាលឆ្លាតវៃអាចឲ្យយើងបង្ហាត់បង្រៀនពួកវាបាន វាមិនមែនសម្រាប់តែការកំសាន្តសប្បាយរបស់យើងទេតែបើយើងយកវាមកចិញ្ចឹម វារស់នៅជាមួយយើង វាមិនខុសពីគ្រួសាររបស់យើងទេ។ ពេលវាចេះស្តាប់បង្គាប់មានទម្លាប់ក្នុងការរស់នៅ វានឹងមិនបង្កភាពរញ៉េរញ៉ៃក្នុងផ្ទះឡើយ។ លើសពីនេះបើអ្នកមានសមត្ថភាពអាចបង្ហាត់លើជំនាញបន្ថែមទៅដល់សត្វចិញ្ចឹមទាំងនោះទៀតអ្នកអាចទទួលបានចំនូលកាន់តែច្រើនដូចគ្នា។
២) កន្លែងថែទាំប្រចាំថ្ងៃសម្រាប់សត្វចិញ្ចឹម មានមនុសុ្សមួយចំនួនដែលចិញ្ចឹមសត្វ ពិសេសសុនខ ឆ្មា ទន្សាយ ឬបក្សីតូចធំមួយចំនួនគាត់ប្រហែលជាត្រូវការសេវាមើលថែទាំប្រចាំថ្ងៃដល់សត្វចិញ្ចឹមរបស់គាត់។ អ្នកអាចនឹងឆ្ងល់ថាអ្នកស្រលាញ់សត្វបែរជាត្រូវការសេវាថែទាំប្រចាំថ្ងៃវិញ? ពិតណាស់ពួកគាត់ភាគច្រើនអាចជាអ្នកធ្វើការ ហើយគាត់នៅផ្ទះតែម្នាក់ឯង ដូច្នេះពេលថ្ងៃគាត់គ្មានពេលមើលថែទាំសត្វចិញ្ចឹមពួកគាត់ទេ ក៏រឹតតែមិនអាចយកពួកវាទៅធ្វើការជាមួយដែរ។ ជម្រើសល្អបំផុតគឺស្វែងរកសេវាកម្មមើលថែទាំប្រចាំថ្ងៃមួយនេះឯង។
៣) ហាងលក់ចំណីសត្វ និងផលិតផលរក្សាសុខភាពសត្វ សម័យនេះមានការនាំចូលសត្វចិញ្ចឹមពីបរទេសច្រើន ការចិញ្ចឹមសត្វក្នុងប្រទេសក៏មានច្រើន ការយកចិត្តទុកដាក់លើការថែទាំសត្វក៏កាន់តែយល់ដឹងច្រើន។ ហេតុដូចនេះការផ្គត់ផ្គង់ផលិតផលទាំងនេះក៏កំពុងត្រូវបានចាប់អារម្មណ៍ និងទទួលការគាំទ្រខ្លាំងបន្តិចម្តងៗដូចគ្នា៕
ដោយ៖ យ៉ាយ៉ា
ប្រភព៖ BusinessBlogs
