Startup ថ្មី​មួយ​បាន​ឆ្លើយ​តប​ទៅនឹងតម្រូវអ្នក​ធ្វើដំណើរ​ដែល​មាន​ប្រាក់​គួរ​សម​​ អាចចំណេញ​ពេល​ធ្វើ​ដំណើរ​ទៅទីក្រុង​ធំៗក្នុងប្រទេសហ្វីលីពីនតាមរយៈការជិះ​ឧទ្ធម្ភាគចក្រទៅ។

ក្រុមហ៊ុន Ascent Flights Global Pte នឹងចាប់​ផ្តើម​សេវាកម្ម​របស់​ខ្លួន​ក្នុង​ប្រទេស​ហ្វី​លីពីន​សប្តាហ៍​ក្រោយ ហើយក្រុមហ៊ុននេះ​មានគម្រោង​ពង្រីក​ទៅ​ប្រទេស​ថៃ ឥណ្ឌូ​ណេស៊ី និង​ម៉ាឡេស៊ី​នៅ នាឆ្នាំ​ក្រោយថែមទៀតផង។

ក្រុម​ហ៊ុន​ដែល​មាន​មូល​ដ្ឋាន​នៅ​សិង្ហ​បុរី​មួយ​នេះនឹង​អនុញ្ញាតឲ្យ​អតិថិជនរបស់ខ្លួន​ធ្វើ​ការ​កក់​កន្លែង​សំបុត្រ​តាម​អន​ឡាញ​សម្រាប់​ការ​ហោះ​ហើរអំឡុង​ពេលនៅ​ពេល​ព្រឹក និងពេល​​រសៀល។ អ្នកដំណើរ​ថ្នាក់​ខ្ពស់​នឹងធ្វើ​ដំណើរ​តាម​ឧទ្ធម្ភាគចក្រទៅ​កាន់​ទីក្រុ​ង Makati និង Taguig ដែលជាមជ្ឍ​មណ្ឌល​ពាណិជ្ជកម្ម​ ក៏​ដូចជា​ព្រលាន​យន្ត​ហោះ​នៅ​ទីក្រុង Manila និង​ Clark ភាគ​ខាង​ជើង​រដ្ឋធានី។

ការ​ហោះ​ហើររយៈ​ចម្ងាយ​ជិតដោយ​ឆ្លង​កាត់​តំបន់​ពាណិ​ជ្ជកម្ម (two business districts) ២ នឹង​អាច​កាត់បន្ថយ​ការ​ចំណាយ​ពេលចាប់ពី​កន្លះ​ម៉ោងមក​នៅ​ត្រឹម​ ៣ នាទី ដោយ​សំបុត្រ​មួយ​តម្លៃ ៦,៩០០ប៉េសូ (១៣៣ដុល្លារ)។ ចំពោះ​ជើង​ហោះហើរ​ចម្ងាយ​ឆ្ងាយវិញ​ត្រូវឆ្លង​កាត់​ព្រលាន​យន្ត​ហោះ​ ២ (two airports) តម្លៃ​​​​សំ​បុត្រ​គឺ ២៥,៩០០ប៉េសូ ចំណាយពេល​ ៣០ នាទី នេះ​បើគិត​រយៈពេល​ធ្វើ​ដំណើរ​ធម្ម​តាគឺត្រូវ​ចំណាយ​ពេល ៣ ម៉ោង។

“យើងជឿថាការចំណាយពេលវេលាគឺមានភាពខុសគ្នាពី​ការ​ធ្វើ​ដំណើរ​លើ​ផ្លូវធម្ម​តា ចំពោះអ្នកដែលមានពេលវេលាមិនគ្រប់​គ្រាន់” នេះជា​ប្រសាសន៍​របស់​ស្ថាបនិក Ascent Flights។ បើ​វាទទួល​បាន​ជោគ​ជ័យ​នៅ ហ្វី​លី​ពីន​សម្រាប់​ការ​ផ្សង​ព្រេង​មួយ​នេះ Ascent នឹង​ចាប់​ផ្តើម​សេវាកម្ម​របស់​ខ្លួន​នៅទីក្រុង​ បាង​កក ហ្សាការតា និងកូ​ឡា​ឡាំ​ពួរ នៅឆ្នាំ​ ២០២០ ហើយ​ទី​ផ្សារ​បន្ទាប់ក្នុង​ការ​សម្លឹង​យក​គឺ​ ចិន​ និង​ជប៉ុន​។ ​​Startup នេះ​បាន​គាំទ្រ​ដោយ​ទុន​របស់​ក្រុម​ហ៊ុន​ REAPRA Pte និង​កំពុងសម្លឹងមើលការបង្កើនទុន​ចំនួន 3 លានដុល្លារទៅ 5 លានដុល្លារទៀតក្នុងរយៈពេលពីរឆ្នាំទៀតដើម្បីផ្តល់មូលនិធិដល់ការពង្រីកតំបន់៕

ដោយ៖ យ៉ាយ៉ា