ដឹង ១០ ចំណុចនេះហើយទើបដឹងថា សេដ្ឋកិច្ចរបស់អារ៉ាប៊ីសាអ៊ូឌីតពិតជាមិនធម្មតា
ព្រះរាជាណាចក្រអារ៉ាប៊ីសាអ៊ូឌីត ត្រូវបានបង្កើតឡើងជាផ្លូវការនៅឆ្នាំ ១៩៣២ ហើយគិតមកដល់ ពេលនេះ គឺមានរយៈពេលជិត ៩ ទសវត្សរ៍មកហើយ។ ក្នុងនាមជាមហាអំណាចប្រេង ប្រទេសនេះបានប្រែក្លាយមុខមាត់ជាប្រទេសអ្នកមាននិងមានធនធានធម្មជាតិដ៏ច្រើនមហាសាលបំផុតមួយនៅលើផែនដី។ ប្រាក់ចំណូលជាតិសរុបរបស់ខ្លួនស្ទើរតែទាំងស្រុងគឺបានពីចំណូលប្រេង និងឧស្ម័នធម្មជាតិថ្វីត្បិតតែនៅពេលបច្ចុប្បន្នខ្លួនកំពុងបោះជំហានយ៉ាងឆាប់រហ័សផ្ដោតទៅវិស័យសេដ្ឋកិច្ចដទៃទៀតដូចជាផលិតកម្មកសិកម្មក៏ដោយ។
ដោយសារតែប្រទេសនេះមានប្រវត្តិដ៏គួរឲ្យចាប់អារម្មណ៍ក្នុងវិស័យសេដ្ឋកិច្ច Bizkhmer សូមលើកយកចំណុចសំខាន់ៗចំនួន ១០ របស់ស្តេចប្រេងនៅក្នុងតំបន់មជ្ឈិមបូព៌ាមួយនេះដូចខាងក្រោម៖
១. គេវាយតម្លៃថា អារ៉ាប៊ីសាអ៊ូឌីតមានធនធានធម្មជាតិដែលមានតម្លៃរហូតដល់ទៅ ៣៤ ពាន់ពាន់លានដុល្លារ
អារ៉ាប៊ីសាអ៊ូឌីតត្រូវបានគេចាត់ទុកថា ជាប្រទេសដែលស្ថិតនៅលើគំនរប្រេងដែលមានប្រហែល ២០% នៃធនធានប្រេងបម្រុងសរុបនៅទូទាំងពិភពលោក ហើយវាជាប្រភពចំណូលដ៏សំខាន់របស់ខ្លួន។ ប្រទេសនេះក៏មានហាងលក់ស្ពាន់ ប្រាក់ និងធនធានមានតម្លៃជាច្រើនផ្សេងទៀតផងដែរ។
២. ក្រុមហ៊ុនដែលរកចំណូលបានច្រើនជាងគេបំផុតនៅលើពិភពលោក មានប្រភពមកពីអារ៉ាប៊ីសាអ៊ូឌីត
ជាមួយនឹងប្រាក់ចំណូល ១១១ ពាន់លានដុល្លារកាលពីឆ្នាំ ២០១៨ កន្លងទៅ ក្រុមហ៊ុនប្រេងយក្ស Saudi Aramco ត្រូវបានគេរាយការណ៍ថា ជាក្រុមហ៊ុនដែលរកប្រាក់ចំណូលបានច្រើនជាងគេបំផុតនៅលើពិភពលោក។ ប្រាក់ចំណូលរបស់ក្រុមហ៊ុនរដ្ឋមួយនេះគឺមានចំនួនច្រើនជាងប្រាក់ចំណូលរបស់ក្រុមហ៊ុន Apple ក្រុមហ៊ុន Amazon និង ក្រុមហ៊ុន Alphabet ដែលរកបានបូកបញ្ចូលគ្នាទៅទៀត។
៣. នៅខណៈពេលដែលប្រេងឆៅរួមចំណែកដល់ទៅ ៩០% នៃប្រាក់ចំណូលជាតិសរុប ធនធានមួយនេះត្រូវបានគេរកឃើញនៅលើទឹកដី របស់ខ្លួនចាប់ឆ្នាំ ១៩៣៨ មក
ថ្វីត្បិតតែអារ៉ាប៊ីសាអ៊ូឌីតជាស្តេចប្រេងធំជាងគេបំផុតលំដាប់ទី២នៅ លើពិភពលោកក៏ពិតមែន ប៉ុន្តែគេទើបនឹងរកឃើញប្រេងឆៅនៅក្នុងឆ្នាំ ១៩៣៨ មកតែប៉ុណ្ណោះ។ ក្រុមហ៊ុនដែលរុករកប្រេងមុនគេនៅលើទឹកដីនេះ គឺក្រុមហ៊ុនអាមេរិក Standard Oil ដែលបន្តគ្រប់គ្រងការផលិតប្រេងរហូតដល់ឆ្នាំ ១៩៨០ ទើបប្រគល់ឲ្យរាជវង្សអារ៉ាប៊ីសាអ៊ូឌីតមកកាន់កាប់ម្តង។
៤. អារ៉ាប៊ីសាអ៊ូឌីតឈរនៅក្នុងតំណែងទី៤ ជាប្រទេសដែលប្រជាជនមានប្រាក់ចំណូលខ្ពស់ជាងគេបំផុតក្នុងចំណោមប្រទេសផ្សេងៗទៀតនៅភាគខាងជើងតំបន់មជ្ឈិមបូព៌ា
ក្នុងនាមជាប្រទេសមានជាងគេបំផុតមួយនៅតំបន់មជ្ឈិមបូព៌ា អារ៉ាប៊ីសាអ៊ូឌីតឈរនៅក្នុងតំណែងទី៤ ជាប្រទេសដែលប្រជាជនមានប្រាក់ចំណូលខ្ពស់ជាងគេបំផុតក្នុងចំណោមប្រទេសផ្សេងៗទៀតតាមពីក្រោយ កាតារ គុយវ៉ែត និងអារ៉ាប់រួម។ គិតជាមធ្យម ប្រាក់ចំណូលរបស់ប្រជាជនខ្លួនគឺ ៥៤ ១០០ ដុល្លារក្នុងមួយឆ្នាំ។
៥. យ៉ាងណាមិញ អារ៉ាប៊ីសាអ៊ូឌីតជាប់ឈ្មោះជាប្រទេសដែលចំណាយប្រាក់លើវិស័យយោធាខ្ពស់ជាងគេបំផុតក្នុងចំណាត់ថ្នាក់ទី៣នៅលើពិភពលោក
អារ៉ាប៊ីសាអ៊ូឌីតត្រូវបានគេចាត់ទុកថា ជាប្រទេសដែលចំណាយប្រាក់លើវិស័យយោធាខ្ពស់ជាងគេបំផុតទី៣នៅលើពិភពលោកបន្ទាប់ពីអាមេរិក និងចិន។ រដ្ឋាភិបាលរបស់ខ្លួនហ៊ានចំណាយលើវិស័យយោធារហូតដល់ទៅ ១០% នៃទំហំ GDP សរុប ឬស្មើនឹង ៦៩ ពាន់លានដុល្លារគិតត្រឹមឆ្នាំ ២០១៨ កន្លងទៅនេះ ខណៈដែលអាមេរិកបានចំណាយរហូតដល់ទៅ ៦១០ ពាន់លានដុល្លារ ប៉ុន្តែស្មើនឹង ៣,១% នៃ GDP របស់ខ្លួនទាំងមូលតែប៉ុណ្ណោះ។
៦. យ៉ាងណាមិញ អារ៉ាប៊ីសាអ៊ូឌីតមិនទាន់ជាប់ឈ្មោះជាប្រទេសនាំចេញច្រើនជាងគេកំពូលៗបំផុត ទាំង ២០ នៅលើពិភពលោកនៅឡើយទេ
គិតត្រឹមឆ្នាំ ២០១៧ កន្លងទៅ អារ៉ាប៊ីសាអ៊ូឌីតឈរនៅលេខរៀងទី ២២ ជាប្រទេសដែលមានទំហំនាំចេញច្រើន ជាងគេបំផុតនៅលើពិភពលោកដែលមានតម្លៃសរុប ២៣១,៣ ពាន់លានដុល្លារ។ នេះបានធ្វើឲ្យខ្លួនឈរនៅពីក្រោយឥណ្ឌា ដែលមានទំហំនាំចេញ ២៩៩,៣ ពាន់លានដុល្លារ និងឈរនៅលើពីលើថៃដែលមានទំហំនាំចេញ ២២៨,២ ពាន់លានដុល្លារ។
៧. អារ៉ាប៊ីសាអ៊ូឌីតមានរោងចក្រផលិតទឹកដោះគោឆៅធំជាងគេបំផុតនៅលើពិភពលោក
អារ៉ាប៊ីសាអ៊ូឌីតមានរោងចក្រផលិតទឹកដោះគោឆៅធំជាងគេបំផុតនៅលើពិភពលោកដែលមានឈ្មោះថា Almarai។ គេបានវាយតម្លៃថា គោផលិតទឹកដោះប្រមាណ ៩៥ ០០០ ក្បាលមានវត្តមាននៅក្នុងកសិដ្ឋានក្រុមហ៊ុនមួយនេះដែលអាចផលិតទឹកដោះបាន ១ ពាន់លីត្រក្នុងមួយថ្ងៃៗ។
៨. គ្រាន់តែតំបន់ប្រេងមួយរបស់អារ៉ាប៊ីសាអ៊ូឌីត អាចផ្ទុកប្រេងស្មើនឹងទំហំអាងហែលទឹកអូឡាំពិកជាង ៤,៧៧ លាន
គ្រាន់តែ ប្រេងឆៅដែលស្ថិតនៅតំបន់ប្រេង Ghawar ត្រូវបានគេអះអាងថា មានផ្ទុកប្រេងឆៅដល់ទៅ ៧៥ ពាន់បារ៉ែល ពោលគឺស្មើនឹងទំហំអាងហែលទឹកអូឡាំពិក ៤ ៧៧០ ៨៩០ កន្លែងដែលអាងហែលទឹកនីមួយៗទាំងនោះអាចផ្ទុកប្រេងឆៅបាន ៦៦០ ២៥៣ កាឡុង (១ កាឡុងស្មើនឹង ៣,៧៨ លីត្រ)។
៩. អារ៉ាប៊ីសាអ៊ូឌីតមានប្រជាជនសរុប ៣៣ លាននាក់ និង ៦ លានអ្នកផ្សេងទៀតជាពលករបរទេស
ក្រុមហ៊ុនប្រេង និងឧស្សាហកម្មឧស្ម័ននៅក្នុងប្រទេសនេះភាគច្រើនបានជួលកម្លាំងពលកម្មមកពីក្រៅ ប្រទេសដែលមានរហូតដល់ទៅ ៦ លាននាក់។ នេះមានន័យថា ១៥% នៃប្រជាជនដែលរស់នៅក្នុងប្រទេសនេះគឺជាជនបរទេស។
១០. ទោះបីជាបែបនេះក្តី អារ៉ាប៊ីសាអ៊ូឌីតក៏ប្រឈមមុខទៅនឹងវិបត្តិគ្មានការងារធ្វើនៅក្នុងអត្រាមួយខ្ពស់ផងដែរ
ទោះបីជាជនបរទេសនាំគ្នាសម្រុកទៅធ្វើការនៅក្នុងវិស័យប្រេង ឧស្ម័ន និងរោងចក្រចម្រាញ់ប្រេងក្តី ក៏ប្រជាពលរដ្ឋរបស់ខ្លួនកំពុងប្រឈមទៅនឹងវិបត្តិគ្មានការងារដ៏រ៉ាំរ៉ៃមួយ។ នៅឆ្នាំ ២០១៨ កន្លងទៅ អត្រាគ្មានការងារធ្វើរបស់ប្រទេសនេះបានកើនឡើងដល់ ១២,៩% ឬស្មើនឹង ២ លាននាក់៕
ប្រភព៖ Businessinsider
