ហេតុផល ១០ ដែល​សហគ្រិន​ថ្មីថ្មោង​ ឬ ស្ថាបនិក Startup បើកអាជីវកម្ម​ហើយដួលទៅ​វិញ​



ជា​សារ​​មួយ​សម្រាប់​សហគ្រិន​ទាំងអស់​ត្រូវ​ដឹង​ថា ភាព​ជោគជ័យ​ក្នុង​អាជីវកម្ម ក៏​វា​មានន័យ​ស្មើ​នឹង​ការ​បរាជ័យ​ដែរ។ តើ​អ្នក​ជំនួញ​ប៉ុន្មាន​% ដែល​ជោគជ័យ​នៅ​ពេល​ចាប់​ផ្តើម​​អាជីវកម្ម​ដំបូង? បើ​យើង​តាម​របាយការណ៍​ស្រាវជ្រាវ​​នានា​បាន​បង្ហាញ​ថា ​ជា​ទូទៅ​នៅ​ក្នុង​រយៈពេល ៥​ឆ្នាំ​ដំបូង អត្រា​នៃ​ភាព​បរាជ័យ​មាន​ដល់ ៥០%។ នេះ​មានន័យ​ថា ឱកាស​ជោគជ័យ មាន​ ៥០%។ 

ប៉ុន្តែ​​ហេតុ​អ្វី​បាន​ជា​ឱកាស​​ជោគជ័យ​ ៥០%​​ នៅ​ក្នុង​រយៈពេល​៥​ឆ្នាំ​ដំបូង​​ដែល​នៅ​សេសសល់​ មាន​សហគ្រិន​តិចតួច​អាច​ដណ្តើម​​វា​បាន​? ខាងក្រោម​នេះ​គឺ​ជា​មូលហេតុ​សំខាន់ៗ​ចំនួន ១០ ដែល​ធ្វើ​ឲ្យ​សហគ្រិន​ថ្មីថ្មោង​បរាជ័យ​ទៅ​វិញ។ ​

១.មិន​សរសេរ​ផែនការ​អាជីវកម្ម
កុំ​ជឿ​លើ​​​​គំនិត​មួយ​ដែល​ថា មាន​ផែនការ​អាជីវកម្ម​មួយ​គឺ​មិន​ល្អ​ដូច​ការ​ខិតខំ​ប្រឹងប្រែង​​​របស់​អ្នក​​នោះ​ទេ។ គោលការណ៍​​នៃ​ការ​សរសេរ​ផែនការ​​អាជីវកម្ម​ គឺ​ជា​វិធី​ល្អ​បំផុត​ដើម្បី​ធ្វើ​​ឲ្យ​ប្រាកដ​ថា  អ្នក​ពិត​ជា​យល់​ពី​របៀប​ផ្លាស់ប្ដូរ​គំនិត​របស់​អ្នក​ទៅ​ជា​អាជីវកម្ម។

២.គ្មាន​ប្រាក់​ចំណូល​​តិចតួច ឬ​គ្មាន​សោះ​ត្រឡប់​មក​វិញ​
សូម្បីតែ​អង្គការ ឬ​ស្ថាប័ន​មិន​ស្វែងរក​ប្រាក់​ចំណេញ​ក៏​មាន​ផែនការ​ចំណូល​ចំណាយ​របស់​ខ្លួន​ច្បាស់លាស់​ដែរ។ ដូចនេះ​ប្រសិន​បើ​ផលិតផល​របស់​អ្នក​ផ្តល់​ជូន​ដោយ​ឥតគិតថ្លៃ ឬ​អ្នក​បាត់​ចំណូល​រាល់​លើក​ពេល​ដែល​អ្នក​លក់ អ្នក​នឹង​មាន​ហានិភ័យ​ជា​មិនខាន។  សូម​ចាំ​ថា នៅ​ពេល​អ្នក​មិន​អាច​ទាញ​លុយ​ចេញ​ពី​ហោប៉ៅ​របស់​អតិថិជន​បាន​ទេ​នោះ អាជីវកម្ម​របស់​អ្នក​មិន​អាច​រស់​​ទៅ មុខ​យូរអង្វែង​បាន​ឡើយ។

៣.ឱកាស​​ក្នុង​មុខ​ជំនួញ​មាន​ដែន​កំណត់
មិនមែន​សុទ្ធតែ​គំនិត​ល្អ​ទាំងអស់​អាច​ធ្វើ​ឲ្យ​អ្នក​បង្កើត​អាជីវកម្ម​មួយ​ជោគជ័យ​បាន​ទេ។ ​ ដោយសារតែ​អ្នក​ជឿជាក់​ថា​  ផលិតផល  ឬ​សេវាកម្ម​របស់​អ្នក​ពិត​ជា​អស្ចារ្យ ហើយ​គ្រប់គ្នា​ត្រូវការ​វា ​នោះ​​មិនមែន​មាន​ន័យ​ថា​ គ្រប់គ្នា​នឹង​ទិញ​វា​ពី​អ្នក​នោះ​ទេ។  អ្វីៗ​គឺ​ពឹង​​អាស្រ័យ​លើ​ការ​ស្រាវជ្រាវ​ទីផ្សារ ការ​ក្តោប​បាន​ព័ត៌មាន យុទ្ធសាស្ត្រ ឱកាស និង​គន្លឹះ​ផ្សេងៗ​ទៀត​ដែល​អ្នក​មាន​។

៤.មិន​អាច​អនុវត្ត​បាន
វា​ជា​រឿង​ដ៏​គួរឲ្យ​អស់សំណើច​ ​នៅ​ពេល​ដែល​អ្នក​គិត​ថា អ្នក​មាន​គំនិត ១ លាន​ដុល្លារ ហើយ​ថា វា​គ្រប់គ្រាន់​​ដែល​ធ្វើ​ឲ្យ​​អាជីវកម្ម​អ្នក​លេច​រូបរាង​ឡើង និង​​ជោគជ័យ។ សូម​បញ្ជាក់​ថា កុំ​គេង​ស្រមៃ​បែប​នេះ​អី! ជាក់ស្តែង​វា​អាស្រ័យ​ថា តើ​អ្នក​យក​វា​ទៅ​អនុវត្ត​បាន​ដែរ​ឬ​អត់? ប្រសិន​បើ​អ្នក​មិន​មាន​សមត្ថភាព​ក្នុង​ការ​សម្រេចចិត្ត​មួយ​ដ៏​ត្រឹមត្រូវ និង​ហ៊ាន​ប្រឈម​ទៅ​នឹង​ហានិភ័យ​ដែល​កើត​មាន​ឡើង​ទេ​នោះ ​អាជីវកម្ម​ដែល​​ជោគជ័យ នឹង​កាន់តែ​ឆ្ងាយ​ពី​ដៃ​របស់​អ្នក។

៥.មាន​គូប្រជែង​ច្រើន​ពេក
ប្រសិន​បើ​ទីផ្សារ​ជំនួញ​របស់​អ្នក​គ្មាន​គូប្រជែង​សោះ វា​គឺ​ជា​សញ្ញាណ​អវិជ្ជមាន​ ពីព្រោះ​បង្ហាញ​ថា មុខ​ជំនួញ​របស់​អ្នក​មាន​តម្រូវការ​​ទីផ្សារ​តិចតួច ឬ​គ្មាន​សោះ។ ប៉ុន្តែ​បើ​មុខ​ជំនួញ​របស់​អ្នក​កំពុង​មាន​ទីផ្សារ​ខ្ពស់​ ​ហើយ​មាន​គូប្រជែង​ខ្លាំងៗ​ច្រើន​​ជុំវិញ​អ្នក​ទៀត​នោះ ​វា​ជា​សញ្ញាណ​មួយ​បញ្ជាក់​ថា អ្នក​ត្រូវ​តែ​មាន​ចំណុច​ពិសេស​មួយ​លើស​គេ ប្លែក​ពី​គេ និង​ទាក់ទាញ​ជាងគេ បើ​មិន​ដូច្នេះ​ទេ អ្នក​នឹង​ស្លាប់។ ​​

៦.មុខ​ជំនួញ​គ្មាន​ស្តង់ដារ​ស្រប​តាម​ច្បាប់
ប្រសិន​បើ​អ្នក​រំពឹង​ថា​  នឹង​ស្វែងរក​អ្នក​វិនិយោគ​ ឬ​​រំពឹង​ថា​នឹង​មាន​ប្រៀប​​ក្នុង​ការ​​ប្រកួតប្រជែង​ ជា​លក្ខណៈ​យូរអង្វែង​នៅ​លើ​ទីផ្សារ​ជាមួយ​ក្រុមហ៊ុន​យក្ស​នៅ​ក្នុង​​វិស័យ​ណាមួយ ​អ្នក​ត្រូវតែ​ចុះ​​បញ្ជី​ក្រុមហ៊ុន​របស់​អ្នក​ដើម្បី​ទទួល​បាន​សិទ្ធិ​រកស៊ី​ពេញលេញ​ដូចជា​ ប័ណ្ណប៉ាតង់  ពាណិជ្ជសញ្ញា និង​កម្មសិទ្ធិ​បញ្ហា​​ជាដើម​ពី​ក្រសួង​ស្ថាប័ន​ដែល​ពាក់ព័ន្ធ។ ធ្វើ​បែប​នេះ​បង្ហាញ​ថា ក្រុមហ៊ុន​របស់​អ្នក​មាន​ស្តង់ដារ​ត្រឹមត្រូវ និង​អាច​ការពារ​ពី​ការ​រំលោភបំពាន​ណា​មួយ​ដូច​ជា​ការ​ប្រកួតប្រជែង​មិន​ស្មោះត្រង់​។ 

៧.ក្រុមការងារ​គ្មាន​បទពិសោធន៍​ច្បាស់លាស់ 
នៅ​ក្នុង​ការ​អនុវត្តិ​ជាក់ស្តែង អ្នក​វិនិយោគ​ត្រូវការ​មនុស្ស​ដែល​មាន​ធនធាន​ពិតប្រាកដ មិនមែន​ត្រឹមតែ​គំនិត​នោះ​ទេ។ អ្នក​វិនិយោគ​ចង់​មាន​​ក្រុម​ការងារ​ដែល​មាន​បទពិសោធន៍​ច្បាស់លាស់​​ក្នុង​ការ​ចាប់​ផ្តើម​​បង្កើត​ជំនួញ​​របស់​ខ្លួន។ ប្រសិន​បើ​អ្នក​មិន​មាន​បទពិសោធន៍​ទេ​នោះ អ្នក​គួរ​ស្វែងរក​ដៃគូ​ណា​ម្នាក់​ដែល​ធ្លាប់​ធ្វើ និង​កំពុង​ធ្វើ​​​ការងារ​ដែល​ទាក់ទង​ទៅ​នឹង​ជំនួញ​របស់​អ្នក​ដើម្បី​យក​មក​​ដាក់​ចូល​​ទៅ​ក្នុង​ក្រុម​ការងារ​របស់​អ្នក​។ 

៨.មើល​រំលង​លើ​តម្រូវការ​ធនធាន​ផ្សេងៗ
ធនធាន​សំខាន់​បំផុត​ដែល​អ្នក​ត្រូវ​មាន​ដើម្បី​ចាប់​ផ្តើម​អាជីវកម្ម គឺ​​ដើមទុន​។ ក៏ប៉ុន្តែ​ធនធាន​ដូច​ជា ការ​ធ្វើ​ទីផ្សារ ការ​ចំណាយ​លើ​ការ​​ផ្សព្វផ្សាយ និង​ការ​ចំណាយ​ផ្សេងៗ​ទៀត​ វា​អាច​មាន​សារសំខាន់​នៅ​ក្នុង​លក្ខខណ្ឌ​ណា​មួយ។ មាន​​ដើមទុន​​ច្រើន​ហើយ ប៉ុន្តែ​បើ​គ្រប់គ្រង​ចាត់ចែង​មិន​បាន​ល្អ និង​មិន​បាន​ត្រៀម​ធនធាន​ទុក​ជា​មុន​ឲ្យ​បាន​គ្រប់គ្រាន់​ទេ​នោះ អាជីវកម្ម​របស់​អ្នក​នឹង​បរាជ័យ។

៩.យុទ្ធសាស្ត្រ​ទីផ្សារ​នៅ​ស្តួចស្តើង
ការ​មាន​យុទ្ធសាស្ត្រ​ទីផ្សារ​​ជាមួយ​ពាក្យ​ស្លោក​មួយ​ឃ្លាៗ មិន​គ្រប់គ្រាន់​ទេ​ដើម្បី​ធ្វើ​ឲ្យ​ផលិតផល និង​ស្លាក​សញ្ញា​​អាជីវកម្ម​​របស់​អ្នក​អាច​មើលឃើញ​ក្នុង​ការ​វាយលុក​ឥត​ឈប់ឈរ​​នៅ​លើ​ប្រព័ន្ធ​ផ្សព្វផ្សាយ​នៅ​ពេល​បច្ចុប្បន្ន​នេះ។ បើ​គ្មាន​យុទ្ធសាស្ត្រ​ទីផ្សារ​ប្រកបដោយ​ប្រសិទ្ធភាព និង​ច្នៃប្រឌិត​ទេ​នោះ អ្នក​មិន​អាច​ទាក់ទាញ​អតិថិជន​បាន​ទេ។ 

១០.ឆាប់​បោះបង់​ពេក
នៅ​ក្នុង​ទិដ្ឋភាព​ជាក់ស្តែង គេ​សង្កេត​ឃើញ​ថា ​មាន​មូលហេតុ​ចម្បង​ធំ​មួយ​ដែល​​​ធ្វើ​ឲ្យ​ម្ចាស់​អាជីវកម្ម​ថ្មី​ថ្មោង​បរាជ័យ​ទៅ​វិញ គឺ​ថា ម្ចាស់​​អាជីវកម្ម​ទាំង​នោះ​អត់ទ្រាំ​មិន​បាន នឿយហត់ ខ្វះ​ការ​តស៊ូ ឆាប់​ចុះចាញ់ បោះបង់ ហើយ​ក៏​បិទ​អាជីវកម្ម​ចោល​តែម្តង។ តាម​ពិត​ទៅ ​អ្នក​ជំនួញ​ដែល​គេ​ចាត់​ទុក​ថា ជោគជ័យ​លុះត្រា​តែ​អ្នក​ហ៊ាន​ប្រឈម​នឹង​ឧបសគ្គ ការ​បរាជ័យ និង​មាន​យុទ្ធសាស្ត្រ​ដែល​ត្រូវ​ដើរ​ទៅ​មុខ៕

ប្រភព៖ Entrepreneur 

X
5s