៤ចំណុចបញ្ជាក់ថា តើចិនហែលឆ្លងពីសេដ្ឋកិច្ចត្រដាបត្រដួសទៅជាមហាអំណាចសេដ្ឋកិច្ចដោយរបៀបណា?​



នៅ​ថ្ងៃ​ទី ០១ ​តុលា​ខាង​នេះ ​រដ្ឋាភិបាល​ទីក្រុង​ប៉េកាំង​បានរៀបចំ​​ពិធី​​អបអរសាទរ​​គំរប​ខួប​លើក​ទី ៧០ ​នៃ​កម្មវិធី​​កំណែទម្រង់​​សេដ្ឋកិច្ច​របស់​ខ្លួន​​។ ពិធី​នេះ​នឹង​ធ្វើ​ឡើង​​នៅ​ស្រប​ពេល​ដែល​ពិភពលោក​កំពុង​មាន​ភាព​​តានតឹង​ខ្លាំង​ទៅ​​នឹង​សង្គ្រាម​ពាណិជ្ជកម្ម​​​រវាង​មហាអំណាច​មួយ​​នេះ​ និង​អាមេរិកនូវ​អ្វី​ដែល​គេ​មើល​ឃើញ​ថា ​បាន​ធ្វើ​ឲ្យ​សេដ្ឋកិច្ច​សាកល​មាន​ការ​ធ្លាក់​ចុះ។

Beijing, Front Gate, Street, People, China, Gate

យោង​តាម​របាយការណ៍​​​ស្រាវជ្រាវ​របស់​វិទ្យាស្ថាន Mckinsey បាន​រក​ឃើញ​ថា តម្លៃ​សេដ្ឋកិច្ច​ចន្លោះ​ពី​ ២២ ពាន់​ពាន់​លាន​ដុល្លារ​ទៅ ៣៧ ពាន់​ពាន់​លាន​ដុល្លារ​របស់​​មហាយក្ស​ចិន​ អាច​ត្រូវ​បាន​បន្ថែម ឬ​ដក​ចេញ​ពី​សេដ្ឋកិច្ច​ពិភពលោក​នៅ​ឆ្នាំ ២០៤០ ​​គឺ​អាស្រ័យ​លើ​ការ​ចូលរួម​របស់​​​មហាអំណាច​អាស៊ី​មួយ​នេះ​​ជាមួយ​ពិភពលោក​។ 

ខាងក្រោម​នេះ​ជា​​លក្ខណៈ​ពិសេស​​ចំនួន ៤ របស់​របាយការណ៍​​​​ស្រាវជ្រាវ​​វិទ្យាស្ថាន​ខាងលើ​ដែល​បញ្ជាក់​ថា តើ​​ចិន​ហែល​ឆ្លង​ពី​ប្រទេស​មាន​សេដ្ឋកិច្ច​ត្រដាបត្រដួស​ទៅ​ជា​មហាអំណាច​ទី២​ក្នុង​លោក​នៅ​ពេល​បច្ចុប្បន្ន​ដោយ​របៀបណា? 

១) ​ធ្វើ​ដំណើរ​ពី​​​​​សេដ្ឋកិច្ច​ខ្លា​​ក្រដាស​ទៅ​ជា​តោ​កំណាច​​មហាអំណាច​ទី២​ក្នុង​លោក​
កាល​ពី​ទសវត្សរ៍ទី ៦០ ចិន​​ប្រៀប​ដូច​ជា​​​ប្រទេស​ដែល​មាន​សេដ្ឋកិច្ច​ដូច​ខ្លា​ក្រដាស​មួយ​ប៉ុណ្ណោះ​​ ហើយ​មិន​ទាន់​មាន​ឥទ្ធិពល​ក្នុង​ឆាកនយោបាយ សេដ្ឋកិច្ច និង​នយោបាយ​អន្តរជាតិ​​ខ្លាំងក្លា​​នៅ​ឡើយ។ ក៏ប៉ុន្តែ​​នៅ​ឆ្នាំ ២០១០ ចិន​បាន​​តតាំង​ប្រជែង​ជាមួយ​​ប្រទេស​នានា​ វ៉ា​ដាច់​ជប៉ុន​ដោយ​ជោគជ័យ​ ក្លាយ​ជា​មហាអំណាច​​ទី២​ក្នុង​លោក នេះ​បើ​យោង​តាម​ទិន្នន័យ​របស់​​ធនាគារ​ពិភពលោក (World Bank) និង​អង្គការ​កិច្ច​សហប្រតិបត្តិការ​សេដ្ឋកិច្ច និង​ការអភិវឌ្ឍ (OECD)។ ចាប់​ពី​​ពេល​នោះ​មក ទីក្រុង​ប៉េកាំង​បាន​ឈរ​តំណែង​ទី២​នេះ​រហូត​មក​តាម​ពី​ក្រោយ​អាមេរិក។ 

​​អ្នក​សេដ្ឋកិច្ច​នានា​បាន​លើកឡើង​ថា នៅ​ក្នុង​ឆ្នាំ ២០៣០ មហាអំណាច​​មួយ​នេះ​នឹង​ក្លាយ​ជា​មហាអំណាច​ពិភពលោក​​ផុតលេខ​តែម្តង។ យ៉ាងណាមិញ​បើ​គេ​ពិនិត្យ​មើល​ទំហំ GDP ជា PPP (ផលធៀប​​នៃ​អំណាច​ទិញ​) គឺ​ចិន​បាន​វ៉ា​ដាច់​អាមេរិក​តាំង​ពី​ឆ្នាំ ២០១៤ មក​ម្ល៉េះ​គឺ​មាន​ទំហំ​ជាង ២៧,៤ ពាន់​ពាន់​លាន​ដុល្លារ ខណៈ​អាមេរិក​មាន​ត្រឹមតែ ២២,៩ ពាន់​ពាន់​លាន​ដុល្លារ​ប៉ុណ្ណោះ។ 

២) យុគសម័យ​នៃ​ថ្នាក់ដឹកនាំ​របស់​មហាយក្ស​​ចិន
នៅ​សម័យ​ក្រោម​ការ​ដឹកនាំ​​របស់​លោក តេង ស៊ាវពីង​ ដែល​ជា​មេដឹកនាំ​ដ៏​មាន​ឥទ្ធិពល និង​លេចធ្លោ​បំផុត​នៅ​ក្នុង​ប្រវត្តិសាស្ត្រ​របស់​ចិន មហាយក្ស​សេដ្ឋកិច្ច​មួយ​នេះ​បាន​ចាប់ផ្តើម​ធ្វើ​កំណែ​ទម្រង់​​សេដ្ឋកិច្ច​របស់​ខ្លួន​ជា​បន្តបន្ទាប់​ ហើយ​នៅ​ឆ្នាំ ១៩៧៨ ​ការ​កំណែទម្រង់​នេះ​បាន​ធ្វើ​ឲ្យ​រដ្ឋ​កុម្មុយនិស្ត​មួយ​នេះ​បាន​​រលាស់​ខ្លួន​​បន្តិចម្តងៗ​ចេញ​ពី​ភាព​ឯកោ​​ផ្នែក​សេដ្ឋកិច្ច​។ 

កាល​នោះ ពោល​គឺ​បន្ទាប់​ពី​​បាន​ធ្វើ​កំណែទម្រង់​ថ្មីៗ សេដ្ឋកិច្ច​មហាយក្ស​ចិន​​​មាន​កំណើន​រហូត​ដល់​ទៅ ១០% មុន​នឹង​ធ្លាក់​ចុះ​មក​វិញ​ត្រឹម ៧,១% នៅ​ពេល​បច្ចុប្បន្ន​នេះ​ក្រោម​ការ​ដឹកនាំ​របស់​ប្រធានាធិបតី​​លោក ស៊ី ជីនពីង​។ យ៉ាងណាមិញ​បើ​យោង​តាម​របាយការណ៍​សិក្សា​ស្រាវជ្រាវ​ពី​វិទ្យាស្ថាន Brookings របស់​អាមេរិក​បាន​ចេញផ្សាយ​កាល​ពី​ខែ​មិនា​កន្លង​ទៅ​បាន​ឲ្យ​ដឹង​ថា កំណើន​ GDPរបស់​​មហាអំណាច​​​ខាងលើ​នេះ​បាន​កើន​ឡើង​​ខ្លាំង​លើ​ការ​រំពឹង​ទុក​ដល់​ទៅ ១,៧% ឯណោះ​នៅ​ចន្លោះ​ពី​ឆ្នាំ ២០០៨ ​ដល់​ ២០១៦។

៣) មហាយក្ស​ចិន​គឺ​ជា​រោងចក្រ​របស់ពិភពលោក
កត្តា​ជំរុញ​ដ៏​សំខាន់​មួយ​នៅ​ពី​ក្រោយ​កំណើន​សេដ្ឋកិច្ច​របស់​មហាយក្ស​ចិន គឺ​បណ្ដាញ​រោងចក្រ​ធំ​ៗ របស់​ខ្លួន​​ដែល​​រកស៊ី​ចាប់តាំង​ពី​ការ​​ផលិត​ប្រដាប់ប្រដា​ក្មេង​លេង​រហូតដល់​ទូរស័ព្ទ​​ចល័ត​ ត្រូវ​បាន​​​ចែកចាយ និង​ប្រើប្រាស់​នៅ​ទូទាំង​ពិភពលោក។

វត្តមាន​របស់​រដ្ឋាភិបាល​ទីក្រុង​ប៉េកាំង​​ក្លាយ​ជា​សមាជិក​ពេញ​សិទ្ធិ​របស់​អង្គការ​ពាណិជ្ជកម្ម​ពិភពលោក (WTO) ក្នុង​ឆ្នាំ ២០០១ បាន​ជួយ​ឲ្យ​មហាអំណាច​បូព៌ា​មួយ​នេះ​ក្លាយ​ជា​រោងចក្រ និង​ពាណិជ្ជករ​ធំ​បំផុត​របស់​ពិភពលោក​។ នៅ​ក្នុង​របាយការណ៍​របស់​ក្រុមហ៊ុន​ស្រាវជ្រាវ McKinsey ​របស់​អាមេរិក​ដែល​បាន​វិភាគ​​ទៅ​លើ​ប្រទេស​ចំនួន​ ១៨៦ ចិន​ត្រូវ​បាន​គេ​រក​ឃើញ​ថា​ ជា​ទិសដៅ​នាំចេញ​ធំ​បំផុត​សម្រាប់​ប្រទេស​ចំនួន ៣៣ និង​ជា​ប្រភព​នាំចូល​ធំ​បំផុត​សម្រាប់​ ៦៥ ប្រទេស​ផ្សេង​ទៀត។

៤) មហាយក្ស​ចិន​ គឺ​ជា​ឃ្លាំង​​វិនិយោគ​ដ៏​ច្រើន​មហិមា​របស់​ពិភពលោក​
ក្រៅ​ពី​ភាព​លេចធ្លោ​របស់​ខ្លួន​នៅ​ក្នុង​​វិស័យ​ពាណិជ្ជកម្ម ​មហាយក្ស​ចិន​ក៏​បាន​ពង្រីក​ខ្លួន​​កាន់តែ​សកម្ម​ខ្លាំង​ឡើង​​នៅ​ក្នុង​រយៈពេល​​​ប៉ុន្មាន​ឆ្នាំ​ចុងក្រោយ​នេះ​ដើម្បី​បោះពួយ​ក្លាយជា​ស្តេច​ត្រួតត្រា​ក្នុង​លំហូរ​វិនិយោគ​សកលលោក​។ គិត​ចាប់​ពី​ឆ្នាំ ២០១៥ ដល់​ឆ្នាំ ២០១៧ យក្ស​ចិន​​គឺ​ជា​ក្បាល​ម៉ាស៊ីន​​​វិនិយោគ​ធំ​បំផុត​ទី២ ទៅ​កាន់​ពិភពលោក​​ និង​ជា​ម្ចាស់ផ្ទះ​​ទទួល​ទុន​វិនិយោគ​ធំ​ជាង​គេ​បំផុត​ទី២​នៅ​លើ​ពិភពលោក៕

ប្រភព៖ CNBC 

X
5s