៨ ចំណុចប្រហែលជាអ្នកមិនបានដឹងពីប្រទេសដែនកោះដ៏តូច កាតា
នៅថ្ងៃទី ១ កញ្ញាឆ្នាំ ១០៧១ កាតាបានប្រកាសឯករាជ្យពីកណ្តាប់ដៃអាណានិគមអង់គ្លេស។ កាតាកាលនោះគ្រាន់តែជាប្រទេសដែនកោះដ៏តូចមួយ និងក្រីក្រមួយប៉ុណ្ណោះ។ យ៉ាងណាមិញ ជាមួយនឹងផ្ទៃដីត្រឹមតែ ១១ ៥៨១ គីឡូម៉ែត្រក្រឡា និងមានប្រជាជនរស់នៅត្រឹមតែជាង ២,៦ លាននាក់ ប្រទេសស្តេចប្រេងមួយនេះបានអភិវឌ្ឍខ្លួនក្លាយទៅជាប្រទេសមានជាងគេបំផុតនៅលើពិភពលោកនាពេលបច្ចុប្បន្ននេះ។
ភាពអស្ចារ្យ និងការអភិវឌ្ឍប្រទេសយ៉ាងរលឿនរហ័សបែបនេះ ទើប Bizkhmer លើកយកចំណុចពិសេសគួរឲ្យចាប់អារម្មណ៍ចំនួន ៨ របស់កាតាដូចខាងក្រោម៖
១.កាតាជាប្រទេសមានជាងគេបំផុតនៅលើភពផែនដីនេះ
យោងតាមអង្គការមូលនិធិរូបិយវត្ថុអន្តរជាតិ (IMF)បានឲ្យដឹងថា GDP របស់មនុស្សម្នាក់ៗនៅប្រទេសកាតាគឺមានចំនួន ១៣០ ៤៧៥ ដុល្លារ ដែលធ្វើឲ្យប្រជាពលរដ្ឋប្រទេសនេះមានជាងគេបំផុតនៅលើពិភពលោក។ ប្រជាជនលុចសំបួឈរនៅលេខរៀងទី២ មានចំនួន ១១៦ ៨០៨ ដុល្លារ។ ដោយសារតែសំបូរទៅដោយឧស្ម័នធម្មជាតិ និងប្រេងបម្រុងទុកធំជាងគេបំផុតទី៣ នៅលើសាកលលោក ទើបធ្វើឲ្យប្រទេសដ៏តូចមួយនេះមានជីវភាពធូរធារជាងគេ។
២.ប្រជាជនកាតាស្ទើរតែទាំងអស់រស់នៅទីក្រុង
ដោយសារតែទឹកដីតូច ហើយកត្តាសេដ្ឋកិច្ចរីកចម្រើនខ្លាំងក្លាទាំងក្រុងទាំងជនបទ ធ្វើឲ្យគម្លាតរស់នៅរវាងទីក្រុង និងជនបទមិនខុសគ្នានោះឡើយ។ ហេតុដូច្នេះហើយទើប ប្រជាជនកាតា ៩៩% គេចាត់ទុកថាជាអ្នកក្រុង ឬរស់នៅទីក្រុង។
៣.គ្មានឡើយព្រៃឈើនៅប្រទេសកាតា
អាណាចក្រប្រេងនៅតំបន់មជ្ឈឹមបូព៌ាមួយនេះ មិនមានព្រៃឈើនោះឡើយ ពោលគឺគ្របដណ្តប់ទៅដោយវាលខ្សាច់តែប៉ុណ្ណោះ។ ប៉ុន្តែមានសមុទ្រព័ន្ទនៅជុំវិញ ហើយបើយោងតាមការអះអាងរបស់ធនាគារពិភពលោក (World Bank) មានប្រទេសចំនួន ៦នៅលើពិភពលោកដែលមិនមានព្រៃឈើគឺ ១ សាន់ម៉ារីណូ(San Marino) ណូរួ(Nauru) ហ្គីប្រាតា(Gibraltar) កាតា ដែនដី Greenland និងអូម៉ង់។
៤.ប្រទេសនេះក៏ជាប់ឈ្មោះជាប្រទេសមានសុវត្តិភាពជាងគេបំផុតផងដែរ
បើនិយាយពីគ្រោះធម្មជាតិវិញ អ្នកវិទ្យាសាស្រ្តបានអះអាងថា ប្រទេសនេះមានឱកាសអាចទទួលរងគ្រោះធម្មជាតិដូចជារញ្ជួយដីត្រឹមកម្រិត ០,១% ប៉ុណ្ណោះ។ ជាមួយនឹងវប្បធម៌សំបូរបែបប្រទេសនេះ មានសន្តិសុខសង្គម និងសន្តិភាពល្អដែលនេះបានធ្វើឲ្យកាតាជាប់ឈ្មោះជាប្រទេសមានសុវត្តិភាពជាងគេបំផុតមួយនៅលើលោក។
៥.កាតាប្រឈមមុខទៅនឹងវិបត្តិបុរសច្រើនជាងស្រ្តី
ក្នុងចំណោមប្រជាជនសរុបជាង ២,៦ លានអ្នក ប្រទេសនេះមានស្រ្តីសរុបត្រឹមតែជាង ៧ សែនអ្នកប៉ុណ្ណោះ។ អតុល្យភាពនេះជាវិបត្តិគួរឲ្យកង្វល់មួយរបស់រដ្ឋាភិបាលដែលវាប៉ះពាល់ខ្លាំងក្លាដល់កំណើនប្រជាជន និងកម្លាំងពលកម្ម។ នេះជាមូលហេតុដែលប្រទេសនេះត្រូវបានកសាងឡើងដោយពឹងលើពលករដ៏ច្រើនលើសលប់មកពីក្រៅប្រទេស។
៦. អង់គ្លេសជាគោលដៅវិនិយោគធំជាងគេរបស់កាតា
គិតត្រឹមពាក់កណ្តាលឆ្នាំ ២០១៧ កន្លងទៅ រដ្ឋមន្រ្តីហិរញ្ញវត្ថុរបស់ខ្លួនគឺលោក Ali Shareef al-Emadi បានលើកឡើងថា កាតាបានវិនិយោគក្នុងកញ្ចប់ទឹកប្រាក់ប្រមាណជាង ៣៥ ទៅ ៤០ ពាន់លានដុល្លាររួចទៅហើយនៅអង់គ្លេស ហើយខ្លួនមានគម្រោងបន្ថែមទឹកប្រាក់វិនិយោគ ៥ ពាន់លានដុល្លារបន្ថែមទៀតនៅក្នុងរយៈពេល ២ ឬ៣ឆ្នាំខាងមុខនេះលើវិស័យអចលនទ្រព្យ។
៧.កាតារួមចំណែកស្មើនឹង ១២% នៃធនធានឧស្ម័នធម្មជាតិបម្រុងទុកនៅលើសាកលលោក
ថ្វីត្បិតតែមានទឹកដីតូចក៏ពិតមែន ក៏ប៉ុន្តែមានធនធានឧស្ម័នធម្មជាតិបម្រុងទុកសរុបដល់ទៅ ១២%នៃធនធានឧស្ម័នធម្មជាតិបម្រុងទុករបស់ពិភពលោកទាំងមូល ឬស្ថិតនៅក្នុងចំណាត់ថ្នាក់ទី៣ មានធនធានឧស្ម័នធម្មជាតិបម្រុងទុកច្រើនជាងគេបង្អស់។
៨.ប្រេងឥន្ធនៈ និងឧស្ម័នធម្មជាតិគឺដង្ហើមសេដ្ឋកិច្ចដ៏សំខាន់មិនអាចខ្វះបានរបស់កាតា
ប្រេងឥន្ធនៈ និងឧស្ម័នធម្មជាតិគឺជាមូលដ្ឋានគ្រឹះនៃសេដ្ឋកិច្ចរបស់ប្រទេសកាតា ហើយវាបានរួមចំណែកដល់ទៅ ជាង ៧០% នៃប្រាក់ចំណូលសរុប (GDP)របស់ជាតិ និងប្រហែល ៨៥% នៃប្រាក់ចំណូលដែលបានមកពីការនាំចេញរបស់ខ្លួន។
ប្រភព៖ Telegraph&BBC& globalcastaway
