ចង់បង្កើត Startup មិនចាំបាច់រៀននៅមហាវិទ្យាល័យ?
ភាពជាសហគ្រិន អាចជាវិធីដ៏ល្អបំផុតមួយដើម្បីឈានទៅរកសេរីភាពហិរញ្ញវត្ថុ (Financial Freedom)។ ក៏ប៉ុន្តែដើម្បីកសាងអាជីវកម្មជោគជ័យមួយ ត្រូវការពេលវេលា ការខិតខំប្រឹងប្រែង និងការអត់ធ្មត់ច្រើនណាស់។ មានមនុស្សជាច្រើនជាពិសេសយុវជនតែម្តងដែលតែងតែឆ្ងល់ថា តើពួកគេគួរតែចេញរកស៊ីឬអត់? គួរចាប់ផ្តើមជំនួញនៅពេលណា? ហើយថា តើគួររៀនជំនាញអ្វីខ្លះដើម្បីស័ក្ដិសមនឹងការធ្វើជំនួញ?
តាមពិតទៅ ដើម្បីចាប់ផ្តើមជំនួញ ឬ អាជីវកម្មមួយ អ្នកមិនចាំបាច់បន្តរៀននៅមហាវិទ្យាល័យនោះទេ ប៉ុន្តែវាអាចជួយអ្នកបាននៅក្នុងករណីមួយចំនួន។ ការរៀននៅមហាវិទ្យាល័យមិនត្រឹមតែអាចជួយនិស្សិតឲ្យទទួលបានមេរៀនអាជីវកម្មប៉ុណ្ណោះទេ ក៏ប៉ុន្តែវាក៏អាចជួយឲ្យនិស្សិតទទួលបានចំណេះដឹងផ្សេងៗដូចជាជំនាញទន់ (Soft Skill) ជាដើម។
នៅពេលដែលចាប់អារម្មណ៍ធ្វើជំនួញខាងផ្នែកអ្វីមួយ អ្នកនឹងដឹងថា តើការអប់រំប្រភេទណាដែលអ្នកត្រូវរៀន? ប៉ុន្តែយ៉ាងហោចណាស់អ្នកក៏ត្រូវចេះមេរៀនមូលដ្ឋានគ្រឹះអាជីវកម្មមួយចំនួនផងដែរដូចជា ការគ្រប់គ្រងអាជីវកម្ម (Business Management) ការធ្វើទីផ្សារ (Marketing) ចំណេះដឹងពន្ធដារ (Taxes) ច្បាប់ (Law) និងផ្នែកលក់ (Sales) ជាដើម។
ទោះបីជាអ្នកអាចដឹងថា អ្នកមានចំណេះដឹងបច្ចេកទេសដើម្បីចាប់ផ្តើមអាជីវកម្មដោយមិនចាំបាច់រៀននៅមហាវិទ្យាល័យក៏ដោយ តើអ្នកដឹងទេថា អាជីពមួយណាដែលសមស្របសម្រាប់អ្នក? ហេតុដូច្នេះហើយ វាចាំបាច់ណាស់នៅទីនេះដើម្បីឆ្លើយសំនួរសំខាន់ៗមួយចំនួនមុនពេលអ្នកធ្វើការសម្រេចចិត្តថា គួរចាប់ផ្តើមធ្វើអាជីវកម្មដោយមិនចាំបាច់រៀននៅមហាវិទ្យាល័យឬអត់? សូមឆ្លើយសំនួរដោយស្មោះត្រង់ និងថ្លឹងថ្លែងឲ្យបានល្អិតល្អន់បន្តិចមុនអ្នកសម្រេចចិត្តថា គួរបន្តរៀន ឬឈប់រៀននៅមហាវិទ្យាល័យ?
១.តើចំណេះដឹងដែលអ្នកទទួលបានពីមហាវិទ្យាល័យពិតជាអាចជួយពង្រឹងអាជីព ឬវិស័យជំនួញដែលអ្នកចង់ធ្វើដែរឬទេ?
តើអ្នកត្រូវការសញ្ញាប័ត្រដែរឬទេដើម្បីធ្វើជំនួញ? ជាចម្លើយបែបបច្ចេកទេស គឺអ្នកមិនចាំបាច់ទេ។ ប៉ុន្តែនេះមិនមែនមានន័យថា អ្នកមិនចាំបាច់រៀនមុខវិជ្ជាជំនួញណាមួយនោះដែរ។ សម្រាប់មុខជំនួញដែលមានលក្ខណៈស្មុគស្មាញ និងត្រូវការបច្ចេកទេស ការរៀននៅមហាវិទ្យាល័យ (ពេលខ្លះ ហើយអាចចាំបាច់) គឺសំខាន់សម្រាប់អ្នកដើម្បីជោគជ័យក្នុងការធ្វើជំនួញ។ ប្រសិនបើអ្នកមិនបានដឹងថា អាជីវកម្មដំណើរការដូចម្តេច ឬគេគ្រប់គ្រង និងដំណើរការធ្វើឯកសារស្មុគស្មាញដោយរបៀបណា វាជារឿងល្អដែលអ្នកត្រូវពង្រឹងជំនាញមួយនេះតាមរយៈវគ្គសិក្សាខ្លីៗមួយចំនួន។
ថ្វីត្បិតតែអ្នកមិនត្រូវការជំនាញទាំងអស់ មេរៀនដែលអ្នករៀននៅមហាវិទ្យាល័យមួយចំនួនដែលត្រូវនឹងអាជីវកម្មរបស់អ្នក អាចបង្រៀនអ្នកពីការធ្វើជំនួញបានដូចជា របៀបធ្វើជំនួញដោយខ្លួនឯង ភាពជាម្ចាស់អាជីវកម្ម គំរូអាជីវកម្ម គណនេយ្យភាព ការគ្រប់គ្រងពេលវេលា របៀបចាត់ចែងការងារតាម អាទិភាព និងការវិភាគទិន្នន័យអាជីវកម្មជាដើម។ ទន្ទឹមនឹងនេះបើទោះបីជាអ្នកជោគជ័យក្នុងជំនួញដោយមិនបាច់ឈានជើងរៀននៅមហាវិទ្យាល័យក៏ដោយ អ្នកទំនងជាត្រូវការរៀនបន្តនូវការអប់រំណាមួយក្រៅផ្លូវការ (Informal) ដើម្បីធ្វើជាសហគ្រិន។
២.តើអ្នកមានបេះដូងជាសហគ្រិន ឬជំនាញផ្សេងៗដែលចាំបាច់ដើម្បីភាពជោគជ័យដែរឬទេ?
មុនពេលអ្នកឈានជើងប្រឡូកក្នុងអាជីវកម្ម អ្នកត្រូវតែច្បាស់ខ្លួនឯងថា វាជាការងារដែលអ្នកចង់ធ្វើ និងស្រលាញ់បំផុត។ ការធ្វើជំនួញដោយខ្លួនឯង វាខុសពីធ្វើការឲ្យគេ ត្បិតអីមានហានិភ័យខ្ពស់ ការបរាជ័យមានច្រើន មានភាពអត់ធ្មត់ខ្លាំង តស៊ូក្រាញននៀល ត្រូវការគ្រប់គ្រងពេលវេលាឲ្យមានប្រសិទ្ធភាព មានទំនួលខុសត្រូវច្រើនជាងមុន និងមានសម្ពាធកាន់តែច្រើនជាពិសេសនៅពេលជំនួញដំណើរការមិនបានល្អដូចការគ្រោងទុក។ ប្រសិនបើអ្នកមានមហិច្ឆតា និងពុះកញ្ជ្រោលចង់ធ្វើខ្លាំង សូមកុំមានការសង្ស័យចំពោះខ្លួនឯង។ ប៉ុន្តែបើអ្នកមិនមានអារម្មណ៍ល្អពីវា ១០០% ទេ សូមកុំប្រញាប់ធ្វើជំនួញពេកអី។
៣.តើចំណង់របស់អ្នកមានលើសពីភាពអត់ធ្មត់របស់អ្នកដែរឬទេ?
ពេលខ្លះគំនិតធ្វើជំនួញដ៏ល្អមួយ វាមិនអាចរង់ចាំតទៅទៀតទេដើម្បីធ្វើវា ហេតុដូច្នេះហើយការចំណាយពេលរហូតដល់ទៅ ៤ឆ្នាំនៅមហាវិទ្យាល័យ វាអាចធ្វើឲ្យ អ្នកបាត់បង់ឱកាសល្អបាន។ នៅក្នុងស្ថានភាពនេះ ប្រសិនបើអ្នកជឿជាក់ថា គំនិតអាជីវកម្មរបស់អ្នកមិនអាចរង់ចាំជាច្រើនឆ្នាំទៅមុខទៀតបាន ការបោះបង់រៀនបន្តនៅមហាវិទ្យាល័យ អាចជាជម្រើសល្អសម្រាប់អ្នកដែរ។ មានសហគ្រិនច្រើនណាស់ដែលដាក់មហិច្ឆតាធ្វើជំនួញនៅពេលកំពុងរៀននៅមហាវិទ្យាល័យ។ ប៉ុន្តែរឿងដ៏សំខាន់ត្រង់ថា តើចំណុចណាមួយដែលជំនួញរបស់អ្នកត្រូវការយកចិត្តទុកដាក់ពីអ្នកខ្លាំងបំផុតដើម្បីធ្វើវា?
៤.តើអ្នកមានបទពិសោធន៍ក្នុងមុខជំនួញដែលអ្នកចង់បង្កើតឡើងដែរឬទេ?
ដើម្បីធានាថា អ្នកបានដើរលើផ្លូវត្រូវក្នុងការចាប់ផ្តើមធ្វើជំនួញណាមួយ អ្នកត្រូវប្រាកដថា អ្នកមានបទពិសោធន៍រួចហើយពីមុខជំនួញនោះ។ ប្រសិនបើអ្នកមិនប្រាកដក្នុងចិត្តដើម្បីចាប់ផ្តើមជំនួញមួយដោយមិនបានរៀនបន្តនៅមហាវិទ្យាល័យ សូមធ្វើការនៅក្រុមហ៊ុនណាមួយដែលទទួលបានពិសោធន៍សម្រាប់ខ្លួនឯងដើម្បីធ្វើជំនួញនៅពេលអនាគត។ វាជាមធ្យោបាយដ៏ល្អមួយដើម្បីកំណត់ថា អ្នកមានចំណង់ចំណូលចិត្តពិតប្រាកដហើយឬនៅ ដើម្បីដាក់ចិត្តដាក់កាយចាប់ផ្តើមធ្វើជំនួញដោយខ្លួនឯង និងជួយឲ្យអ្នកដឹងថា តើអ្នកគួររៀនបន្ថែមអ្វីខ្លះទៀតដើម្បីធ្វើឲ្យខ្លួនឯងកាន់តែមានសមត្ថភាពខ្លាំងឡើងប្រកបដោយវិជ្ជាជីវៈខ្ពស់?
បទពិសោធន៍ការងាររបស់អ្នកអាចបង្រៀនអ្នកឲ្យស្វែងយល់ពីរបៀបគ្រប់គ្រងអាជីវកម្មឲ្យបានឆាប់រហ័ស ខណៈដែលនិស្សិតមហាវិទ្យាល័យភាគច្រើនចងចាំតែទ្រឹស្ដី និងបច្ចេកទេសជាសំខាន់។ នៅពេលអ្នកធ្វើជំនួញដោយផ្ទាល់ អ្នកនឹងដឹងពីអ្វី ដែលត្រូវធ្វើ និងមិនគួរធ្វើ។ ទោះបីជានៅមហាវិទ្យាល័យ អ្នកទទួលបានមេរៀនអាជីវកម្មមួយចំនួនក៏ពិតមែន ក៏ប៉ុន្តែអ្នកមិនអាចរៀនសូត្រពីរបៀបធ្វើជំនួញបានទេដរាបណាអ្នកមិនទាន់ចេញធ្វើជាអ្នករកស៊ីនៅឡើយ។
៥.តើអ្នកមានស្ថិរភាពហិរញ្ញវត្ថុហើយឬនៅ?
គេនិយាយថា ការរៀនសូត្រគឺជាការវិនិយោគមួយ ហើយការធ្វើជំនួញក៏ដូចគ្នាដែរ។ អ្នកត្រូវគិតគូរឲ្យបានល្អិតល្អន់ពីចំណេះដឹងហិរញ្ញវត្ថុ ដើមទុន ការគ្រប់គ្រងចំណូលចំណាយ បង្កើតគម្រោងហិរញ្ញវត្ថុ និងរៀបចំគម្រោងពេលវេលាចាត់ចែងការងាររបស់អ្នកឲ្យបានត្រឹមត្រូវផងដែរមុននឹងបូជាជីវិតរបស់អ្នកទៅនឹងគម្រោងរកស៊ីរបស់អ្នក។
ពេលខ្លះនិស្សិតជាច្រើន ត្រូវរៀនបន្តនៅមហាវិទ្យាល័យ និងធ្វើការនៅក្នុងក្រុមហ៊ុនណាមួយឲ្យត្រូវនឹងមុខជំនួញរបស់ខ្លួនជាច្រើនឆ្នាំដើម្បីយកលុយមកជួយផ្គត់ផ្គង់ជំនួញរបស់ពួកគេ។ ប្រសិនបើអ្នកយល់ថា អ្នកមិនអាចមានជម្រើសអ្វីផ្សេងក្រៅពីជម្រើសនេះបាន ដូចនេះ ការរៀនបន្តនៅមហាវិទ្យាល័យ គឺជារឿងល្អសម្រាប់អ្នក។ ប៉ុន្តែប្រសិនបើអ្នកយល់ថា អ្នកជឿជាក់ខ្លួនឯង ហើយអាចដោះស្រាយបញ្ហាហិរញ្ញវត្ថុដោយខ្លួនឯងបាន នោះការដកខ្លួនពីមហាវិទ្យាល័យទៅបើកជំនួញ ក៏វាមិនខុសអីសម្រាប់អ្នកដែរ។
៦.តើអ្នកមានការគាំទ្រគ្រប់គ្រាន់ដែរឬទេ?
ថ្វីត្បិតតែអ្នកចាប់ផ្តើមជំនួញដោយខ្លួនឯង ក៏ប៉ុន្តែការធ្វើជាសហគ្រិន មិនមែនជាដងវិថីដែលមានតែអ្នកម្នាក់ឯងប៉ុណ្ណោះទេ។ អ្នកត្រូវការមនុស្សជាទីស្រលាញ់ ក្រុមគ្រួសារ មិត្តភក្តិ ដៃគូអាជីវកម្ម សហគ្រិនដូចគ្នា និងបុគ្គលពាក់ព័ន្ធផ្សេងទៀតដើម្បីជួយគាំទ្រអ្នក។ ប៉ុន្តែរឿងមួយដែលអ្នកត្រូវចាំ មនុស្សជាទីស្រលាញ់របស់អ្នក គឺដៃគូជីវិត គ្រួសារ និងមិត្តភក្តិគឺពិតជាសំខាន់ជាងគេ។ នៅពេលអ្នកមានទទួលបានការគាំទ្រយ៉ាងរឹងមាំជាមួយមនុស្សជាទីស្រលាញ់របស់អ្នក អ្នកនឹងពង្រីកខ្លួនទៅកាន់មនុស្សផ្សេងទៀតដែលរកស៊ីក្នុងវិស័យជាមួយអ្នកដូចជា ដៃគូអាជីវកម្ម អ្នករកស៊ី បុគ្គលជោគជ័យ និងគ្រូបណ្តុះបណ្តាលជាដើម ត្បិតអីបុគ្គលទាំងនេះអាចជួយតម្រែតម្រង់ទិសអ្នកឲ្យជោគជ័យដូចពួកគេបាន។
៧.តើអ្នកមានហេតុផលគ្រប់គ្រាន់ដើម្បីចាប់ផ្តើមជំនួញដោយមិនបាច់រៀននៅមហាវិទ្យាល័យដែរឬទេ?
នេះប្រហែលជាសំនួរដ៏សំខាន់បំផុតមួយដែលអ្នកត្រូវសួរ។ តើអ្នកមានហេតុផលគ្រប់គ្រាន់ដើម្បីធ្វើជំនួញដោយបោះបង់ ឬបន្តរៀននៅមហាវិទ្យាល័យដែរឬទេ? អ្នកគ្រប់គ្នាគួរគិតឲ្យបានស៊ីជម្រៅពីគុណតម្លៃនៃការវិនិយោគពេលវេលា និងលុយកាក់របស់អ្នកអស់រយៈពេល ៤ឆ្នាំនៅមហាវិទ្យាល័យ។ អ្នកអាចចោទសួរខ្លួនឯងបានថា តើមានកន្លែងណាផ្សេងក្រៅពីនេះដែលអាចធ្វើឲ្យអ្នករៀនបានលឿនជាងនេះ អាចជួបមនុស្សថ្មីៗគួរឲ្យចាប់អារម្មណ៍ ហើយធ្វើគម្រោងការងារដែលអ្នកចង់ធ្វើដែរឬទេ? តើអ្នកចង់បោះបង់មហាវិទ្យាល័យចោលដើម្បីបង្កើតអ្វីមួយដែលអ្នកយល់ថា ការចំណាយពេលរៀននៅមហាវិទ្យាល័យជាឧបសគ្គសម្រាប់អ្នកដែរឬអត់? ឬមួយអ្នកយល់ថា ចង់បោះបង់មហាវិទ្យាល័យចោលដោយសារតែអ្នកបានឃើញ Bill Gates និង Mark Zuckerberg ធ្វើអញ្ចឹង?
នេះជាសំនួរសំខាន់ដែលអ្នកត្រូវឆ្លើយជាមួយហេតុផលដ៏ត្រឹមត្រូវមួយសម្រាប់អ្នក។ ការបោះបង់មហាវិទ្យាល័យចោលទៅធ្វើជំនួញដោយគ្មានហេតុផលពិតប្រាកដវាជារឿងគួរឲ្យអស់សំណើច ដែលមិនខុសអីពីចំណាយពេលអង្គុយរៀននៅសាលា ហើយមិនបានចេះអ្វីទាល់តែសោះ៕
អត្ថបទទាក់ទង៖
មេរៀន ៩យ៉ាងដែលនិស្សិតមហាវិទ្យាល័យត្រូវដឹង
៦ ដំណាក់កាលនៃដំណើរការអាជីវកម្ម Startup តើម្ចាស់អាជីវកម្មគួរធ្វើអ្វីខ្លះក្នុងដំណាក់កាលនីមួយៗ?
ដោយ៖ ខេវិន
ប្រភព៖ businessnewsdaily
