កំហុស ១៥ ​ចំណុច​ដែល​អ្នក​ត្រូវ​ជៀសវាង​នៅ​ពេល​បង្កើត Startup​



វា​ជា​រឿង​ធម្មតា​ទៅ​ហើយ​ដែល​សហគ្រិន​ថ្មីថ្មោង​ភាគ​​ច្រើន​​បាន​បង្កើត​កំហុស​រាប់​មិន​អស់​​នៅ​ពេល​​បង្កើត Startup ដំបូងៗ​ដែល​ជា​មូលហេតុ​ធ្វើ​ឲ្យ​ពួកគេ​បរាជ័យ​ទៅ​វិញ។ នេះ​ក៏ដោយសារតែ​ពួកគេ​បាន​សិក្សា​ស្វែងយល់ មើល​​ស្រាល​ស្ថានភាព និង​បាន​​ត្រៀម​ខ្លួន​ឲ្យ​បាន​គ្រប់គ្រាន់​មុន​នឹង​ឈាន​ជើង​ចូល​ក្នុង​សមរភូមិ​អាជីវកម្ម​របស់​ពួកគេ។ ប្រសិន​បើ​អ្នក ស្ថិត​នៅ​ក្នុង​ចំណោម​អ្នក​ទាំង​នោះ តើ​អ្នក​អាច​ផ្តល់​ចម្លើយ​បាន​ទេ​ថា តើ​បណ្តាល​មក​ពី​អ្វី​បាន​ជា​ធ្វើ​ឲ្យ​ជំនួញ​របស់​អ្នក​បរាជ័យ? 

អត្ថបទ​នេះ​ព្យាយាម​បង្ហាញ​​ចំណុច​​កំហុស​​ត្រួសៗ​របស់​ម្ចាស់ Startup ​​ភាគ​ច្រើន​​​បាន​បង្កើត​ឡើង​​ដែល​ក្នុង​នោះ​មាន​ដូច​ជា៖ ​

១.ខ្លាច​ការ​បរាជ័យ
ការ​ភ័យខ្លាច​ទៅ​នឹង​បរាជ័យ គឺ​ជា​​កំហុស​ដ៏​ធំ​មួយ​របស់​អ្នក​​​នៅ​ពេល​​ចាប់​ផ្តើម​រកស៊ី​ (Startup)។ ភាព​បរាជ័យ​គឺ​ជា​កូនសោ​សម្រាប់​ភាព​​ជោគជ័យ ត្បិតអី​វា​ផ្តល់​បទពិសោធន៍​ដ៏ មាន​តម្លៃ​សម្រាប់​អ្នក​។ ហ៊ាន​ប្រឈមមុខ​នឹង​វា ហើយ​មើល​វា​ក្នុង​ន័យ​វិជ្ជមាន។ រៀន​ក្រោក​ឈរ​ ហើយ​រៀន​សូត្រ​ពី​វា​ក្រោយ​បរាជ័យ។

២.​គ្មាន​​ផែនការ​អាជីវកម្ម​ត្រឹមត្រូវ
អាជីវកម្ម​ច្រើន​ណាស់​ដែល​បង្កើត​ឡើង​ដោយ​គ្មាន​ផែនការ​អាជីវកម្ម​ច្បាស់លាស់។ វា​ប្រៀប​ដូច​ជា​ប្រទីប​មួយ​សម្រាប់​បង្ហាញ​ផ្លូវ​ថា អ្នក​ត្រូវ​​ធ្វើ​អ្វី​ខ្លះ? ចាប់​ផ្ដើម​ពី​កន្លែង​ណា​ទៅ​កន្លែង​ណា? ដោយ​របៀបណា? អ្នក​នឹង​ក្លាយ​ជា​អ្វី​នៅ​​រយៈពេល ៥​ឆ្នាំ​ខាងមុខ? ទោះបី​ជា​ផែនការ​អាជីវកម្ម​របស់​អ្នក​មាន​ត្រឹមតែ​មួយ​ទំព័រ​ក៏ដោយ យក​ល្អ​អ្នក​ត្រូវ​តែ​មាន​វា។

៣.មិន​បាន​រៀបចំ​ចាត់ចែង​ការងារ​តាម​លំដាប់លំដោយ​
ការ​ចាត់ចែង​ការងារ​ឲ្យ​បាន​ត្រឹមត្រូវ​គឺ​ជា​កូនសោ​ដ៏​សំខាន់​ក្នុង​នាម​ជា​អ្នក​រកស៊ី។ ធ្វើ​ជំនួញ អ្នក​មិន​សូវ​មាន​ពេលទំនេរ​ទេ។ ការងារ​ជា​ច្រើន​នឹង​ធ្លាក់​មក ហើយ​អ្នក​មាន​គម្រោង​ជា​ច្រើន​ដែល​ត្រូវ​ធ្វើ​ក្នុង​ពេល​តែមួយ​។ អ្វី​ដែល​សំខាន់​ គឺ​ស្ថិត​នៅ​លើ​សមត្ថភាព​របស់​អ្នក​ថា តើ​អ្នក​អាច​ចាត់ចែង​ក្ដោបក្ដាប់​ធ្វើការ​​ការងារ​​ទាំង​នោះ​តាម​លំដាប់លំដោយ ឬ​អាទិភាព​របស់​វា​ឬ​អត់? តើ​អ្នក​មាន​កាលវិភាគ​ធ្វើ​វា​ដែរ​ឬ​ទេ?

៤.យល់​មិន​​ច្បាស់​ពី​ទីផ្សារ និង​គោលដៅ​អតិថិជន​របស់​អ្នក
កំហុស​ដ៏​ធំ​មួយ​ក្នុង​ចំណោម​កំហុស​ផ្សេងៗ​ទៀត​របស់​ម្ចាស់ Startup គឺ​ការ​មិន​បាន​យកចិត្ត​ទុកដាក់​​ចំណាយ​ពេល​ស្វែងយល់​ពី​ទីផ្សារ និង​អតិថិជន​គោលដៅ​របស់​ខ្លួន។ អ្នក​ត្រូវ​ចាំ​ថា ទោះបី​ជា​អ្នក​មាន​ផលិតផល ឬ​សេវាកម្ម​ល្អ​​ក៏ដោយ បើ​អ្នក​មិន​ដឹង​តម្រូវ​ការ​ទីផ្សារ​ប៉ុណ្ណា ហើយ​អតិថិជន​របស់​អ្នក​ជា​នរណា​ទេ ជំនួញ​របស់​អ្នក​នៅ​តែ​មិន​អាច​ងើប​ទៅ​មុខ​រួច​បាន​ឡើយ​។

៥.មិន​បង្កើត​ Startup ឲ្យ​ស្រប​ទៅ​នឹង​ច្បាប់
បញ្ហា​ផ្លូវច្បាប់​ជា​ចំណុច​សំខាន់​ដែល Startup ទាំងអស់​មិន​​ត្រូវ​មើល​រំលង។ បើ​អ្នក​ស្រលាញ់ និង​ចង់​ឲ្យ​ជំនួញ​របស់​អ្នក​មាន​អនាគត​វែងឆ្ងាយ​នៅ​ពេល​អនាគត អ្នក​ត្រូវ​តែ​គិតគូរ​ចុះ​បញ្ជី​ក្រុមហ៊ុន​ឲ្យ​បាន​ត្រឹមត្រូវ។ ក្រៅ​ពី​នេះ​ត្រូវ​រៀបចំ​រចនាសម្ព័ន្ធ​ក្រុមហ៊ុន​ឲ្យ​បាន​​ត្រឹមត្រូវ និង​ធ្វើ​ឲ្យ​វា​មាន​លក្ខណៈ​ស្តង់ដារ​​ដើម្បី​​អន្ទង​ចិត្ត​ទាញ​យក​ទំនុក​ចិត្ត​ពី​សាធារណជន និង​ដៃគូ​ជំនួញ។ 

៦.ព្យាយាម​ធ្វើ​អ្វីៗ​គ្រប់​បែប​យ៉ាង​ដោយ​ខ្លួនឯង​នៅ​ពេល​ធ្វើ​ជំនួញ
នេះ​ជា​កំហុស​ដ៏​ធំ​មួយ ហើយ​វា​មិន​អាច​ធ្វើ​ឲ្យ​ Startup របស់​អ្នក​មាន​ដង្ហើម​ជីវិត​យូរ​អង្វែង​ឡើយ។ កុំ​ព្យាយាម​ធ្វើ​ជំនួញ​​តែ​​ម្នាក់​ឯង​ដោយ​មិន​បាន​គៀងគរ​អ្នក​ផ្សេងៗ​ទៀត​ដែល​ឆ្លាត និង​មាន​ជំនាញ​ផ្សេងៗ​​មក​ធ្វើ​ការ​ជាមួយ​អ្នក។ អ្នក​គួរ​ចាប់ដៃ​គ្នា​ជាមួយ​ដៃគូ​ជំនួញ  ជួល​បុគ្គលិក និង​អ្នក​ប្រឹក្សា​ផ្សេងៗ​អម​ដំណើរ​ជាមួយ​អ្នក​​ដើម្បី​រក​មើល​ឱកាស សក្ដានុពល និង​ចំណុច​ប្រហោង​នៅ​ក្នុង​ជំនួញ​របស់​អ្នក។

៧.​ចាប់ដៃ​រកស៊ី​ជាមួយ​ដៃគូ​ជំនួញ​ខុស
ចំណុច​មួយ​ទៀត​ដែល​ម្ចាស់ Startup ត្រូវ​ដឹង​មុន​ពេល​ចាប់​ផ្តើម​ជំនួញ​គឺ​ថា ដៃគូ​ជំនួញ​មិនមែន​ត្រឹមតែ​ជា​អ្នក​ផ្តល់ទុន​ឲ្យ អ្នក​រកស៊ី​ប៉ុណ្ណោះ​ទេ។ អ្នក​អាច​ធ្វើ​ដំណើរ​យ៉ាង​ល្អូកល្អិន​ជាមួយ​គ្នា​នៅ​ពេល​ដំបូង ក៏ប៉ុន្តែ​អ្នក​អាច​ក្លា​ជា​សត្រូវ​នៅ​ពេល​ទំនាស់​ផលប្រយោជន៍​​កើត​មាន​ឡើង។ សូម​ចាំ​ថា ជ្រើស​ដៃគូ​ជំនួញ​​ប្រៀប​ដូច​ជា​អ្នក​ជ្រើសរើស​​ដៃគូ​ជីវិត បើ​អ្នក​ជ្រើសរើស​បាន​ត្រឹមត្រូវ ជីវិត​អាជីវកម្ម​របស់​អ្នក​នឹង​រីកចម្រើន។

៨.មើល​រំលង​កិច្ចសន្យា
កិច្ចសន្យា​ គឺ​ជា​រឿង​ចាំបាច់​សម្រាប់​គ្រប់​ទិដ្ឋភាព​​​​ទាំងអស់​នៃ​អាជីវកម្ម​របស់​អ្នក។ ក្នុង​សកម្មភាព​អាជីវកម្ម​ប្រចាំ​ថ្ងៃ ទោះបី​ជា​អ្នក​ទុកចិត្ត ឬ​ស្រលាញ់​គ្នា​ប៉ុណ្ណា​ក៏ដោយ កិច្ចសន្យា​នឹង​ជួយ​ធានា​ថា ជំនួញ​របស់​អ្នក​នឹង​ប្រព្រឹត្ត​ទៅ​តាម​ផ្លូវច្បាប់ មាន​ស្តង់ដារ ផ្ដល់​ទំនុក​ចិត្ត​ខ្ពស់​ដល់​ភាគី​​ពាក់ព័ន្ធ​ និង​ជំរុញ​ផលិតភាព​ក្នុង​ការងារ។

៩.​ប្រញាប់ប្រញាល់​ជួល​បុគ្គលិក​លឿន​ពេក
ការ​ប្រញាប់ប្រញាល់​ជួល​បុគ្គលិក​លឿន​ពេក​ក៏​ជា​កំហុស​មួយ​​ផង​ដែរ​​របស់​​សហគ្រិន​ថ្មីថ្មោង។ ទោះបី​ជា​អ្នក​មាន​ទំនុក​ចិត្ត​ខ្ពស់​​លើ​​ជំនួញ​របស់​អ្នក​យ៉ាងណាក៏ដោយ បើ​សិន​ជា​អាច​អ្នក​គួរ​ជួល​បុគ្គលិក​ធ្វើ​ការ​ក្រៅ​ម៉ោង​សិន​ ឬ​ Freelancer ក៏​បាន​។ វា​មិន​យឺត​ពេល​ទេរ​ក្នុង​ការ​ជួល​បុគ្គលិក ពេញ​ម៉ោង​មក​ធ្វើ​ការ ប្រសិន​បើ​ជំនួញ​របស់​អ្នក​ដើរ​ទៅ មុខ​យ៉ាង​រលូន​មែន​នោះ។ ​

១០.មើល​រំលង​លើ​តម្រូវ​ការ​ដើម​ទុន
សហគ្រិន​ជា​ច្រើន​គិត​ថា ជំនួញ​របស់​ពួកគេ​អាច​មុជ​ទៅ​មុខ​បាន​ឆ្ងាយ​ដោយ​មិន​ចាំបាច់​ប្រើ​ដើម​ទុន​ច្រើន។ ក៏ប៉ុន្តែ​នៅ​ក្នុង​ទិដ្ឋភាព​ជាក់ស្ដែង​ពួកគេ​មិន​បាន​មើល​ឲ្យ​បាន​​គ្រប់​ជ្រុងជ្រោយ​នោះ​ឡើយ​ថា នៅ​មាន​ឧបសគ្គ បញ្ហា និង​ហេតុការណ៍​ដែល​ឥត​គ្រោង​ទុក​ជា​ច្រើន​ទៀត​នឹង​កើត​មាន​ឡើង។ នេះ​ហើយ​ជា​មូលហេតុ​ដែល​អ្នក​ត្រូវ​ធ្វើ​ផែនការ​លំហូរ​សាច់ប្រាក់​ក្នុង​អាជីវកម្ម​របស់​អ្នក​ថា តើ​អ្នក​នឹង​ចំណាយ​លើ​អ្វី​ខ្លះ? តើ​​ជំនួញ​របស់​អ្នក​អាច​រស់​បាន​ប៉ុន្មាន​ខែ​ដោយ​គ្មាន​ចំណូល​ជាដើម? 

១១.​​ចំណាយ​លុយ​ខ្ជះខ្ជាយ
ការ​ចំណាយ​លុយ​ដោយ​ខ្ជះខ្ជាយ ឬ​មិន​ចំ​ទិសដៅ​ មិន​យូរ​មិន​ឆាប់​នឹង​ធ្វើ​​ឲ្យ​កិច្ចការ​ជំនួញ​របស់​អ្នក​ដួលរលំ។ នៅ​ពេល​អ្នក​ចាប់​ផ្តើម​ចំណាយ​ អ្នក​គួរ​គិត​ថា តើ​អ្នក​គួរ​ចំណាយ​អ្វី​ខ្លះ​​ដែល​ចាំបាច់​? ជួល​បុគ្គលិក​បែប​ណា​ឲ្យ​ត្រូវ​កន្លែង? តើ​​ចំណាយ​បែប​ណា​ដែល​ធ្វើ​ឲ្យ​​​អ្នក​ទទួល​បាន​ផល​ចំណេញ​មក​វិញ? ទាំងអស់​នេះ​សុទ្ធតែ​ជា​រឿង​ចាំបាច់​ដែល​អ្នក​ត្រូវ​គិត​នៅ​ពេល​ចាប់​ផ្តើម​ដក​លុយ​ចេញ​ពី​ហោប៉ៅ​របស់​អ្នក។

១២.បន្ទាប់​តម្លៃ​ផលិតផល ឬ​សេវាកម្ម​របស់​អ្នក
រឿង​មួយ​ដែល​អ្នក​ត្រូវ​ចាំ​នៅ​ពេល​ចាប់​ផ្តើម Startup គឺ​គប្បី​កុំ​លក់​ផលិតផល ឬ​សេវាកម្ម​ក្នុង​តម្លៃ​ខ្ពស់​ពេក ឬ​ថោក​ពេក​ដើម្បី​គ្រាន់តែ​ចង់​បាន​ចំណែក​ទីផ្សារ​នោះ។ ប្រសិន​បើ​ប្រេន (Brand) ​របស់​អ្នក​ខ្លាំង មនុស្ស​មិន​ខ្វល់​ពី​តម្លៃ​របស់​អ្នក​ទេ។   អ្វី​ដែល​សំខាន់​លក់​ផលិតផល ឬ​សេវាកម្ម​របស់​អ្នក​ក្នុង​តម្លៃ​មួយ​សមរម្យ​​ស្រប​តាម​ទីផ្សារ និង​មាន​គុណភាព​​គឺ​ជា​រឿង​សំខាន់​​ដែល អ្នក​ត្រូវ​យកចិត្ត​ទុកដាក់។

១៣.​ប្រញាប់ប្រញាល់​បើក​ Startup លឿន​ពេក
អ្នក​នឹង​បង្កើត​កំហុស​ឡើង​ប្រសិន​បើ​អ្នក​មិន​បាន​​ត្រៀម​ខ្លួន​ឲ្យ​បាន​​រួចរាល់​មុន​ចាប់​ផ្តើម​ Startup របស់​អ្នក។ ការ​ត្រៀម​ខ្លួន​ឲ្យ​បាន​ត្រឹមត្រូវ​ វា​ល្អ​ប្រសើរ​ជាង​​គំនិត​ល្អ​ឥតខ្ចោះ​មួយ​។ ក្រៅ​ពី​មាន​ផែនការ​អាជីវកម្ម​ច្បាស់លាស់​មួយ អ្នក​មាន​បាន​រៀបចំ​រចនាសម្ព័ន្ធ​ផ្ទៃ​ក្នុង​ក្រុមហ៊ុន​ហើយ​ឬនៅ? អ្នក​​មាន​​ផលិតផល ឬ​សេវាកម្ម​អ្វី​ខ្លះ? តើ​អ្នក​ចែកចាយ​វា​ដោយ​របៀបណា? ទំនាក់ទំនង​អតិថិជន​របៀប​ម៉េច? ទាំងអស់​នេះ​សុទ្ធតែ​ជា​អ្វី​ដែល​អ្នក​ត្រូវ​មាន​​រួច​ជា​ស្រេច​មុន​ពេល​ចាប់​ផ្តើម​បើក​រកស៊ី។

១៤.​ឆាប់​ពង្រីក​ជំនួញ​របស់​អ្នក​​លឿន​ពេក
នៅ​ពេល​អ្នក​ឃើញ​លទ្ធផល​ជោគជ័យ​បណ្តើរៗ វា​ទំនង​ជា​ធ្វើ​ឲ្យ​អារម្មណ៍​របស់​អ្នក​រំភើប ហើយ​បន្ត​សម្រេច​ក្តី​ស្រមៃ​ពង្រីក​វា​ឲ្យ​កាន់តែ​ធំ​ឡើង។ យ៉ាងណាក៏ដោយ ការ​ធ្វើ​ជំនួញ​ សូម​កុំ​តក់ក្រហល់​ពេក​អី! ធ្វើ​វា​សន្សឹមៗ ពី​តូច​ទៅ​ធំ។ ពេលវេលា​នឹង​បង្រៀន​អ្នក​ថា តើ​ពេល​ណា​អ្នក​ត្រូវ​តែ​ហ៊ាន​ហក់​លោត? ពេល​ណា​អ្នក​ត្រូវ​តែ​មាន​ភាព​អត់ធ្មត់? ប្រសិន​បើ​ជំនួញ​របស់​អ្នក​មាន​ស្ថិរភាព​ល្អ ការ​ពង្រីក ជំនួញ​ឲ្យ​កាន់តែ​ធំ​វា​មិន​យឺត​ពេល​ទេរ​សម្រាប់​អ្នក។

១៥.ជួល​បុគ្គលិក​ខុស​មក​ធ្វើ​ការ
ការ​​ជ្រើសរើស​បុគ្គលិក គឺ​ជា​រឿង​សំខាន់​មួយ​ទៀត​ដែល​អ្នក​ត្រូវ​យកចិត្ត​ទុកដាក់​។ នៅ​ពេល​អ្នក​យល់​ថា ជំនួញ​របស់​អ្នក​ដល់​ស្ថានភាព​មួយ​ដែល​ត្រូវ​ពង្រីក​បន្ថែម​ទៀត អ្នក​គួរ​ជ្រើសរើស​បុគ្គលិក​ដែល​មាន​សមត្ថភាព​មក​ធ្វើ​ការ​ឲ្យ​អ្នក។ នេះ​ជា​ចំណុច​ប្រុងប្រយ័ត្ន​ពីព្រោះ​ថា បើ​អ្នក​ជ្រើសរើស​ពួកគេ​មិន​បាន​ត្រឹមត្រូវ ជំនួញ​របស់​អ្នក​នឹង​មិន​អាច​ដើរ​ទៅ​មុខ​បាន​ឡើយ ហើយ​ថែម​ទាំង​ខាត​បង់​ប្រាក់កាស​របស់​អ្នក​ទៀត​ផង៕

ចុះ​ប្រិយមិត្ត​វិញ មាន​រក​ឃើញ​កំហុស​ផ្សេង​ក្រៅ​ពី​នេះ​ដែរ​ឬ​អត់? 

ដោយ​៖ ខេវិន
ប្រភព៖ businessnewsdaily

X
5s