មុននឹងចាប់ផ្ដើមសរសេរពីគម្រោងអាជីវកម្ម អ្នកគួរតែធ្វើរឿងទាំង៥ចំណុចនេះសិន
ការចង់ចាប់ផ្ដើមធ្វើគម្រោងអាជីវកម្មមួយៗមិនមែនជារឿងងាយស្រួលនោះទេ ហើយថែមទាំងត្រូវការគិតនិងពិចារណាឲ្យបានម៉ត់ចត់ខ្លាំងមែនទែនបើមិនពុំនោះទេ អាជីវកម្មរបស់អ្នកអាចនឹងទទួលភាពបរាជ័យជាក់ជាមិនខាន។ ខាងក្រោមនេះគឺជាចំណុចទាំង៥ដែលអ្នកគួរតែធ្វើមុនពេលចាប់ផ្ដើមសរសេរគម្រោងអាជីវកម្ម៖
១) កំណត់គោលបំណងរបស់អ្នក៖ អ្នកគួរតែកំណត់គោលដៅរបស់ខ្លួនឲ្យបានជាក់លាក់ជាពិសេសប្រសិនបើអ្នកត្រូវការអ្នកចូលហ៊ុនជាមួយអ្នកទៀតនោះ ដើម្បីឲ្យពួកគេដឹងច្បាស់ថាហេតុអ្វីបានជាពួកគេត្រូវធ្វើបែបនោះ។
២) កសាងទស្សនវិស័យរបស់អ្នក៖ គន្លឹះសំខាន់សម្រាប់ភាពជោគជ័យនោះគឺការមានទស្សនវិស័យច្បាស់លាស់ក្នុងការសម្រេចគោលដៅរបស់ក្រុមហ៊ុន ហើយធ្វើយ៉ាងណាហាមមានអារម្មណ៍ថាវង្វេងនៅកណ្ដាលទីឲ្យសោះ ដែលនេះជាហេតុដែលអ្នកត្រូវតែកសាងទស្សនវិស័យរបស់អ្នកឲ្យបានរឹងមាំ។
៣) បញ្ជាក់គម្រោងអាជីវកម្មរបស់អ្នកឲ្យបានជាក់លាក់៖ គម្រោងអាជីវកម្មល្អមិនត្រឹមតែមានទស្សនវិស័យល្អតែប៉ុណ្ណោះ វាត្រូវតែមានព័ត៌មានលំអិតនិងគ្រប់គ្រាន់ទាំងខាងផ្នែកហិរញ្ញវត្ថុ ផ្នែកគ្រប់គ្រង និងសឹងតែគ្រប់ជំហាននៅក្នុងវិស័យអាជីវកម្មរបស់អ្នកផងដែរ។
៤) រៀបចំទាំងឯកសារផ្នែកច្បាប់និងឈ្មោះក្រុមហ៊ុនរបស់អ្នក៖ កិត្តិយសគឺជារឿងដ៏សំខាន់សម្រាប់ក្រុមហ៊ុននិមួយៗ ហេតុដូចនេះហើយអ្នកត្រូវតែធ្វើការយកចិត្តទុកដាក់ទៅលើរឿងនេះខ្លាំងមែនទែន។ រីឯស្លាកសញ្ញានិងស្លាកឈ្មោះក៏ជារឿងមួយដែលខ្វះមិនបានផងដែរ ដែលវាដើរតួយ៉ាងសំខាន់ក្នុងការទាក់ទាញចំណាប់អារម្មណ៍របស់អ្នក។
៥) ចាប់ផ្ដើមស្ទង់មើលអាជីវកម្មរបស់អ្នក៖ អ្នកគួរតែចាប់ផ្ដើមដាក់សាកលក់ទំនិញរបស់ខ្លួន ឬលួចស្ទង់មតិពីអ្នកដទៃដើម្បីឲ្យដឹងថាអ្នកអាចមានសង្ឃឹមជោគជ័យដល់កម្រិតណាដែរ ហើយតើអាជីវកម្មរបស់អ្នកមានចំណុចខ្វះខាតអ្វីខ្លះ៕
