មុនពេលជោគជ័យធំធេង លោក Henry Ford ស្ថាបនិករបស់ក្រុមហ៊ុន Ford ធ្លាប់បរាជ័យ២ដង
នៅពេលនិយាយអំពីភាពជោគជ័យរបស់បុគ្គលល្បីឈ្មោះណាម្នាក់ មនុស្សភាគច្រើនមានទំនោរទៅរកការចាប់អារម្មណ៍ទៅលើសមិទ្ធផលដ៏អស្ចារ្យរបស់បុគ្គលនោះ ព្រមទាំងអាចនឹងមានទស្សនយល់ឃើញថា ជោគជ័យរបស់ពួកគេគឺចេញពីភាពចៃដន្យ ឬជាទេពកោសល្យដែលកើតមកពីធម្មជាតិ ដែលជាកំណើតរបស់ពួកគេ ហើយក៏ផ្ដល់ជាការប្រទានពរនូវឱកាសដ៏ថ្លៃថ្លានោះសម្រាប់ពួកគេក្នុងការកសាងជីវិតខ្លួនឲ្យត្រដែតខ្ពស់ឡើង។
ជាការពិតណាស់ មនុស្សម្នាក់ៗសុទ្ធតែកើតមកជាមួយនឹងទេពកោសល្យជាលក្ខណៈពិសេសរបស់ខ្លួន គ្រាន់តែអ្នកខ្លះព្យាយាមស្វែងរកឃើញនូវភាពពិសេសរបស់ខ្លួននោះ បានឆាប់រហ័សក្នុងដំណើរជីវិតរបស់ពួកគេ ហើយបំផុសនូវសក្ដានុពលរបស់ខ្លួនទាំងប៉ុន្មាន ខិតខំសាងប្រយោជន៍ចេញជាសមិទ្ធផលឡើងក្នុងជីវិត។ រីឯអ្នកខ្លះទៀត ស្ទើរតែពេញមួយជីវិត មិនបានខិតខំស្វែងរកឲ្យឃើញនូវភាពពិសេសរបស់ខ្លួននោះឡើយ ជាហេតុនាំឲ្យ ពួកគេប្រើប្រាស់ជំនាញខុសពីទេពកោសល្យពិតរបស់ខ្លួន ហើយក៏ទទួលបានភាពជោគជ័យក្នុងកម្រិតធម្មតាមួយក្នុងជីវិតតែប៉ុណ្ណោះ។
ទោះជាយ៉ាងណាក៏ដោយ សរុបមក បើទោះជាបុគ្គលនោះដឹងពីទេពកោសល្យរបស់ខ្លួនច្បាស់ក៏ដោយ បើប្រាសចាកពីការតស៊ូខិតខំអត់ធ្មត់ព្យាយាម ជោគជ័យគ្មានថ្ងៃនឹងមិនអាចក្លាយជាកម្មសិទ្ធិរបស់ពួកគេបានយូរអង្វែងឡើយ។ តួយ៉ាង តាមរយៈជីវប្រវត្តិរបស់លោក Henry Ford អ្នកប្រហែលអាចនឹងដឹងត្រឹមតែភាពជោគជ័យរបស់គាត់ ដែលជាម្ចាស់ក្រុមហ៊ុនម៉ូតូម៉ាក Fordដ៏ល្បីល្បាញជុំវិញពិភពលោករបស់គាត់តែប៉ុណ្ណោះ។ ប៉ុន្តែ មុននឹងគាត់ផ្ដល់នូវដង្ហើមសម្រាប់ក្រុមហ៊ុនមួយនេះ ឲ្យមានជីវិតរស់រានឡើងដោយមានការទទួលស្គាល់នូវស្នាដៃដ៏លេចធ្លោរបស់លោកនោះ លោកបានបរាជ័យជាមួយនឹងការក្ស័យធនដោយព្យាយាមបង្កើតនូវក្រុមហ៊ុនគ្រឿងយន្តរបស់លោកយ៉ាងដុនដាបចំនួន២ដងរួចមកហើយ។
ក្នុងឆ្នាំ១៨៩៩ ក្នុងវ័យ៣៦ឆ្នាំរបស់លោក លោកបានព្យាយាមបង្កើតនូវក្រុមហ៊ុនគ្រឿងយន្តដំបូងរបស់លោក មានឈ្មោះថា Detroit Automobile Company ព្រមទាំងមានជំនួយផ្នែកហិរញ្ញវត្ថុពីអភិជនដ៏ល្បីឈ្មោះដែលមានចំណាប់អារម្មណ៍យ៉ាងខ្លាំងក្លាទៅលើឧស្សាហកម្មឈើម្នាក់ គឺលោកWilliam H. Murphyផងដែរ។ តែជាអកុសល ក្រុមហ៊ុននេះបានប្រឈមនឹងវិបត្តិក្ស័យធននាពេលក្រោយមក។ ការខិតខំប្រឹងប្រែងរបស់លោកជាលើកទី២ គឺនៅក្នុងឆ្នាំ១៩០១ ដោយបង្កើតនូវក្រុមហ៊ុនមួយឈ្មោះ Henry Ford Company ដែលចុងក្រោយគាត់បានត្រឹមតែមានសិទ្ធិជាកម្មសិទ្ធិទៅលើឈ្មោះរបស់ខ្លួនប៉ុណ្ណោះ ហើយក្រោយមកក្រុមហ៊ុននេះ ក៏បានប្ដូរឈ្មោះទៅជា Cadillac Automobile Company។ រហូតដល់ការខិតខំជាលើកទី៣របស់លោកជាមួយនឹងក្រុមហ៊ុន Ford Motor Company ដែលដំណើរការណ៍ឆ្ពោះទៅរកការសាងសមិទ្ធផលប្រព្រឹត្តទៅដោយរលូន និងមានប្រសិទ្ធភាព។ លោក Ford គឺជាបុគ្គលមួយរូបដែលបានធ្វើបដិវត្តឧស្សាហកម្មគ្រឿងយន្ត និងមិនត្រឹមតែជាអ្នកផ្ដួចផ្ដើមគំនិតដំបូងទៅលើម៉ូដែលT (Model T) និងដំណើរការណ៍ផលិតក្នុងរោងចក្រនោះឡើយ តែគាត់ថែមទាំងជាអ្នកផ្ដួចផ្ដើមគំនិតទៅលើការប្រើប្រាស់គ្រឿងយន្តនៅតាមគ្រប់គេហដ្ឋាននីមួយៗផងដែរ។ ដូច្នេះ នាពេលក្រោយមក សមិទ្ធផលរបស់លោក បានដុះពន្លកឡើង ហើយម៉ូដែលTរបស់លោក ត្រូវបានលក់ដាច់អស់ជាង១៧លានគ្រឿង៕
ប្រែសម្រួល៖ ស្រីពៅ
ប្រភព៖ wanderlustworker
