៣ ជំហាន ជាសិល្បៈល្អបំផុតក្នុងការរិះគន់ បុគ្គលិកដែលធ្វើខុស !
ការសាងកំហុសនៅក្នុងដំណើរការឆ្ពោះទៅកាន់ការសាងសមិទ្ធផលផ្សេងៗនៅក្នុងក្រុមហ៊ុន តែងកើតមានឡើងដោយមិនអាចចៀសវាងបាន។ មកដល់ត្រង់ចំណុចនេះ ការតម្រែតម្រង់កែប្រែពួកគេឲ្យបំពេញការងាររបស់ខ្លួនដោយស្របជាមួយគោលការណ៍ និងគោលដៅរបស់អ្នក គឺជាជំហ៊ានបន្ទាប់ដែលអ្នកតែងតែធ្វើ។
ចំពោះការរិះគន់ ប្រសិនជាអ្នកធ្វើវាបានត្រឹមត្រូវ វានឹងតបស្នងមកវិញនូវទំនុកចិត្តពីបុគ្គលិក រឹតបន្តឹងចំណងសម្ពន្ធភាពរវាងអ្នកនិងពួកគេ ព្រមទាំងបំផុសនូវឆន្ទៈពួកគេឲ្យស្ដាប់រួចប្រតិបត្តិតាមការណែនាំរបស់អ្នក។ យ៉ាងណាមិញ ការរិះគន់ដែលធ្វើឡើងដោយមិនត្រឹមត្រូវ នឹងបំផ្លាញនូវចំណងរវាងអ្នកជាមួយពួកគេ ថែមទាំងខូចខាតដល់លទ្ធផលការងារនាពេលក្រោយផងដែរ។ ដូច្នេះ ថាតើការរិះគន់ត្រូវធ្វើឡើងតាមរបៀបណាទើបអាចអូសទាញបុគ្គលិកឲ្យយកចិត្តទុកដាក់ស្ដាប់បាន?
១) អូសទាញបុគ្គលម្នាក់នោះឲ្យគិតគូរពីដំណោះស្រាយដ៏ជាក់លាក់សម្រាប់បញ្ហានោះ៖ ជាញឹកញាប់ ថ្នាក់លើតែងធ្វើការរិះគន់ចំពោះអ្នកក្រោមបង្គាប់ណា ដែលបំពេញការងារមិនស្របទៅតាមការចង់បានរបស់ខ្លួន ដោយបញ្ចប់នូវភាពមិនច្បាស់លាស់សម្រាប់បុគ្គលិក ថាតើពួកគេគួរដោះស្រាយបែបណាចំពោះបញ្ហាមួយនោះ និងថាតើថ្នាក់លើរបស់ខ្លួនរំពឹងចង់បានអ្វីឲ្យពិតប្រាកដពីលទ្ធផលការងារពួកគេ។ ដើម្បីកែប្រែកំហុសឆ្គងនេះ នៅពេលអ្នកសន្ទនាជាមួយពួកគេលើកឡើងពីកំហុសដែលពួកគេមាន អ្នកត្រូវបំផុសគេឲ្យគិតគូរពីចម្លើយនៃដំណោះស្រាយទៅកាន់សំណួរដែលជាបញ្ហានោះ គឺជាដំណោះស្រាយដែលជាវិធីរបស់ពួកគេ។ ការធ្វើបែបនេះ វាគឺជាការបង្ហាញពីការឲ្យតម្លៃរបស់អ្នកទៅលើគំនិតរបស់គេ ដែលនឹងជំរុញពួកគេឲ្យព្យាយាមកែប្រែកំហុសឲ្យបានល្អប្រសើរជាងមុន។
២) ផ្សារភ្ជាប់ទំនាក់ទំនងរវាងការរិះគន់និងអ្វីដែលសំខាន់បំផុតសម្រាប់ពួកគេ៖ នៅពេលដែលក្នុងស្ថាប័នក្រុមហ៊ុនមួយ មានទម្លាប់ធ្វើការរិះគន់បុគ្គលិកខ្លួន ដោយផ្សារភ្ជាប់ទំនាក់ទំនងរវាងការរិះគន់នោះទៅនឹងអ្វីដែលសំខាន់បំផុតសម្រាប់បុគ្គលិករបស់ខ្លួនម្នាក់ៗ វាជាការបង្ហាញអំពីការយកចិត្តទុកដាក់របស់អ្នក និងការផ្ដល់ភាពសំខាន់របស់អ្នកចំពោះអ្វីដែលសំខាន់សម្រាប់បុគ្គលិកអ្នក នោះលទ្ធផលដែលអ្នកទទួលបាន គឺជាការកែប្រែកំហុសដែលចេញពីចិត្តរបស់បុគ្គលិកមិនខាន។
៣) យកចិត្តទុកដាក់ចំពោះការចូលចិត្តរបស់បុគ្គលម្នាក់ៗ៖ ការចូលចិត្តនៅទីនេះ ចង់សំដៅលើវិធីដែលបុគ្គលម្នាក់ៗចូលចិត្តទទួលបាននូវការរិះគន់ពីអ្នក។ ឧទាហរណ៍ បុគ្គលខ្លះចង់ឲ្យអ្នករិះគន់ភ្លាមៗ ឯបុគ្គលខ្លះទៀតចូលចិត្តឲ្យអ្នកពន្យារទុកពេលក្រោយ។ អ្នកខ្លះចូលចិត្តឲ្យអ្នកនិយាយជាលក្ខណៈបុគ្គល ឬឯកជន បែបស្ងប់ស្ងាត់ រីឯអ្នកខ្លះចូលចិត្តឲ្យអ្នករិះគន់តាមការផ្ញើសារជាដើម។ នៅពេលអ្នកធ្វើការរិះគន់ដោយគិតពីវិធីដែលពួកគេចង់ទទួលបាន ពួកគេនឹងពេញចិត្តក្នុងការកែប្រែកំហុសឆ្គងរបស់ខ្លួន ជួយអ្នកកសាងសមិទ្ធផលសម្រាប់ក្រុមហ៊ុនបានដោយជោគជ័យ៕
ប្រែសម្រួល៖ ស្រីពៅ
ប្រភព៖ harvardbusinessreview
