វិធីសាស្ត្រ៤យ៉ាង ដើម្បីចងចាំមេរៀន ដោយមិនចាំបាច់ប្រឹងទន្ទេញបែកពពុះមាត់!
ខួរក្បាលរបស់អ្នកមិនមែនជាកុំព្យូទ័រដែលអាចផ្ទុកទិន្នន័យបានរាប់ពាន់ក្នុងពេលមិនដល់ប៉ុន្មានវិនាទីនោះទេ ដូច្នេះវិធីសាស្ត្រទន្ទេញប្រើប្រាស់សម្រាប់ការចងចាំទិន្នន័យ មិនអាចមានប្រសិទ្ធភាពបានក្នុងរយៈពេលវែងនោះទេ។ ការទន្ទេញគឺជាឧទាហរណ៍មួយនៃវិធីសាស្ត្រដែលអ្នកប្រើខួរក្បាលរបស់អ្នកបញ្ច្រាសពីវិធីធ្វើការតាមធម្មជាតិរបស់វា ហើយលទ្ធផលដែលអ្នកទទួលបានគឺជាភាពគ្មានប្រសិទ្ធផល និងការខាតបង់ពេលវេលា។
ខួរក្បាលរបស់អ្នកនឹងធ្វើការបានល្អបំផុត បើអ្នកចេះប្រើប្រាស់វាឲ្យបានត្រឹមត្រូវ។ អ្នករៀនសូត្រដ៏ឈ្លាសវៃមិនមែនប្រើវិធីសាស្ត្រទន្ទេញ ដើម្បីចងចាំទិន្នន័យមេរៀនទាំងឡាយនោះឡើយ ផ្ទុយទៅវិញពួកគេព្យាយាមស្វែងរកភាពជាប់ទាក់ទងគ្នានៃគំនិតក្នុងមេរៀនទាំងនោះ ដើម្បីចងចាំនិងយល់ស៊ីជម្រៅទៅលើអ្វីដែលខ្លួនបានរៀន។ ខាងក្រោមនេះគឺជាវិធីសាស្ត្រដ៏មានប្រសិទ្ធភាពមួយចំនួនសម្រាប់ចងចាំគ្រប់យ៉ាងនូវអ្វីដែលអ្នកបានរៀន៖
១) ការប្រើពាក្យប្រៀបធៀប៖ ចំពោះវិធីសាស្ត្រមួយនេះ អ្នកអាចភ្ជាប់ទំនាក់ទំនងជាមួយនឹងគំនិតណាមួយដែលអ្នកបានរៀនទៅនឹងអ្វីដែលអ្នកធ្លាប់យល់កន្លងមកក្នុងជីវិតរស់នៅជាក់ស្ដែង។ ជាឧទាហរណ៍ អ្នកអាចនឹកស្រមៃពីកុងទ័រល្បឿនឡានជាមួយនឹងសមីការដេរីវេដែលអ្នកកំពុងសិក្សា ឬស្រមៃពីហ្គេមPlink-Oជាមួយនឹងសមីការទ្វេធាជាដើម។
២) ការបង្កើតដ្យាក្រាម៖ ដ្យាក្រាមនឹងបង្ហាញនូវទិន្នន័យដែលមានភាពជាប់ទាក់ទងគ្នាអំពីប្រធានបទជាក់លាក់ណាមួយប្រៀបដូចជាគ្រួសារដូច្នោះ។ ឧទាហរណ៍ថាអ្នកកំពុងសិក្សាពីពាក្យភាសាអង់គ្លេសfather ដែលប្រែថាឪពុកក្នុងភាសាខ្មែរ ដូច្នេះអ្នកអាចចងចាំពាក្យនេះបាន ដោយគិតពីពាក្យផ្សេងៗទៀតដែលមានទំនាក់ទំនងនឹងវាដូចជា mother, sister, brother... រួចបង្កើតវាឡើងមកជាដ្យាក្រាមបែកមែកធាងក្រោមប្រធានបទជាក់លាក់តែមួយ។ ការធ្វើបែបនេះ នៅពេលអ្នកភ្លេចពីពាក្យណាមួយ អ្នកអាចហៅរកវាមកវិញបាន ដោយគ្រាន់តែនឹកដល់ពាក្យផ្សេងដែលមានទំនាក់ទំនងនឹងវាតែប៉ុណ្ណោះ។
៣) "វាដូចគ្នាត្រង់នេះ ប៉ុន្តែខុសគ្នាត្រង់នោះ"៖ វិធីសាស្ត្របែបនេះទាមទារឲ្យអ្នកភ្ជាប់ទំនាក់ទំនងនូវគំនិតក្នុងមេរៀនជាមួយនឹងអ្វីមួយផ្សេងទៀតដែលមានចំណុចដូចគ្នាណាមួយ ប៉ុន្តែខុសពីគ្នាត្រង់ចំណុចណាមួយ ដូចជាការនិយាយថា "វាដូចគ្នាត្រង់នេះ ប៉ុន្តែខុសគ្នាត្រង់នោះ"។ ឧទាហរណ៍ថា "ការបង្កើនល្បឿនដូចគ្នាទៅនឹងទំនាញផែនដី ប៉ុន្តែខុសគ្នាត្រង់វាអាចទៅតាមទិសដៅណាក៏បាន"។ អ្នកមិនចាំបាច់ទាមទារខ្លួនឯងនូវព័ត៌មានដែលអ្នកភ្ជាប់ទំនាក់ទំនងនោះឲ្យបានត្រឹមត្រូវ១០០%នោះទេ ត្រឹមតែកុំឃ្លាតឆ្ងាយពីការពិតពេកទៅបានហើយ សំខាន់ការបង្កើតទំនាក់ទំនងបែបច្នៃប្រឌិតឡើងនឹងបំផុសនូវការចងចាំរបស់អ្នកកាន់តែប្រសើរឡើង។
៤) ប្រើរូបារម្មណ៍ស្រមើស្រមៃ៖ ព័ត៌មានដែលមានរូបភាពកាន់តែច្បាស់ នោះការចងចាំនិងសមត្ថភាពក្នុងការយល់ដឹងរបស់អ្នកចំពោះវាក៏មានភាពច្បាស់លាស់ និងស្ថិតបានយូរអង្វែងដូចគ្នាដែរ។ ថ្វីដ្បិតតែអ្នកមិនអាចមើលឃើញវាបានជាក់ស្ដែងផ្ទាល់នឹងភ្នែក ឬប៉ះពាល់ដោយផ្ទាល់តាមញ្ញាណទាំង៥បាន ប៉ុន្តែមនុស្សយើងម្នាក់ៗមានរបស់ដ៏មានតម្លៃសម្គាល់នូវភាពពិសេសរបស់មនុស្សដែលជារូបារម្មណ៍ ឬការនឹកស្រមៃនោះឯង។ អ្នកអាចប្រើការស្រមៃរបស់អ្នកនឹកគិតពីរូបភាពនៃព័ត៌មានដែលអ្នកទទួលបានមកចាក់បញ្ចាំងនៅក្នុងខួរក្បាលរបស់អ្នក ដែលនឹងជួយឲ្យអារម្មណ៍អ្នកដក់ជាប់នឹងព័ត៌មាននោះ ឯការចងចាំរបស់អ្នកក៏នឹងមានរយៈកាលយូរទៅតាមនោះដែរ៕
ប្រែសម្រួល៖ ស្រីពៅ ប្រភព៖ thinksimplenow
