រឿងរ៉ាវសំខាន់ៗ៧យ៉ាងដែលអ្នកគួរយល់ដឹងពីមហាវីរបុរសចិន ម៉ៅ សេទុង
ក្រៅពីត្រូវបានមនុស្សទូទាំងសកលលោកស្គាល់ពីប្រវត្តិសាស្ត្ររបស់មេដឹកនាំផ្ដាច់ការរបស់ប្រទេសចិន ម៉ៅ សេទុង ថែមទាំងជាមហាវីរបុរសមួយរូបដែលជាស្ថាបនិកបង្កើតសាធារណរដ្ឋប្រជាមានិតចិន ព្រមទាំងបានប្រើគ្រប់មធ្យោបាយដើម្បីការពារប្រទេសរបស់ខ្លួន ពីការជ្រៀតចូលវាយលុកពីបរទេស និងបង្កើតនូវគោលនយោបាយដើម្បីពន្លឿនការអភិវឌ្ឍន៍ផ្នែកកសិកម្ម និងឧស្សាហកម្មផងដែរ។ តើរឿងរ៉ាវពិតរបស់មហាវីរបុរសរបស់ប្រទេសចិនរូបនេះ មានចំណុចដែលគួរឲ្យចាប់អារម្មណ៍អ្វីខ្លះដែលអ្នកគួរស្វែងយល់បន្ថែម ?
១) ជាក្មេងកើតក្នុងត្រកូលអ្នកស្រែចម្ការដ៏សាមញ្ញម្នាក់ ភាពមានចក្ខុវិស័យវែងឆ្ងាយ បានជំរុញគាត់ឲ្យចូលរួមបង្កើតគណបក្សកុម្មុយនិស្តចិន Chinese Communist Party (CCP) ក្នុងឆ្នាំ១៩២១ កំឡុងពេលបន្តការសិក្សានៅសាកលវិទ្យាល័យក្នុងទីក្រុងប៉េកាំង។
២) ដំបូងឡើយក្នុងឆ្នាំ១៩២៣ គណបក្សជាតិនិយមចិន Chinese Nationalist Party ឬ Kuomintang nationalist party (KMT) បង្កើតដោយបិតាស្ថាបនិកសាធារណរដ្ឋចិន លោក ស៊ុន យ៉ាតសេន និងគណបក្សកុម្មុយនិស្តចិន(CCP) គឺជាសម្ព័ន្ធមិត្តរួមបក្សជាមួយគ្នា ដើម្បីកម្ចាត់ស្ដេចត្រាញ់ដែលគ្រប់គ្រងទៅលើផ្នែកដ៏ច្រើននៃប៉ែកខាងជើងប្រទេសចិន។ តែក្រោយពីការស្លាប់របស់ស្ថាបនិករបស់គណបក្សជាតិនិយម ស៊ុត យ៉ាតសេនក្នុងឆ្នាំ១៩២៥ទៅ លោក ចៀង កាយជៀកក៏ចូលមកបន្តតំណែង ដឹកនាំការលុបបំបាត់ចោលនូវមនោគមន៍កុម្មុយនិស្តក្នុងឆ្នាំ១៩២៨ ដែលជម្លោះផ្ទៃក្នុងនេះបានបង្កជាសង្គ្រាមសីុវិល រហូតដល់គណបក្សទាំង២បែកចេញពីគ្នាក្នុងឆ្នាំ១៩៤៦។
៣) លោក ចៀង កាយជៀកជាអ្នកប្រកាន់នូវគំនិតអភិរក្សនិយម ដែលនេះធ្វើឲ្យមេដឹកនាំគណបក្សកុំមុយនិស ម៉ៅ សេទុងមិនសូវជាមានការពេញចិត្តនឹងលោកប៉ុន្មាននោះឡើយ។
៤) បើទោះជាគណបក្សទាំងពីរធ្វើពុតជាសម្ព័ន្ធមិត្តនឹងគ្នាស្របពេលមានជម្លោះផ្ទៃក្នុង អំឡុងពេលមានសង្គ្រាមជាមួយប្រទេសជប៉ុនចាប់ពីឆ្នាំ១៩៣៧ដល់ឆ្នាំ១៩៤៥ក៏ដោយ ក៏បន្ទាប់ពីបញ្ចប់សង្គ្រាមលោកលើកទី២នេះទៅ សង្គ្រាមសីុវិលក៏បានផ្ទុះឡើងរវាងគណបក្សទាំងពីរ ហើយគណបក្សរបស់ម៉ៅ សេទុងក៏ទទួលបានជ័យជម្នះ ព្រមទាំងប្រកាសនូវការចាប់កំណើតឡើងនៃសាធារណរដ្ឋប្រជាមានិតចិនក៏បានធ្វើឡើងនាថ្ងៃទី១ ខែមករា ឆ្នាំ១៩៤៩។ ឯលោក ចៀង កាយជៀក និងសមាជិករួមគណបក្សតែមួយដទៃទៀត ភៀសខ្លួនទៅនៅលើទឹកដីតៃវ៉ាន់។
៥) ក្រោមការដឹកនាំបែបកុម្មុយនិស្តដោយដើរតាមមនោគមន៍របស់លេនីន អ្នកធ្វើបដិវត្តរបស់រុស្ស៊ី ម៉ៅ សេទុងបានបំផុសនូវយុទ្ធនាការ "មហាលោតផ្លោះមហាអស្ចារ្យ" ឬ«Great Leap Forward» ក្នុងឆ្នាំ១៩៥៨ ក្នុងគោលដៅឆ្ពោះតម្រង់ទៅរកការអភិវឌ្ឍន៍ផលិតកម្មកសិកម្ម និងឧស្សាហកម្ម តែត្រូវបញ្ចប់ដោយការស្លាប់បាត់បង់ជីវិតប្រជាជនអស់ប្រមាណ៤០លាននាក់ដោយការអត់ឃ្លាន ដោយសារជាអកុសលនៃគ្រោះទឹកជំនន់ និងភាពមិនអំណោយផលនៃទិន្នផលកសិកម្ម។
៦) ភាពបរាជ័យដ៏ធំធេងដល់ប្រជាជាតិខ្លួននេះ បាននាំភាពអាម៉ាស់ជាខ្លាំងដល់មេដឹកនាំផ្ដាច់ការរូបនេះ ទើបជំរុញឲ្យមានកម្លាំងសម្រាប់បំផុសនូវការបដិវត្តន៍វប្បធម៌ (Cultural Revolution) កើតឡើងជាថ្មី នាឆ្នាំ១៩៦៦។ តែការបដិវត្តន៍នេះក៏បាននាំមកនូវការស្លាប់បាត់បង់ជីវិតអស់ប្រជាជាតិចំនួន១លាននាក់កន្លះទៅទៀត ឯកេរ្តិ៍មរតកវប្បធម៌ជាច្រើនរបស់ប្រទេសក៏ត្រូវបានបំផ្លាញផងដែរ រួមទាំងភាពឥតសណ្ដាប់ធ្នាប់នៃសេដ្ឋកិច្ច និងសង្គមពេញមួយផ្ទៃប្រទេសថែមទៀត។
៧) អ្នកដឹកនាំម៉ៅ បានស្លាប់នៅថ្ងៃទី៩ ខែកញ្ញា ឆ្នាំ១៩៧៦ ដោយសារបញ្ហាសុខភាព។ ឯគោលបំណងរបស់គាត់ដែលចង់បិទផ្លូវពាណិជ្ជកម្ម និងទីផ្សាររបស់ចិនក៏មិនត្រូវបានអ្នកបន្តតំណែងក្រោយៗមកទៀត គាំទ្រនោះដែរ៕
ប្រែសម្រួល៖ ស្រីពៅ
ប្រភព៖ www.bbc.co.uk & www.factslegend.org
