ហេតុអ្វីបានជាការអប់រំពិតជាមានសារៈសំខាន់សម្រាប់ភាពជោគជ័យ?
ហេតុអ្វីបានជាការអប់រំពិតជាមានសារៈសំខាន់សម្រាប់ភាពជោគជ័យ? ប្រសិនវាពិតជាមានសារៈសំខាន់មែន តើវាសំខាន់ដល់កម្រិតណា?
គេតែងនិយាយថា ការអប់រំជាវិធីមួយ ដើម្បីរំដោះមនុស្សចេញពីភាពល្ងង់ខ្លៅ និង អវិជ្ជា ទៅជាមនុស្សភ្លឺស្វាងក្នុងជីវិត។ ភ្លឺស្វាងក្នុងជីវិត ព្រោះមិនងាយចាញ់បោកគេ (មានមូលដ្ឋានគិតគ្រប់គ្រាន់) ព្រោះអាចបែងចែកអ្វីល្អ និងអាកក្រក់ប្រសើរជាងមុន ហើយក៏អាចមានការងារល្អ និង ប្រាក់ចំណូលប្រសើរជាងមុន។ ការអប់រំផ្តល់អត្ថប្រយោជន៍ដល់ជីវិតផ្ទាល់ខ្លួននិងអាជីពការងារជាច្រើន។ ការបញ្ចប់ការសិក្សាថ្នាក់កម្រិតខ្ពស់បង្ហាញថាអ្នកជាមនុស្សដែលមានការប្ដេជ្ញាចិត្តខ្ពស់និងបានប្រើប្រាស់ទ្រឹស្ដី និង គំនិតល្អៗក្នុងការសម្រេចគោលដៅជាច្រើន។
ប្រសិនជាអ្នករៀនកាន់តែច្រើន អ្នកនឹងចេះកាន់តែច្រើន។ ប្រសិនជាអ្នកបញ្ចប់ការសិក្សាថ្នាក់ខ្ពស់ ប្រាក់ខែរបស់អ្នកក៏អាចខ្ពស់ជាងអ្នកដទៃដែរ ប៉ុន្តែត្រូវប្រាកដថា ចំណេះដឹងរបស់អ្នកពិតជាខ្ពស់ដូចកម្រិតសិក្សានោះមែន បើមិនអ៊ីចឹងហើយ គឺមានតែសញ្ញាប័ត្រ តែគ្មានសញ្ញាឃើញ (សំដៅលើអ្វីដែលអ្នកចេះពិតប្រាកដ និង អាចធ្វើបាន)។ ដូច្នេះ សិស្សទាំងអស់ក៏ត្រូវការបទពិសោធន៍ការងារដែរ មិនមែនរៀនតែនៅសាលានោះទេ ព្រោះសាលាភាគច្រើនបង្រៀនតែទ្រឹស្តីប៉ុណ្ណោះ អ៊ីចឹងហើយ ត្រូវតែព្យាយាមចូលប្រឡូកក្នុងកិច្ចការផ្សេងៗក្នុងសង្គម ដើម្បីប្រាកដថា អ្នកមានបទពិសោធន៍ និង ចំណេះដឹងគ្រប់គ្រាន់ក្រោយបញ្ចប់ការសិក្សា។ បើនិយាយពីប្រទេសនីមួយៗលើលោកនេះ គេកម្រឃើញប្រទេសណាមួយដែលមានការរីកចម្រើន ដោយមិនមានប្រជាជនចេះដឹងណាស់។
មិនបាច់និយាយប្រទេសណាឆ្ងាយនោះទេ គឺមើលត្រឹមតែសិង្ហបុរី គេដឹងយ៉ាងច្បាស់អំពី សារសំខាន់នៃការអប់រំ ព្រោះបើកូនប្រទេសតូចមួយសោះ តែអាចក្លាយជាប្រទេសដ៏រីកចម្រើន ហើយជីវភាព និង កម្រិតចំណេះដឹងរបស់ប្រជាជនសិង្ហបុរីវិញ គឺមិនចាញ់ពួកលោកខាងលិចនោះទេ។ ដូច្នេះហើយ ដើម្បីក្លាយជាមនុស្សម្នាក់ដែលមានប្រយោជន៍ គឺត្រូវតែព្យាយាមសិក្សារៀនសូត្រឲ្យបានច្រើន។ ពាក្យថា រៀននេះ មិនមែនចាំតែធ្វើនៅសាលាតែម្យ៉ាងនោះទេ បើអ្នកតាំងចិត្តក្នុងការៀន និង បើកចិត្តឲ្យទូលាយក្នុងការទទួលយកចំណេះដឹង ដើម្បីអភិវឌ្ឍន៍ខ្លួននោះ ទីណាក៏អាចជាកន្លែងរៀនសូត្របានដែរ៕
ប្រែសម្រួល៖ អឹុង មុយយូ ប្រភព៖ www.verywell.com
