មេរៀនអំពីការផ្លាស់ប្ដូរខ្លួនឯងពីសៀវភៅ"ឧបនិស្ស័យ៧ប្រការសម្រាប់បុគ្គលឆ្នើម" របស់បណ្ឌិត ស្ទីហ្វិន ខូវិយ៍ (Stephen R.Covey)
គតិបណ្ឌិតមួយនាសម័យកាលនៃទស្សនវិជ្ជាដ៏មានអរិយធម៌របស់ក្រិករបស់ទស្សនវិទូ ផ្លាតុង មានសេចក្ដីថា "ជ័យជម្នះលើខ្លួនឯងគឺជាជ័យជម្នះដំបូងនិងថ្លៃថ្លាជាងគេបង្អស់"។ ត្រង់ទស្សនវិជ្ជានេះ ស្នាដៃនិពន្ធរបស់កវីនិពន្ធសញ្ជាតិអាមេរិកប្រកបដោយការយល់ដឹងពីអត្ថន័យនៃជីវិតដ៏ស៊ីជម្រៅមួយរូប ដែលត្រូវបានមនុស្សទូទាំងសកលលោកស្គាល់លោកជា បណ្ឌិត ស្ទីហ្វិន ខូវិយ៍ (Stephen R.Covey) ក្នុងសៀវភៅចំណងជើងថា "ឧបនិស្ស័យ៧ប្រការសម្រាប់បុគ្គលឆ្នើម" បានដាស់តឿនមនុស្សក្នុងសម័យកាលនេះ ឲ្យភ្ញាក់រលឹកងាកមកពិចារណាពីរបៀបដែលពួកគេប្រើប្រាស់ជីវិតរបស់ខ្លួនដោយមិនត្រឹមត្រូវ ដែលជាលទ្ធផលនៃសេចក្ដីទុក្ខនិងភាពមិនសមបំណងទាំងឡាយរបស់ខ្លួន។
បើទោះជាលោកបានទទួលអនិច្ចកម្មកាលពីឆ្នាំ២០១២ទៅហើយក្ដី ក៏ស្នាដៃនិពន្ធមួយក្បាលនេះរបស់លោកនៅតែមានវិញ្ញាណរស់រវើកជានិច្ច ដែលបានជាប់ក្នុងតារាងជាសៀវភៅដែលលក់ដាច់បំផុតក្នុងពេល២៥០សប្ដាហ៍ជាប់គ្នា និងមានកំណត់ត្រាលក់បានលើសពី២៥លានច្បាប់ និងបកប្រែជាភាសាផ្សេងៗចំនួន៤០ភាសានៅជុំវិញពិភពលោក ហើយលោកក៏ត្រូវបានទស្សនាវដ្ដីTime Magazine ទទួលស្គាល់ជាបុគ្គលដ៏មានឥទ្ធិពលបំផុតទាំង២៥រូបរបស់អាមេរិកផងដែរ។ តើខ្លឹមសារនៃសៀវភៅនេះមានអ្វីពិសេសទើបធ្វើឲ្យអ្នកអានជាច្រើននាក់បានផ្លាស់ប្ដូរជីវិតប្រែជាវិជ្ជមានបែបនេះ ? នៅក្នុងខ្លឹមសារសៀវភៅនេះ បុគ្គលឆ្នើមម្នាក់ត្រូវតែសម្រេចឲ្យបាននូវឧបនិស្ស័យទាំង៧ជាមុនសិន។
ឧបនិស្ស័យ៣ដំបូងបង្អស់ ផ្ដោតជាសំខាន់ទៅលើការផ្លាស់ប្ដូរខ្លួនឯងដែលជាជ័យជម្នះលើខ្លួនឯងនេះតែម្ដង ទើបឧបនិស្ស័យ៣បន្ទាប់ជាជ័យជម្នះលើអ្នកដទៃក្នុងការប្រាស្រ័យទាក់ទងជាមួយមនុស្ស និងឧបនិស្ស័យចុងក្រោយជាការសំលៀងឲ្យមុតឡើងវិញជាប្រចាំនូវឧបនិស្ស័យទាំង៦ខាងដើម។ យ៉ាងណាមិញ នៅទីនេះនឹងផ្ដោតជាសំខាន់ទៅលើជ័យជម្នះលើខ្លួនឯងសិនតែប៉ុណ្ណោះ។ គាត់មិនមែនផ្ដោតសំខាន់ជាដំបូងទៅលើជ័យជម្នះលើខ្លួនឯងជាមួយឧបនិស្ស័យ៣ដោយគ្មានមូលហេតុនោះឡើយ។ មនុស្សយើងតែងធ្វើការផ្លាស់ប្ដូរជីវិតរបស់ពួកគេដោយផ្ដើមពីក្រៅចូលទៅក្នុង។ ពួកគេបន្ទោសមេឃ បន្ទោសដី មកពីអ្នកនេះ អ្នកនោះ ស្ថានការណ៍នេះឬនោះ ប៉ុន្តែមិនដែលបន្ទោសខ្លួនឯង ឫចង់ឲ្យខាងក្រៅផ្លាស់ប្ដូរ ប៉ុន្តែមិនគិតផ្លាស់ប្ដូរខ្លួនឯងនោះទេ។
នេះហើយដែលគេកំពុងផ្លាស់ប្ដូរជីវិតខ្លួនឯងដោយផ្ដើមពីក្រៅចូលទៅក្នុងនោះ ហើយវាគ្រាន់តែបង្ខាតពេលវេលានិងកម្លាំងខ្លួនឯងចោលដោយឥតប្រយោជន៍ប៉ុណ្ណោះ។ មនុស្សដែលខ្វះសមត្ថភាព បើទោះជាស្ថានការណ៍ខាងក្រៅអំណោយផលល្អដល់គេប៉ុណ្ណា ក៏ពួកគេនៅតែធ្វើមិនបានល្អនោះដែរ។ ការមិនទទួលស្គាល់ការពិតពីភាពល្ងង់ខ្លៅ និងកំហុសរបស់ខ្លួនគឺជារឿងគ្រោះថ្នាក់បំផុត ដែលរារាំងភាពរុងរឿងចូលមកដុះផ្លែផ្កាក្នុងជីវិតពួកគេដោយខ្លួនឯង។
សូក្រាតក៏បាននិយាយដែរថា "ជីវិតដែលមិនមានការត្រួតពិនិត្យពិចារណាទេនោះ វាគ្រាន់តែជាការរស់នៅដែលឥតមានតម្លៃប៉ុណ្ណោះ"។ បើអ្នកមើលមិនឃើញ និងថែមទាំងមិនទទួលស្គាល់ពីចំណុចខ្វះខាតរបស់ខ្លួនទេ អ្នកនឹងគ្មានថ្ងៃអាចរីកចម្រើន និងសម្រេចដល់គោលដៅបានឡើយ។ ចំណុចសំខាន់មួយទៀតអំពីខ្លឹមសារដែលលោក ស្ទីហ្វិនចង់ដាស់តឿនដល់មនុស្សលោកគឺជាការមិនចេះបែងចែកឲ្យបានត្រឹមត្រូវថាកិច្ចការអ្វីដែលសំខាន់ និងអ្វីដែលត្រឹមតែជាកិច្ចការបន្ទាន់។ ដូចជាអ្នកខ្លះឲ្យអាទិភាពទៅលើការងាររបស់ខ្លួននិងប្រឹងប្រែងរកលុយតែម្យ៉ាង ដោយយល់ច្រឡំថាទ្រព្យសម្បត្តិនឹងនាំសុភមង្គលមកគ្រួសាររបស់ពួកគេ។ ប៉ុន្តែវាមិនមែនបែបនេះនោះទេ តែជាពេលវេលាដែលពួកគេលះបង់ដើម្បីចំណាយជាមួយគ្រួសារទៅវិញទេ ទោះតិចក្ដី ទើបធ្វើឲ្យពួកគេមានសុភមង្គលពិតប្រាកដ។ តែគួរឲ្យសោកសង្រេងណាស់ដែលមានមនុស្សមិនតិចទេដែលកំពុងឈ្លក់វង្វេងនឹងការរស់នៅជីវិតរបស់ខ្លួនក្នុងរបៀបបែបនេះ។
នៅពេលដែលអ្វីមួយដែលទាក់ទាញចិត្តពួកគេជារឿងខុស ឬមានន័យថាពួកគេផ្ដល់អាទិភាពទៅលើរឿងមិនត្រឹមត្រូវហើយ នោះអ្វីៗដែលមកតាមក្រោយក៏នឹងរត់ចូលមកក្នុងជីវិតពួកគេមិនត្រឹមត្រូវដូចគ្នា តួយ៉ាងដូចមនុស្សខាងលើដែលឲ្យតម្លៃលើលុយជាងទំនាក់ទំនងជាមួយមនុស្សសំខាន់ដូច្នោះ។ វាគឺជារឿងគួរឲ្យអស់សំណើចណាស់ដែលមនុស្សជាច្រើនចង់យកឈ្នះអ្នកដទៃ ទាំងដែលពួកគេខ្លួនឯងមិនទាន់ទាំងអាចយកឈ្នះលើខ្លួនឯងមុនផងនោះ៕
ប្រែសម្រួល៖ ស្រីពៅ ប្រភព៖ yourstory
