តើអ្នកយល់ថាការពិត១០០ភាគរយពិតជាមានអត្ថិភាពនៅលើលោកនេះទេ ?
តើនៅលើលោកនេះមានការពិត១០០ភាគរយទេ ឬការពិតគ្រាន់តែជាការសន្មតរបស់បុគ្គលម្នាក់ៗដែលយល់ថាអ្វីមួយត្រូវឬខុសទៅតាមការយល់ឃើញរបស់ខ្លួន ? ទស្សនវិទូនិងអ្នកវិទ្យាសាស្ត្រសុទ្ធតែជឿជាក់ថានៅលើលោកនេះមានការពិត១០០ភាគរយ ហើយទិសដៅរបស់មនុស្ស២ក្រុមនេះតាំងពីដើមមកក៏កំពុងដើរនៅលើផ្លូវមួយឆ្ពោះទៅរកការស្វែងរកឃើញនូវសេចក្ដីពិតនៃអ្វីៗដែលកើតឡើងនៅជុំវិញខ្លួនមនុស្សនេះឯង។ តើអ្វីទៅជាការពិត ?
តាមអារីស្តូត ដែលជាទស្សនវិទូលោកខាងលិចរបស់ក្រិកបុរាណ បានផ្ដល់និយមន័យថា អំណះអំណាងណាមួយគឺជាការពិតនៅពេលវាឆ្លុះបញ្ចាំងពីតថភាពពិត។ នេះមានន័យថា ជំនឿអ្វីមួយចាត់ទុកថាជាការពិតនៅពេលគេមើលឃើញថាវាត្រឹមត្រូវសមស្របទៅនឹងការពិត។ យ៉ាងណាមិញ យើងមិនអាចអះអាងដោយការជឿជាក់ពេញទំហឹងបានថាការសន្និដ្ឋានរបស់យើងគឺជាការពិត១០០ភាគរយនោះទេ វាអាចគ្រាន់តែជាជំនឿប្រកបដោយភាពសមហេតុសមផល ដែលឆ្លុះបញ្ចាំងពីការពិតប៉ុណ្ណោះ។
ការជជែកវែកញែកមតិគ្នារវាងមនុស្ស១ក្រុមដែលជឿជាក់ថាការពិត១០០ភាគរយពិតជាមាននៅក្នុងលោកនេះ និងមនុស្ស១ក្រុមទៀតដែលជាអ្នកប្រឆាំងទៅនឹងអត្ថិភាពនៃព្រះជាម្ចាស់ ជឿជាក់ថាការពិតគឺជាភាពជាប់ពាក់ព័ន្ធគ្នា ការពិត១០០ភាគរយមិនមានពិតប្រាកដនោះឡើយ ឯព្រះជាម្ចាស់ឬគោលការណ៍ក្រមសីលធម៌កំណត់លើឥរិយាបថរបស់មនុស្សក៏មិនមានដូចគ្នា ដូច្នេះមនុស្សម្នាក់ៗអាចធ្វើអ្វីក៏បានទៅតាមការយល់ឃើញរបស់ខ្លួនគិតថាត្រឹមត្រូវ។
អ្នកជឿជាក់ទៅលើអត្ថិភាពនៃការពិត១០០ភាគរយ ប្រឆាំងទៅនឹងគំនិតរបស់អ្នកជឿជាក់ទៅលើការពិតជាភាពជាប់ពាក់ព័ន្ធគ្នាដោយលើកឡើងថា អ្នកជឿថាការពិតជាភាពជាក់ពាក់ព័ន្ធគ្នា ហើយនៅលើលោកនេះគ្មានការពិតទាំងស្រុងអ្វីឡើយ ពួកគេអះអាងជំនឿរបស់ខ្លួនជារឿងត្រឹមត្រូវ។ ការអះអាងថាអ្វីមួយត្រឹមត្រូវ ទាល់តែអ្នកអះអាងថាអ្វីនោះជាការពិត ទើបវាត្រឹមត្រូវបាន។ ដូច្នេះ ពួកគេទាំងនេះកំពុងមានទំនាស់ប្រឆាំងជាមួយជំនឿរបស់ខ្លួនហើយ។
បើការពិតមិនមានពិតប្រាកដនោះទេ ហើយជាភាពជាប់ពាក់ព័ន្ធគ្នា ប៉ុន្តែអ្វីដែលជាប់ពាក់ព័ន្ធគ្នាមិនមែនជាការពិតនោះទេ នោះមានន័យថាអ្វីដែលអ្នកទាំងនេះកំពុងជឿមិនមែនជាការពិតនោះទេ។ ដរាបណាពួកគេកាន់តែអះអាងគាំទ្រពីជំនឿនៃការពិតជាភាពជាប់ពាក់ព័ន្ធគ្នាប៉ុណ្ណា ពួកគេនឹងកាន់តែមានទំនាស់ជាមួយនឹងគំនិតរបស់ខ្លួនកាន់តែខ្លាំងប៉ុននោះ ហើយវាក៏នឹងកាន់តែបកស្រាយនូវភស្តុតាងពីអត្ថិភាពនៃការពិត១០០ភាគរយថាជាការពិតប៉ុននោះដែរ។ និយាយអំពីគោលការណ៍ក្រមសីលធម៌កំណត់លើភាពត្រឹមត្រូវឬខុសនៃអាកប្បកិរិយារបស់មនុស្ស អ្នកជឿទៅលើការពិតជាភាពជាប់ពាក់ព័ន្ធគ្នានេះ អះអាងថាគ្មានអ្វីខុសហើយក៏គ្មានអ្វីត្រូវដែរ នៅពេលអ្នកជឿថាមានការពិត១០០ភាគរយប្រាប់ពួកគេថាទង្វើអ្វីមួយដែលពួកគេកំពុងធ្វើមិនត្រឹមត្រូវនោះទេ។ បើពួកគេជឿថាគ្មានអ្វីខុសអ្វីត្រូវ ដូច្នេះហេតុអ្វីក៏ពួកគេចាំបាច់ប្រឆាំងជាមួយការលើកឡើងរបស់អ្នកដែលប្រាប់ពួកគេថាទង្វើពួកគេមិនត្រឹមត្រូវដើម្បីអ្វី ? តាមទស្សនវិជ្ជា ជំនឿនៃភាពជាប់ពាក់ព័ន្ធគ្នាមានទំនាស់ប្រឆាំងនឹងខ្លួនឯង និងបើតាមការប្រតិបត្តិជាក់ស្ដែង ជំនឿនេះនឹងបង្កជាលក្ខណៈអនាធិបតេយ្យ៕
ប្រែសម្រួល៖ ស្រីពៅ
ប្រភព៖ allaboutphilosophy & ethicalrealism
