បើមានសញ្ញា៤យ៉ាងនេះ មានន័យថាអ្នកជាមនុស្សត្រចៀកស
មនុស្សត្រចៀកស ជាមនុស្សដែលងាយនឹងចាញ់បោកគេខ្លាំងណាស់ ព្រោះពួកគេខ្វះមូលដ្ឋានក្នុងការគិតត្រិះរិះពិចារណាឲ្យបានវែងឆ្ងាយ។ ដោយសារឆាប់ជឿគេពេក ដោយខ្វះការគិតបែបនេះហើយ បានជាវានាំមកនូវបញ្ហាស្មុគស្មាញជាច្រើននៅក្នុងជីវិត។ ខាងក្រោមនេះ ជាសញ្ញាមួយចំនួននៃមនុស្សត្រចៀកស៖
១) ចូលចិត្តស្ដាប់សម្ដីផ្អែម៖ មនុស្សត្រចៀកសភាគច្រើន ចូលចិត្តពាក្យសម្ដីណាផ្អែមៗ ឬ ចូលចិត្តស្ដាប់អ្នកដែលនិយាយពីរោះ ដោយភ្លេចគិតអំពីដំណើរដើមទងនៃហេតុការណ៍។ អ៊ីចឹងហើយបានជា គេអាចបោកងាយបានយ៉ាងងាយ ព្រោះគ្រាន់តែនិយាយផ្អែមគឺដឹងតែជឿតែម្តង ដោយមិនគិតលើហេតុផលអ្វីនោះឡើយ។
២) ចូលចិត្តវាយតម្លៃដោយផ្អែកលើរូបភាពតូចមួយ៖ ដូចពាក្យចាស់គេពោលថា កុំវាយតម្លៃសៀវភៅមួយក្បាល ដោយផ្អែកទៅលើគម្របរបស់វា។ ឃ្លានេះមានន័យថា គម្របសៀវភៅ វាប្រៀបដូចជា រូបភាពតូចមួយនៃហេតុការណ៍ប៉ុណ្ណោះ ដូច្នេះហើយយើងមិនអាចវាយតម្លៃអ្វីៗដោយផ្អែកទៅលើវាបានឡើយ។ ប៉ុន្តែមនុស្សត្រចៀកស គឺមិនចូលចិត្តមើលឲ្យឆ្ងាយជាងនេះនោះឡើយ ពោលគឺឃើញជ្រុងតូចមួយនៃហេតុការណ៍ ឬ ឮនរណាម្នាក់និយាយអំពីជ្រុងតូចមួយនៃព្រឹត្តិការណ៍ទាំងមូល ក៏ជឿ ឬ វាយតម្លៃសរុបតែម្ដង។
៣) គិតខ្លី៖ មនុស្សត្រចៀកស មិនដែលមានគំនិតវែងដូចគេនោះឡើយ ពោលគឺគិតអ្វីបានតែរាកៗប៉ុណ្ណោះ ដូច្នេះហើយបានជាងាយនឹងជឿសម្ដីគេ ដែលនាំទៅរកការចាញ់បោកគេ ឬ ត្រូវបានគេបោកប្រើក៏មាន។
៤) ចូលចិត្តផ្អើលតាមគេ ឬ ធ្វើតាមគេ៖ មនុស្សដែលចូលចិត្តធ្វើតាមគេ ឬ ផ្អើលតាមគេនេះ ក៏អាចនិយាយថា ជាមនុស្សត្រចៀកសបានដែរ ព្រោះពួកគេមិនអាចគិតអ្វីឲ្យជ្រៅ ឬ គិតលើអ្វីដែលជាសមត្ថភាព និង លក្ខណៈពិសេសរបស់ខ្លួនឡើយ ពោលគឺឮគេនិយាយអ្វីក៏ថាតាមគេ ឃើញគេធ្វើអ្វីក៏ធ្វើតាមគេ អ៊ីចឹងហើយបានជារកមិនឃើញផ្លូវរបស់ខ្លួនឯង៕
ដោយ៖ រតនា វិចិត្រ
