ឥទ្ធិពល៣យ៉ាងដែលបច្ចេកវិទ្យាទំនើបធ្វើឲ្យមនុស្សកាន់តែល្ងង់ជាងមុន
ស្របពេលដែលពេលវេលាចេះតែរំកិលទៅមុខ យើងជាមនុស្សជាតិរស់នៅក្នុងសហគមន៍រួមមួយនៃផែនដីនេះក៏មើលឃើញពីដំណើរការណ៍ដែលចេះតែរីកចម្រើនទៅមុខនៅតាមផ្នែកផ្សេងៗដូចគ្នាដែរ។ ចំពោះឥទ្ធិពលអវិជ្ជមានដែលជះមកលើការផ្លាស់ប្ដូរបែបបទនៃការរស់នៅរបស់មនុស្សសម័យទំនើប យើងមិនគួរបន្ទោសទាំងស្រុងសោះឡើយទៅលើភាពរីកចម្រើននៃបច្ចេកវិទ្យាដែលហាក់ដូចជាវេទមន្តដ៏អស្ចារ្យ នាំយកអ្វីៗមកនៅលើបាតដៃរបស់មនុស្សយ៉ាងងាយស្រួលនោះ។
បច្ចេកវិទ្យាពុំបានបំផ្លាញមនុស្សនោះទេ គឺមនុស្សខ្លួនឯងនេះហើយជាអ្នកបំផ្លាញខ្លួនឯង។ អ្វីៗស្ថិតនៅលើខ្លួនឯងថាតើអ្នកប្រើប្រាស់វាដោយរបៀបណាតែប៉ុណ្ណោះ អ្នកគ្រប់គ្រងទៅលើវា ឬឲ្យវាជាអ្នកគ្រប់គ្រងមកលើអ្នកយ៉ាងនេះឯង។ នៅពេលមនុស្សបានឲ្យវាគ្រប់គ្រងមកលើខ្លួនឯង នោះពួកគេនឹងទទួលរងនូវឥទ្ធិពលដូចនឹង៣ចំណុចខាងក្រោមនេះ៖
១) ការរំខានមិនដាច់៖ សាស្ត្រាចារ្យផ្នែកចិត្តសាស្ត្រ លោក Glenn Wilsonបានលើកឡើងថា អ្នកបានបាត់បង់១០ភាគរយនៃប្រសិទ្ធភាពដែលមាននៅក្នុងកម្រិតភាពឈ្លាសវៃ ឬ IQរបស់អ្នក ដោយគ្រាន់តែទទួលការរំខានពីសារតែមួយប៉ុណ្ណោះ ស្របពេលដែលអ្នកកំពុងព្យាយាមបញ្ចប់កិច្ចការរបស់អ្នក។ ចុះអំឡុងពេលនៃការផ្ចង់ស្មារតីទៅលើការបំពេញការងារ តើអ្នកទទួលការរំខានប៉ុន្មានដងពីសារក្នុងទូរស័ព្ទរបស់អ្នក ? ហើយតើខួរក្បាលរបស់អ្នកត្រូវបាត់បង់ថាមពលប៉ុណ្ណាពីការរំខានទាំងនោះ ? ម្យ៉ាងទៀតវាក៏មានជាប់ពាក់ព័ន្ធនឹងការធ្វើកិច្ចការច្រើនក្នុងពេលតែមួយដែរ ដែលផលប៉ះពាល់វាអាចមានធ្ងន់ធ្ងរចំពោះផ្លូវចិត្តនិងសុខភាពរបស់អ្នកក្នុងរយៈពេលវែងទៀតផង។
២) ចំណេះដឹងដែលប្រែក្លាយជាឥតន័យ៖ អ្វីដែលអ្នកចង់ដឹង គ្រប់យ៉ាងបើកបង្ហាញឲ្យអ្នកដោយត្រឹមចូលស្វែងរកតាមGoogleតែប៉ុណ្ណោះ។ ព័ត៌មានផ្ដល់ឲ្យយ៉ាងច្រើនពោរពាស។ អ្នកបានអានច្រើន មើលច្រើន ស្ដាប់ច្រើន ប៉ុន្តែពេលខ្លះអ្នកមិនដឹងខ្លួនទេថាអ្វីដែលអ្នកចេះពិតប្រាកដ និងបានស៊ីជម្រៅ។
៣) ញៀននឹងការធ្វើខ្លួនឲ្យមានឥទ្ធិពល៖ នេះហើយគឺជារបៀបដ៏ពេញនិយមមួយដែលមនុស្សសម័យទំនើបនេះប្រើប្រាស់បច្ចេកវិទ្យា ដែលសំដៅទៅលើបណ្ដាញសង្គមនេះឯង។ ឥទ្ធិពលនេះទីនេះចង់សំដៅទៅលើឥទ្ធិពលអវិជ្ជមាន និងឥតប្រយោជន៍ដោយបង្ហោះរូបភាពទាក់ទាញចំណាប់អារម្មណ៍មហាជន ជួនកាលបង្ហាញជាសាធារណៈថាពួកគេប្រកាន់យកគំនិតបែបនេះ ឬបែបនោះដែលប្រៀបដូចជាបានឲ្យអ្នកដទៃយល់មកលើពួកគេថាជាមនុស្សមិនបើកចំហទទួលយកភាពខុសគ្នាដូច្នោះ៕
ប្រែសម្រួល៖ ស្រីពៅ ប្រភព៖ learning-mind
