៣ចំណុចដែលគ្មាននរណាប្រាប់ក្នុងសាលា តែជាអ្វីដែលអ្នកអាចមានម្ចាស់ការលើហិរញ្ញវត្ថុខ្លួនឯង
Jim Rohn លោកធ្លាប់បានលើកឡើងថា៖ "ការអប់រំនៅក្នុងសាលាបង្រៀនយើងឲ្យចេះចិញ្ចឹមជីវិត ប៉ុន្តែការអប់រំខ្លួនឯងនឹងធ្វើឲ្យយើងក្លាយជាអ្នកមានបាន។" ។ តើពាក្យសម្ដីមួយឃ្លានេះ អាចយកមកធ្វើជាកញ្ចក់ឆ្លុះត្រឡប់មកវិញទៅលើចំណេះដឹងហិរញ្ញវត្ថុបានយ៉ាងដូចម្ដេចទៅវិញ ?
មិនដឹងថាមានមនុស្សប៉ុន្មាននាក់ដែលចាប់អារម្មណ៍ត្រង់ចំណុចនេះទេ នៅក្នុងសង្គមមួយដែលសមត្ថភាពពិត និងសក្ដានុពលពិតរបស់មនុស្សត្រូវបានវាយតម្លៃយ៉ាងសង្ខេបមកត្រឹមសញ្ញាប័ត្រមួយសន្លឹក វាស្ទើរតែនរណាៗក៏អាចទស្សន៍ទាយដឹងបានទុកជាមុនយ៉ាងត្រឹមត្រូវហើយថា សញ្ញាប័ត្រតែមួយសន្លឹកនឹងធានានូវជីវិតសុខស្រួលឲ្យមនុស្ស។ ដូច្នេះហើយ គោលដៅដ៏ចម្បងនៅក្នុងជីវិតរបស់មនុស្សម្នាក់ៗក្នុងសង្គម គឺជាការសម្រេចឲ្យបាននូវការទទួលស្គាល់ពីសាលាតាមរយៈសញ្ញាប័ត្រនោះ រហូតដល់មានពេលខ្លះសង្គមមិនដឹងសោះឡើយថានៅពីក្រោយសញ្ញាប័ត្រដែលជាទីមោទនភាពរបស់បុគ្គលម្នាក់មានរឿងរ៉ាវអ្វីខ្លះនោះទេ។ និយាយឲ្យខ្លីទៅ អ្វីដែលសំខាន់ពិតប្រាកដគឺថាតើអ្នកពូកែប្រើប្រាស់ចំណេះដឹងដែលបានរៀនមកបានប៉ុណ្ណាទៅវិញទេ។
តើនៅក្នុងសាលាមានបង្រៀនអ្នកពីរបៀបចេះគ្រប់គ្រងលើហិរញ្ញវត្ថុរបស់ខ្លួនឯងទេ ? ការមានម្ចាស់ការទៅលើហិរញ្ញវត្ថុរបស់ខ្លួនគឺជាកត្តាដ៏សំខាន់មួយដែលមានឥទ្ធិពលធំធេងដោយឥតដឹងខ្លួន ទៅលើជោគវាសនាជីវិតរបស់អ្នក។ មិនថាអ្នកចង់បើកជំនួញមួយដោយខ្លួនឯង ឬជានិស្សិតកំពុងសិក្សាក៏ដោយ បើអ្នកចេះគ្រប់គ្រងហិរញ្ញវត្ថុរបស់ខ្លួន នោះចាត់ទុកថាអ្នកស្ទើរតែជោគជ័យពាក់កណ្ដាលក្នុងជីវិតទៅហើយ។ តើអ្វីខ្លះដែលអ្នកគួរធ្វើ ដើម្បីការពារកុំឲ្យហិរញ្ញវត្ថុក្លាយជាបញ្ហាចម្បងរាំងស្ទះដល់ដំណើរជីវិតរបស់អ្នក ?
១) តើអ្នកដែលយកចិត្តទុកដាក់ត្រួតពិនិត្យទៅលើច្រកចេញនិងចូលនៃប្រាក់របស់ខ្លួនដែរទេ ? ៖ ភាពធ្វេសប្រហែសមិនយកចិត្តទុកដាក់ត្រួតពិនិត្យទៅលើរាល់លុយចេញរបស់អ្នក គឺជាហានិភ័យខ្ពស់មួយដែលអាចនាំឲ្យលុយអ្នកចេញច្រើនហួសពីដែនកំណត់ដែលចំណូលអ្នកមាន។ ទម្លាប់ដ៏សាមញ្ញមួយដើម្បីដាក់កម្រិតហិរញ្ញវត្ថុឲ្យស្ថិតនៅក្រោមការគ្រប់គ្រងរបស់អ្នកនោះគឺ អ្នកអាចបែងចែកចំណូលដែលអ្នកមាន ដោយលុយប៉ុន្មានគួរចាយទៅលើផ្នែកអ្វីជាប្រចាំខែ។
២) យល់ឲ្យច្បាស់អំពីភាពខុសគ្នារវាង "តម្រូវការ" និង "ការចង់បាន"៖ ដូច Warren Buffetបានលើកឡើងថា៖ "បើអ្នកទិញអ្វីដែលអ្នកមិនត្រូវការចាំបាច់ មិនយូរមិនឆាប់អ្នកនឹងត្រូវបង្ខំចិត្តលក់អ្វីដែលអ្នកត្រូវការ។" ។ មុននឹងសម្រេចចិត្តទិញរបស់ដែលគ្រាន់តែស្ថិតក្នុងការចង់បានរបស់អ្នក ជាដំបូងអ្នកគួរសួរខ្លួនឯងសិនថា តើអ្វីជាគោលដៅសំខាន់របស់អ្នក ក្នុងការទិញរបស់ដែលអ្នកចង់បាន ? ក៏ព្រោះតែពេលខ្លះអ្នកមិនដឹងខ្លួននោះទេថា អ្វីដែលអ្នកបម្រុងនឹងធ្វើនេះ គ្រាន់តែបំពេញចំណង់តណ្ហា ដែលស្រេកឃ្លានមិនចេះឈប់ឈរនេះឯង។ អ្នកមិនត្រូវភ្លេចនោះទេថា អ្វីដែលកាត់ផ្ដាច់មនុស្សពីសត្វ គឺជាសមត្ថភាពក្នុងការប្រើប្រាស់វិចារណញ្ញាណនេះឯង នៅពេលតណ្ហាលេចឡើងមក គឺវិចារណញ្ញាណនេះឯងដែលមានតួនាទីមកគ្របសង្កត់ឥទ្ធិពលអវិជ្ជមានរបស់វានោះ។
៣) បន្តការវិនិយោគទុន៖ បុគ្គលជាអ្នកចេះគ្រប់គ្រងហិរញ្ញវត្ថុរបស់ខ្លួនប្រកបដោយភាពឈ្លាសវៃ មិនមែនមានត្រឹមតែការចេះសន្សំលុយ និងកាត់បន្ថយការចាយវាយដោយដឹងច្បាស់ពីអ្វីទៅត្រឹមតែជាការចង់បាន ហើយអ្វីទៅទើបជាតម្រូវការពិតប្រាកដនោះទេ។ យ៉ាងណាមិញ ពួកគេក៏ជាមនុស្សចេះធ្វើឲ្យលុយរបស់ខ្លួនដែលសម្រាប់មនុស្សធម្មតាគ្រាន់តែចេះប្រើប្រាស់សម្រាប់ការចាយវាយប្រចាំថ្ងៃ ក្លាយជាលុយមានប្រយោជន៍ ជាការយកលុយទៅបង្កើតលុយមកវិញ ឬជាលុយសកម្ម ខុសពីមនុស្សធម្មតាដែលមានត្រឹមតែលុយអកម្ម។ បុគ្គលដែលអាចធ្វើបែបនេះបានទាល់តែជាមនុស្សដែលមានចក្ខុវិស័យវែងឆ្ងាយ មើលឃើញនូវប្រយោជន៍ក្នុងរយៈពេលវែង ដែលជាផ្លែផ្កាទទួលបានពីការដាំដុះ ថែទាំ ស្រោចទឹកបន្តិចម្ដងៗ ដល់ពេលមួយការខិតខំរបស់អ្នកនឹងតបស្នងឲ្យផលវិញមិនខាន៕
ប្រែសម្រួល៖ ស្រីពៅ ប្រភព៖ wisebread
