សុខចិត្តមានកំហុសក្នុងស្នេហាប្រសើរជាងរង់ចាំមនុស្សដែលល្អឥតខ្ចោះ
យើងប្រហែលជាធ្លាប់អានអត្ថបទដែលនិយាយថា៖«កុំទាន់មានស្នេហារហូតដល់អ្នកជួបបុរសឬនារីដែលមានចំណុចនេះឬចំណុចនោះសិន» ម៉្យាងវិញទៀត យើងតែងតែកំណត់ច្បាប់មួយចំនួនឬដាក់ព្រំដែនជាច្រើនដល់ដៃគូដែលយើងចង់រាប់អាន។ បន្ថែមពីលើនេះ យើងតែងតែគិតថាយើងត្រូវជួបមនុស្សដែលយើងប្រាថ្នាទើបស័ក្ដិសមនឹងអ្នក។
ប៉ុន្តែ សំនួរសួរថាតើមនុស្សដែលយើងប្រាថ្នាឬមនុស្សដែលល្អឥតខ្ចោះពិតជាមានដែរឬទេ?
ស្នេហាពិតប្រាកដមិនមែនអ៊ីចឹងនោះទេពីព្រោះអ្នកមិនអាចដឹងថាអ្នកបានរកឃើញមនុស្សដែលល្អនោះឡើយ ប្រសិនជាអ្នកពុំធ្លាប់មានការឈឺចាប់ឬបោះបង់ពីមុនមក។ អ្នកក៏មិនអាចដឹងថាតើអ្នកណាពិតជាល្អចំពោះអ្នកប្រសិនជាអ្នកពុំធ្លាប់មានស្នេហាពីមុននោះដែរ។ អ្នកគួរតែមានស្នេហាប្រសើរជាងនៅលីវ រស់នៅឯកានិងគ្មានបទពិសោធន៍ស្នេហា ពីព្រោះថាស្នេហាពិតប្រាកដមិនមែនរកបានមនុស្សដែលល្អឥតខ្ចោះនោះទេ តែជាការរកឃើញមនុស្សដែលព្រមរីកចម្រើនជាមួយយើង កែប្រែដើម្បីយើងឬតស៊ូដើម្បីស្នេហាមួយនេះ។
ចូរអ្នកចងចាំថាគ្មានទេមនុស្សល្អឥតខ្ចោះ គ្មានទេស្នេហាដែលល្អឥតខ្ចោះ។ ឈប់ខ្ជះខ្ជាយពេលវេលារង់ចាំស្នេហាដែលអស្ចារ្យទៀតទៅ ផ្ទុយទៅវិញ រកមនុស្សដែលធ្វើឲ្យអ្នកមានអារម្មណ៍ពិសេស មានអារម្មណ៍រីករាយ មានអារម្មណ៍ល្អរាល់ពេលដែលអ្នកនៅជាមួយគ្នា៕
ប្រែសម្រួល៖ អុឹង មុយយូ ប្រភព៖ thoughtcatalog.com
