ចំណុច៣យ៉ាងដែលបុគ្គលជោគជ័យតែងតែបង្រៀនខ្លួនឯង
មានសុភាសិតអាមេរិកមួយពោលថា៖« ការអប់រំនៅសាលានឹងជួយឲ្យអ្នករស់ តែការរៀនដោយខ្លួនឯងនឹងជួយឲ្យអ្នកក្លាយជាមហាសេដ្ឋី»។ ជាការពិតពុំអាចប្រកែកបាននោះទេ ការរៀនដោយខ្លួនឯងពិតជាមានសារៈសំខាន់ណាស់សម្រាប់អនាគតនិងជាប្រភពមួយសម្រាប់ពង្រឹងចំណេះដឹងបន្ថែម។ បុគ្គលជោគជ័យតែងតែធ្វើនូវចំណុចខាងក្រោមនេះដើម្បីភាពជោគជ័យ៖
១) ចាប់ផ្តើមនូវអ្វីដែលអ្នកស្រឡាញ់៖ មិនថាអ្នកចង់ពង្រឹងចំណេះដឹងឬជំនាញបន្ថែមសម្រាប់ការងារឬអ្នកចង់ធ្វើអ្វីថ្មីនោះទេ ការរៀនដោយខ្លួនឯងនឹងជួយអ្នកបាន។ ពិតប្រាកដណាស់ ការមានចំណង់ចំណូលចិត្តទៅលើអ្វីដែលអ្នកស្រឡាញ់ពិតជាសំខាន់ពីព្រោះថាវានឹងជួយអ្នកជម្នះនូវឧបសគ្គនៅពេលដែលអ្នកជួបការលំបាក បន្ថែមពីលើនេះ វាក៏ជួយអ្នកឲ្យឆាប់ចាំនិងចងចាំបានយូរផងដែរ។
២) អានសៀវភៅ៖ ការអានជាផ្នែកមួយដែលជួយឲ្យអ្នកជោគជ័យបានពីព្រោះថាគ្មាននរណាម្នាក់ចេះឬដឹងអ្វីទាំងអស់នោះទេ ប៉ុន្តែមនុស្សរាល់គ្នាអាចអានសៀវភៅនិងរៀនអំពីប្រធានបទដែលពួកគេចូលចិត្តហើយក្លាយជាអ្នកជំនាញទៅលើផ្នែកណាមួយបាន។ មនុស្សជោគជ័យភាគច្រើនសុទ្ធតែមានទម្លាប់អានជាប្រចាំថ្ងៃ។
៣) បន្តការរៀនជានិច្ច៖ អ្នកមិនត្រូវឈប់សិក្សាឬបោះបង់ឱកាសក្នុងការបង្កើនចំណេះដឹងរបស់អ្នកជាដាច់ខាត។ នាសម័យអ៊ីនធឺណិត អ្នកមានភាពងាយស្រួលក្នុងការស្វែងរកព័ត៌មានឬចំណេះដឹងថ្មីៗ ចូរអ្នកប្រើប្រាស់វាឲ្យមានប្រសិទ្ធភាពជាទីបំផុត។ បន្តការសិក្សា តាមឲ្យទាន់សម័យកាលនិងនិងធ្វើឲ្យខ្លួនឯងរីកចម្រើនទៅមុខ៕
ប្រែសម្រួល៖ អុឹង មុយយូ ប្រភព៖ lifehack.org
