តើគំនិតច្នៃប្រឌិតហូរចេញមកពីពេលអារម្មណ៍ល្អ ឬអារម្មណ៍មិនល្អ ?
តើគំនិតច្នៃប្រឌិតអាចហូរចេញមកពីណា ? តើវាផុសឡើងមកនៅពេលអារម្មណ៍របស់អ្នកឋិតក្នុងសភាពវិជ្ជមាន ឬក៏អវិជ្ជមាន ? តើសេចក្ដីសុខអាចនាំឲ្យអ្នកផលិតបាននូវគំនិតច្នៃប្រឌិតច្រើនពិតមែនទេ ?
បើអ្នកគិតថា ការណ៍ដែលមានអារម្មណ៍ស្រស់ស្រាយល្អ ឬក៏អ្នកចង់ឲ្យជីវិតពោរពេញដោយសេចក្ដីសុខ លុះអ្នកនឹងមានគំនិតល្អៗនិងច្នៃប្រឌិតប្លែកថ្មីច្រើន ក៏ប្រហែលជាត្រូវដែរ។ ប៉ុន្តែបើសាកគិតពិចារណាពីដំណើរវិវត្តរបស់មនុស្សជាតិយើង បើកាលពីរាប់ពាន់លានឆ្នាំកន្លងមក បុព្វបុរសរបស់យើងមិនបានជួបប្រទះនឹងឧបសគ្គ សំណួរលំបាកស្មុគស្មាញដ៏ច្រើនក្នុងជីវិតប្រចាំថ្ងៃទេនោះ ជំនាន់ក្រោយក៏មិនទទួលបានហ្សែនដែលមានខួរក្បាលភ្ជាប់ជាមួយឧបករណ៍សម្រាប់ដោះស្រាយបញ្ហាដ៏ស្មុគស្មាញ ដែលមានសមត្ថភាពគិតវិភាគស៊ីជម្រៅ និងអាចប្រឈមមុខដោះស្រាយជាមួយបញ្ហាដែលកើតឡើងនៅក្នុងជីវិតបាននោះដែរ។
ដើម្បីចម្រាញ់នូវគំនិតច្នៃប្រឌិតណាមួយបាន ពិតណាស់ថាដំណាក់កាលដំបូងក្នុងការត្រិះរិះគិតរកថាតើដំណោះស្រាយបែបណាខ្លះដែលអាចទៅរួច អារម្មណ៍ស្រស់ថ្លាវិជ្ជមានមានប្រយោជន៍សម្រាប់ដំណាក់កាលនេះ ពុំនោះទេប្រសិនបើអ្នកកំពុងតែច្របូកច្របល់ អារម្មណ៍មិននឹងន នោះអ្នកនឹងមិនអាចគិតឃើញអ្វីៗបានល្អឡើយ ហើយផ្លូវដើរក៏ហាក់ដូចជាមិនមានច្រើនសម្រាប់ឲ្យអ្នកដើរចេញពីបញ្ហានោះដូចគ្នា។
ដោយឡែក នៅពេលអ្នកប្រមូលបានចម្លើយដ៏ច្រើនក្នុងដៃ ដែលរកនឹកឃើញអំឡុងពេលអារម្មណ៍ល្អពោរពេញដោយសេចក្ដីសុខ រួចមកដល់ពេលដែលត្រូវប្រឈមមុខជាមួយនឹងសំណួរថាតើត្រូវដោះស្រាយយ៉ាងដូចម្ដេច អារម្មណ៍វិជ្ជមានអាចមិនមានប្រសិទ្ធភាពសម្រាប់អ្នកវិញ។ គំនិតច្នៃប្រឌិតមិនអាចកើតចេញពីផ្លូវដែលមានភាពស្រណុកសុខស្រួល និងមិនមានការលំបាកអ្វីនោះឡើយ។ បើអារម្មណ៍អ្នកល្អ អ្នកនឹងគិតទៅលើអ្វីៗក្នុងផ្លូវងាយស្រួលពេក ដែលហាក់ដូចជាមើលងាយបញ្ហាពេក អ្នកនឹងមានអារម្មណ៍ថាអ្វីៗក៏នឹងអាចទៅរួចដែរ ដែលធ្វើឲ្យអ្នកមិនបានគិតបានសព្វគ្រប់ចន្លោះប្រហោង ម្យ៉ាងទៀតដំណោះស្រាយរបស់អ្នកក៏អាចនឹងពុំមានអ្វីថ្មីប្លែកខុសពីមុនដែរ ដូច្នេះលទ្ធផលដែលអ្នកទទួលបានក៏គ្មានអ្វីគួរឲ្យសង្ស័យដែលវាមិនខុសពីមុននោះដែរ។
អារម្មណ៍ល្អនឹងមិនជំរុញអ្នកឲ្យចង់គិតស្មុគស្មាញ វិភាគ វិនិច្ឆ័យ ថ្លឹងថ្លែងពីបញ្ហាណាមួយនោះឡើយ ប៉ុន្តែមានតែការគិតបែបនេះហើយដែលនាំអ្នកទៅរកភាពច្នៃប្រឌិតបាន ដែលជាសភាពអារម្មណ៍តានតឹង ស្មុគស្មាញនៅលាយឡំគ្នា។ ប៉ុន្តែនេះក៏មិនមែនមានន័យថាអ្នកគួរតែបណ្ដុះអារម្មណ៍របស់ខ្លួនឲ្យអវិជ្ជមានក៏ដើម្បីតែចង់ទទួលបានដំណោះស្រាយប្លែកថ្មីនោះដែរ តែវាគួរតែជាតុល្យភាពរវាងអារម្មណ៍ល្អនិងអារម្មណ៍តានតឹង ពុំនោះទេគំនិតរបស់អ្នកមិនត្រឹមតែគ្មានប្រសិទ្ធភាពនោះទេ តែអ្នកកំពុងរុញខ្លួនឯងទៅរកហានិភ័យនៃដំណើរការណ៍មិនប្រក្រតីរបស់ស្រទាប់ខាងក្រៅផ្នែកខាងមុខនៃខួរក្បាល ដែលពាក់ព័ន្ធនឹងភាពច្នៃប្រឌិតរបស់មនុស្សមិនខាន។
ដូចអ្នកវិទ្យាសាស្ត្រ Stephen Hawking ធ្លាប់ពោលក្នុងកម្មវិធីរបស់ TED Talk ដូច្នេះថា៖ "ខ្ញុំពិតជាសំណាងណាស់ដែលពិការភាពរបស់ខ្ញុំពុំបានផ្ដល់ជាបញ្ហាលំបាកអ្វីធ្ងន់ធ្ងរ។ ពិតប្រាកដណាស់ថាវាបែរជាបានផ្ដល់ពេលវេលាដល់ខ្ញុំច្រើនជាងមនុស្សផ្សេងទៀត ដើម្បីស្វែងរកចម្លើយទៅកាន់ចំណេះដឹង និងអាថ៌កំបាំងនៃសកលលោកនេះ។" ៕
ប្រែសម្រួល៖ ស្រីពៅ ប្រភព៖ weforum
