អត្ថប្រយោជន៍៣យ៉ាងដែលអ្នកនឹងទទួលបានក្រោយបញ្ចប់ការសិក្សាសង្គមវិទ្យា
សង្គមវិទ្យាគឺជាមុខវិជ្ជាមួយក្នុងវិទ្យាសាស្ត្រសង្គម ដែលជួយបង្រៀនមនុស្សពីរបៀបរស់នៅក្នុងសង្គមនិងបែបបទសង្គម។ អ្នកដែលរៀនមុខវិជ្ជាសង្គមវិទ្យានឹងមានសមត្ថភាពក្នុងការវិភាគនិងស្វែងយល់ពីសង្គមបានជ្រៅជាងមុខវិជ្ជាផ្សេងៗ។ ខាងក្រោមនេះគឺជាអត្ថប្រយោជន៍ដែលអ្នកនឹងទទួលបានក្រោយបញ្ចប់ការសិក្សាសង្គមវិទ្យា ៖
១) ការងារក្នុងសហគមន៍៖ វាជាហេតុផលដ៏ចម្បងមួយដែលមនុស្សគួរសិក្សាសង្គមវិទ្យា ពីព្រោះថាការងារក្នុងសហគមន៍គឺមានច្រើនចាប់ពីការបង្រៀនប្រជាពលរដ្ឋពីរបៀបថែទាំសុខភាព សារប្រយោជន៍នៃការអប់រំ ឬការពន្យល់ពីការចូលរួមរបស់ប្រជាពលរដ្ឋទៅកាន់សង្គម។ល។ អ្នកប្រៀបបានដូចជាស្ពានភ្ជាប់រវាងសង្គមនិងមនុស្សអ៊ីចឹង។ លើសពីនេះ សង្គមវិទ្យានឹងជួយពង្រីកចំណេះដឹងទូទៅរបស់អ្នកបានច្រើនដែលទាក់ទងទៅនឹងការងារក្នុងសង្គម។
២) ការងារជាទីប្រឹក្សា៖ ប្រសិនជាអ្នកចង់ជួយដល់សហគមន៍របស់អ្នកតាមរយៈធ្វើជាអ្នកទីប្រឹក្សាឬអ្នកផ្តល់យោបល់ ការសិក្សាសង្គមវិទ្យាអាចជួយអ្នកបានពីព្រោះថាសង្គមវិទ្យាបង្រៀនអ្នកពីជំនាញទំនាក់ទំនង ចំណេះដឹងទូទៅនិងរបៀបដោះស្រាយបញ្ហានានា ដែលអ្នកអាចយកទៅប្រើប្រាស់និងជួយអ្នកដទៃបាន។
៣) ការងារក្នុងជំនួញ៖ អ្នកដែលពូកែខាងសង្គមវិទ្យានឹងមានឱកាសការងារជាច្រើនដូចជា៖អ្នកទីផ្សារ អ្នកស្រាវជ្រាវ អ្នកទំនាក់ទំនងសាធារណៈ អ្នកគ្រប់គ្រងផ្នែកធនធានមនុស្ស។ល។ អ្នកដែលពូកែខាងសង្គមវិទ្យាច្រើនតែមានសមត្ថភាពក្នុងការវិភាគ (analytical skill) និងជំនាញក្នុងការគិតវិភាគវែកញែក (Critical thinking skill) ដើម្បីរកដំណោះស្រាយទៅនឹងបញ្ហា ដែលវាជាជំនាញចាំបាច់បំផុតក្នុងវិថីពាណិជ្ជកម្ម៕
ប្រែសម្រួល៖ អុឹង មុយយូ ប្រភព៖ topuniversities.com
