តើអ្នកដឹងថាកាំរស្មីXប៉ះពាល់ដល់សុខភាពអ្នកយ៉ាងដូចម្ដេចខ្លះទេ ?
កាំរស្មីX (X-rays) ស្ថិតក្នុងចំណោមប្រភេទមួយរបស់កាំរស្មីដែនម៉ាញេទិចអគ្គិសនី។ អ្វីដែលបានធ្វើឲ្យមនុស្សទូទាំងសកលលោកស្គាល់ពីកាំរស្មីX ក៏ដោយសារតាមរយៈការប្រើប្រាស់យ៉ាងទូលំទូលាយរបស់វានៅក្នុងផ្នែកវេជ្ជសាស្ត្រ ដើម្បីឆ្លុះពិនិត្យមើលថាតើរចនាសម្ព័ន្ធនៃគ្រោងឆ្អឹងរបស់អ្នកជំងឺមានភាពមិនប្រក្រតីត្រង់ណាឬអត់ ទើបការព្យាបាលដោយត្រឹមត្រូវគឺជាដំណាក់កាលបន្ទាប់។ ដោយឡែក មិនថាតែកាំរស្មីX ឬកាំរស្មីប្រភេទផ្សេងទៀតនោះទេ សុទ្ធតែជាវិទ្យុសកម្ម គ្រាន់តែខុសគ្នាត្រង់តិចឬច្រើនប៉ុណ្ណោះ។ ដូច្នេះ ក្រៅពីគុណប្រយោជន៍របស់កាំរស្មីX តើវាអាចប៉ះពាល់យ៉ាងដូចម្ដេចខ្លះទៅលើសុខភាពរបស់មនុស្ស ?
មុននឹងស្វែងយល់ពីកាំរស្មីX យើងគួរតែរំលឹកដល់អ្នកដែលបានរួមចំណែកជំរុញការលូតលាស់ទៅមុខរបស់មនុស្សជាតិ ដែលសំដៅទៅលើអ្នកដែលបានរកឃើញកាំរស្មីXនេះឯង។ ជាសាស្ត្រាចារ្យសញ្ជាតិអាល្លឺម៉ង់មួយរូប Wilhelm Conrad Röentgen បានរកឃើញកាំរស្មីXនៅពេលលោកមានវ័យ៥០ឆ្នាំ ដែលកាំរស្មីមួយនេះក៏មានគេស្គាល់មុនពេលនោះប្រហែល១០០ឆ្នាំហើយដែរ គ្រាន់តែពុំមានការសិក្សាស៊ីជម្រៅពិតប្រាកដទៅលើមុនលោក Röentgen វានៅឡើយ។ ៦ឆ្នាំក្រោយ របកគំហើញមួយនេះរបស់លោកបានតបស្នងនូវសមិទ្ធផលជាពានរង្វាន់ណូបែលផ្នែករូបវិទ្យាក្នុងឆ្នាំ១៩០១។
ដើម្បីអាចបង្កើតជារូបភាពឲ្យអ្នកឃើញពីគ្រោងឆ្អឹងខាងក្នុងរបស់អ្នកបាន វាត្រូវការបញ្ចេញនូវថាមពលវិទ្យុសកម្មកម្រិតខ្ពស់ ដែលចេញមកពីដែនម៉ាញេទិចអគ្គិសនីបង្កើតដោយកាំរស្មីX។ នៅពេលបរិមាណថាមពលដ៏ច្រើននេះជ្រាបចូលទៅក្នុងផ្នែកតូចៗនៅក្នុងរាងកាយរបស់អ្នក កម្លាំងរបស់វានឹងផ្ដាច់អេឡិចត្រុងមួយចំនួនចេញពីអាតូមរបស់វា ជាហេតុនាំឲ្យមានការផ្លាស់ប្ដូរលក្ខណៈគីមីនិងបំបែកចំណងសម្ពន្ធគីមីរបស់វា។ ប្រសិនជាបរិមាណរបស់វាមានច្រើនហួសកម្រិត វានឹងបំផ្លាញកោសិកាក្នុងរាងកាយរបស់អ្នក។ លទ្ធផលគឺជាមហារីក ដុះដុំសាច់មហារីក និងបម្រែបម្រួលទម្រង់នៃហ្សែន។
កាំរស្មីXអាចបង្កជាហានិភ័យពីជំងឺមហារីក ហើយក៏ត្រូវបានប្រើប្រាស់ដើម្បីយកទៅសម្លាប់កោសិកាមហារីកទាំងនោះដែរ។ កាំរស្មីXដែលបាញ់តម្រង់ទៅសម្លាប់កោសិកាចង្រៃ ក្នុងទម្រង់ជាបាច់ពន្លឺ វាមិនអាចចៀសផុតនោះឡើយដែលកោសិកាល្អនៅក្បែរនោះក៏ត្រូវទទួលរងខូចខាតដែរនោះ។ យ៉ាងណាមិញ តិចឬច្រើនជាអ្វីដែលគ្រូពេទ្យអាចចៀសបាន។
ការប្រើប្រាស់កាំរស្មីXដើម្បីឆ្លុះមើលផ្នែកខាងក្នុងរបស់អ្នកជំងឺក៏ជាចម្លើយឆ្លើយទៅកាន់មូលហេតុនៃការកើតឡើងនូវជំងឺឈាមសស៊ីឈាមក្រហម នៅពេលកោសិកាឈាមក្រហមរងឥទ្ធិពលពីកាំរស្មីX បើជាកោសិកាឈាមសវិញ អ្នកនឹងងាយទទួលរងគ្រោះពីជំងឺសូម្បីតែតូចតាចបំផុត និងមេរោគចម្លងផងដែរ។ មួយវិញទៀត នៅពេលកាំរស្មីXធ្វើឲ្យមានការផ្លាស់ប្ដូរកោសិកាហើយ ប្រព័ន្ធបង្កកំណើតរបស់អ្នកក៏អាចប៉ះទង្គិច ដែលជាលទ្ធផលនាំទៅរកការគ្មានកូន។ ម្យ៉ាងទៀត ផលនៃការស្រូបយកកាំរស្មីXទៅក្នុងរាងកាយក៏បង្កជាជ្រុះសក់ និងជាលិកាស្បែកឡើងក្រហម។
ទោះជាយ៉ាងណាក៏ដោយ កាំរស្មីXចំពោះផ្នែកវេជ្ជសាស្ត្រនៅតែដើរតួយ៉ាងសំខាន់មិនអាចខ្វះបាន សម្រាប់ដំណើរការណ៍ព្យាបាលដ៏ត្រឹមត្រូវនិងមានប្រសិទ្ធភាព។ ប៉ុន្តែគុណវិបត្តិរបស់វាគួរតែអាចដាស់តឿនដល់អ្នកនូវរាល់ការសម្រេចចិត្តនានាដែលពាក់ព័ន្ធនឹងដំណើរការណ៍ទទួលយកកាំរស្មីX មិនថាជាការឆ្លុះពិនិត្យព្យាបាលជំងឺ ឬការព្យាបាលធ្មេញ ឬសូម្បីតែពេលពិនិត្យមើលរាងកាយអ្នកធ្វើដំណើរក្នុងអាកាសយានដ្ឋាននោះឡើយ៕
ប្រែសម្រួល៖ ស្រីពៅ ប្រភព៖ livescience & ehow
