ភាពជោគជ័យ មិនមែនមានត្រឹមតែទម្លាប់អានសៀវភៅនោះទេ តែនៅមានការចេះរើសប្រភេទសៀវភៅគួរអានទៀត
ទស្សនវិទូក្រិកបុរាណមួយរូបដែលមិនត្រឹមតែស្ថិតនៅជាប់ក្រអៅបេះដូងរបស់ពលរដ្ឋក្រិកគ្រប់រូបនោះទេ តែថែមទាំងអ្នកសិក្សាជំនាន់ក្រោយរាប់ចាប់តាំងពីសម័យរុងរឿងរបស់ទីក្រុងអាតែនមកគឺ សូក្រាត ធ្លាប់បានពោលដូចនេះថា៖ "មានរឿងតែមួយគត់ដែលខ្ញុំដឹងនោះគឺខ្ញុំមិនដឹងអ្វីសោះឡើយ"។ បុគ្គលប្រកបដោយឧត្ដមគតិសម្រាប់មនុស្សជាតិគ្រប់រូប សុទ្ធតែទទួលស្គាល់ពីភាពល្ងង់ខ្លៅរបស់ខ្លួន ដឹងច្បាស់ថាចំណេះដឹងក្នុងពិភពលោកនេះធំធេងនិងឥតមានដែនកំណត់យ៉ាងណា ដែលតម្លៃត្រង់នេះហើយគឺជាអត្តចរិតតែមួយដែលបុគ្គលជោគជ័យទាំងនោះសុទ្ធតែមានដូចៗគ្នា។
តើគួរឲ្យសោកសង្រេងប៉ុណ្ណាចំពោះបុគ្គលទាំងឡាយណាដែលមានសំណាងមានជីវិតរស់រានមកហើយ ប៉ុន្តែបែរជាមិនបានបំប៉នខួរក្បាលរបស់ខ្លួនជាមួយអាហារចំណេះដឹងនោះ ? ដកឫសគល់របស់លេសដែលតែងតែព្យាយាមរុញសង្កត់អ្នកឲ្យទាបទៅៗនោះចេញ ដោយគ្រាន់តែឆ្លៀតពេលមួយថ្ងៃបន្តិចៗជារៀងរាល់ថ្ងៃ អង្គុយចុះ កាន់សៀវភៅអាន ដើម្បីដុសខាត់ចិត្តគំនិតស្មារតីឲ្យកាន់តែភ្លឺថ្លា មុតស្រួចឡើងៗ និងពង្រីកទស្សនឲ្យកាន់តែទូលំទូលាយ ប្រកបដោយការពិចារណាថ្លឹងថ្លែងហេតុផលគ្រប់ជ្រុងជ្រោយ និងឆ្លាតវៃជាងមុនពីមួយថ្ងៃទៅមួយថ្ងៃ នោះជោគជ័យក៏មិនឆ្ងាយហួសពីដៃរបស់អ្នកដែរ។
និយាយអំពីទម្លាប់នៃការអានសៀវភៅ តើគំរូរបស់មហាសេដ្ឋីពិភពលោកដូចជា Warren Buffet, Bill Gates ឬ Mark Zuckerberg អាចឲ្យអ្នករៀនអ្វីបានខ្លះពីពួកគេ ? មានពេលមួយវិនិយោគិន Warren Buffet ត្រូវបានគេសួរថា តើអ្វីទៅដែលនាំឲ្យលោកជោគជ័យបាន លោកក៏បានចង្អុលទៅកាន់គំនរសៀវភៅដែលនៅក្បែរនោះ រួចនិយាយថា "អាន៥០០ទំព័របែបនេះជារៀងរាល់ថ្ងៃទៅ។ គឺបែបនេះហើយដែលចំណេះដឹងរបស់អ្នកនឹងចេះតែផ្ដុំឡើងជាបន្តបន្ទាប់ ដូចគ្នានឹងការប្រាក់សមាសដូច្នោះ។ ហើយគ្រប់គ្នាសុទ្ធតែអាចធ្វើវាបាន ប៉ុន្តែខ្ញុំហ៊ានធានាថាមិនមែនគ្រប់គ្នានោះទេដែលនឹងធ្វើវា"។ ជាមហាសេដ្ឋីទី៣របស់ពិភពលោកផងដែរ Buffet ក្នុងមួយថ្ងៃអានចាប់ពី៦០០ទំព័រទៅ១០០០ទំព័រ នៅពេលគាត់ចាប់ផ្ដើមការវិនិយោគដំបូង ហើយក៏នៅតែបន្តចំណាយពេល៨០%ក្នុងមួយថ្ងៃទៅលើការអាននេះដែរ។
រីឯមហាសេដ្ឋីទី១របស់ពិភពលោក Bill Gates អានសៀវភៅ៥០ក្បាលក្នុង១ឆ្នាំ ដែលស្មើនឹង១ក្បាលក្នុង១សប្ដាហ៍។ ក៏មិនខុសគ្នាប៉ុន្មានដែរ មហាសេដ្ឋីទី៨របស់ពិភពលោក និងស្ថាបនិកFacebook លោក Mark Zuckerberg អានសៀវភៅ១ក្បាលរៀងរាល់២សប្ដាហ៍ម្ដង។ បណ្ដុះទម្លាប់អានសៀវភៅតែម្យ៉ាងនៅមិនទាន់គ្រប់គ្រាន់នោះទេ ព្រោះមិនមែនគ្រប់ប្រភេទសៀវភៅទាំងអស់សុទ្ធតែជាចំណីអាហារផ្ដល់វីតាមីន និងជីវជាតិបំប៉នដែលផ្ដល់ការលូតលាស់ដល់សមត្ថភាពគិតនិងការសម្រេចចិត្តរបស់អ្នកនោះឡើយ។ នេះគឺជាចំណុចសំខាន់ដែលមនុស្សគ្រប់រូបត្រូវចាប់អារម្មណ៍។
សៀវភៅខ្លះគ្រាន់តែជាការកម្សាន្តអារម្មណ៍សម្រាប់បុគ្គលបរាជ័យ ដោយឡែកបុគ្គលជោគជ័យនឹងជ្រើសរើសសៀវភៅបែបណាដែលផ្ដល់ជាចំណេះដឹងអប់រំដល់ការគិតរបស់ពួកគេ។ សៀវភៅដែលមានលក្ខណៈជាការកម្សាន្តអារម្មណ៍ គ្រាន់តែដើម្បីកម្សាន្តអារម្មណ៍ ហើយខួរក្បាលអ្នកក៏ពុំចាំបាច់ធ្វើការខ្លាំងអ្វីដើម្បីមកគិតវិភាគពីខ្លឹមសារដែលបានផ្ដល់មកនោះដែរ។ យូរៗទៅការដែលអ្នកទម្លាប់ឲ្យខួរក្បាលមិនសូវគិត ខួរក្បាលរបស់អ្នកនឹងខ្ជិល ចង់ធ្វើតែការងារអ្វីស្រួលៗ និងមិនអភិវឌ្ឍទៅមុខតែប៉ុណ្ណោះ។
ដូចអ្នកប្រាជ្ញ អាល់ប៊ឺត អាញស្តាញ ធ្លាប់ផ្ដល់គតិដ៏មានតម្លៃមួយថា៖ "មនុស្សណាដែលអានច្រើន ហើយប្រើខួរក្បាលតិច នឹងធ្លាក់ចូលទៅក្នុងទម្លាប់ខ្ជិលគិត"៕ ប្រែសម្រួល៖ ស្រីពៅ ប្រភព៖ huffingtonpost
