មនុស្សយ៉ាប់ៗទាំង៥ប្រភេទ ដែលអ្នកនឹងជួបនៅលើផ្លូវឆ្ពោះទៅរកភាពជោគជ័យដ៏អស្ចារ្យក្នុងជីវិតរបស់អ្នក
ក្នុងដំណើរឆ្ពោះទៅរកភាពជោគជ័យ អ្នកនឹងជួបមនុស្សជាច្រើនប្រភេទ ដោយមានទាំងល្អ និង អាក្រក់។ បើជួបមនុស្សល្អ ពួកគេនឹងជួយជ្រោមជ្រែងអ្នក តែបើជួបមនុស្សយ៉ាប់ៗច្រើនវិញ អ្នកនឹងជួបបញ្ហាជាច្រើន។ ប៉ុន្តែយ៉ាងណាក៏ដោយ វាអាស្រ័យលើខ្លួនអ្នកប៉ុណ្ណោះ ថាតើអ្នកមានភាពរឹងមាំគ្រប់គ្រាន់ឬអត់ ក្នុងការដើរឆ្ពោះទៅរកផ្លូវជោគជ័យរបស់ខ្លួន។
បើអ្នកជាមនុស្សខ្សោយប្រាកដណាស់ថា នៅពេលជួបមនុស្សដែលមិនល្អច្រើន អ្នកនឹងត្រូវបានទាញទម្លាក់ឲ្យចូលក្នុងសេចក្ដីវិនាសយ៉ាងងាយបំផុត តែបើអ្នកជាមនុស្សមានជំហររឹងមាំវិញ មិនថាជួបអ្វីនោះទេ ក៏អ្នកនៅតែអាចបន្តដំណើរទៅមុខដែរ។ ខាងក្រោមនេះ ជាប្រភេទមនុស្សដែលអ្នកនឹងជួប នៅលើផ្លូវឆ្ពោះទៅរកភាពជោគជ័យ៖
១) មនុស្សមើលងាយក្ដីស្រមៃរបស់អ្នក
ប្រហែលជា ក្តីស្រមៃរបស់អ្នកធំខ្លាំងពេក (ដល់ថ្នាក់អ្នកទាំងនោះគ្មានចំណេះដឹង និង យល់ឃើញថា វានឹងអាចក្លាយជាការពិត) ឬ ក៏ ប្រហែលមកពីអ្នកចេញមកពីត្រកូលអ្នកក្រ ទើបបណ្ដាលឲ្យមនុស្សមួយចំនួនគិតថា អ្នកកំពុងធ្វើរឿងឆ្កួតៗ ហើយចាត់ទុកថា វាជាក្តីស្រមៃល្ងីល្ងើមួយ។ បើជួបមនុស្សប្រភេទនេះ អ្នកអាចនឹងមានការលំបាក ព្រោះ ថា សម្ដីរបស់ពួកគេមួយម៉ាត់ អាចនឹងធ្វើឲ្យអ្នកចុកឈាម ព្រោះថា គេមើលមកអ្នកប្រៀបដូចជា មនុស្សល្ងង់ម្នាក់។ យ៉ាងណាក៏ដោយ បើអ្នកចេះច្នៃការមើលងាយនេះ ឲ្យទៅជាកម្លាំងពិសេសដើម្បីសម្រេចក្តីសុបិនរបស់ខ្លួនឲ្យបាននោះ វាគឺពិតជារឿងល្អ។ ត្រូវចាំថា មនុស្សជោគជ័យជាច្រើនក្នុងលោក ក៏ធ្លាប់ត្រូវបានគេមើលងាយក្តីស្រមៃរបស់ខ្លួនផងដែរនៅដំណាក់កាលដំបូងៗ តែដោយសារតែការមើលងាយនេះហើយ ទើបធ្វើឲ្យពួកគេប្រឹងប្រែងកាន់តែខ្លាំង រហូតអ្វីៗក្លាយជាការពិត។
២) មនុស្សចាំតែច្រណែន និង បំផ្លាញអ្នក
មានមនុស្សមួយចំនួនកើតមក ជាមួយនឹងសេចក្ដីល្អតិចតួចបំផុត ហើយពួកគេតែងតែព្យាយាមបំផ្លាញនរណាក៏ដោយ ដែលព្យាយាមធ្វើអ្វីអស្ចារ្យជាងខ្លួន។ បើជួបមនុស្សប្រភេទនេះ អ្នកត្រូវតែប្រយ័ត្នឲ្យមែនទែន ព្រោះថា អ្វីៗដែលអ្នកធ្វើនឹងត្រូវបានតាមដាន និង ឃ្លាំមើលយ៉ាងយកចិត្តទុកដាក់ ហើយបើឃើញថា អ្នកកំពុងចាប់ផ្ដើមធ្វើរឿងអស្ចារ្យណាមួយហើយ ពួកគេអាចរកវិធីគ្រប់យ៉ាងដើម្បីមកបង្អាក់អ្នក ឬ មកបញ្ឈប់អ្នកជាមិនខាន។
៣) មនុស្សចូលចិត្តអឺអើ
មានមនុស្សមួយចំនួនចូលចិត្តនិយាយឲ្យតែរួចពីមាត់ ដោយគ្មានឡើយការតាំងចិត្តក្នុងការធ្វើកិច្ចការណាមួយឲ្យអស់ពីលទ្ធភាព ហើយរាល់ពេលដែលជួបអ្នកពិភាក្សាការងារណាសំខាន់ៗម្តងៗ គឺមិនដែលឆ្លើយថា«ទេ»ឡើយ។ មើលទៅហាក់ដូចជាខ្នះខ្នែងខ្លាំងណាស់ក្នុងការធ្វើការងារ ប៉ុន្តែនៅពេលធ្វើម្តងៗគឺមិនដែលឃើញមុខឡើយ ហើយបើនិយាយពីហេតុផលវិញ គឺដាក់បីឡានក៏មិនអស់ទេ។ ដូច្នេះហើយ បើជួបមនុស្សប្រភេទនេះ អ្នកកុំសូវយកចិត្តទុកដាក់ ឬ ចំណាយពេលជាមួយច្រើនពេក ព្រោះវានាំឲ្យខាតពេលវេលាអត់ប្រយោជន៍ ជាពិសេសប្រសិនបើអ្នកចង់ធ្វើការធំណាមួយជាមួយពួកគេ។ មិនត្រឹមតែមិនអាចធ្វើបានទេ តែវាថែមទាំងធ្វើឲ្យអ្នកខាតប្រយោជន៍កាន់តែខ្លាំងថែមទៀត។
៤) មនុស្សដែលពូកែបំភ័យ
អ្នកខ្លះគឺចូលចិត្តណាស់រឿងបំភ័យ ថាវានឹងអាក្រក់បែបនេះ ឬ បែបនោះ រាល់ពេលអ្នកលើកជាគំនិត ឬ មតិផ្សេងៗ ។ បើអ្នកជាមនុស្សខ្សោយ នោះប្រាកដណាស់ថា សម្ដីរបស់ពួកគេនឹងធ្វើឲ្យអ្នកភ័យបាក់ស្បាត ហើយលែងហ៊ានបន្តសកម្មភាពអ្វីទៀត ក្នុងដំណើរឆ្ពោះទៅរកការសម្រេចក្ដីសុបិន។
៥) មនុស្សដែលបោះបង់អ្នក
ពេលអ្នកកំពុងតែខ្លាំង ឬ ស្ថិតក្នុងទីខ្ពស់នោះ ប្រាកដណាស់ថា មានមនុស្សជាច្រើនរាប់អាន និង ដឹងសុខទុក្ខខ្លាំងណាស់ ប៉ុន្តែនៅពេលដែលអ្នកជួបបញ្ហាវិញ មានមិនតិចទេដែលដើរចេញពីអ្នក ព្រោះគេគិតថាអ្នកអស់តម្លៃសម្រាប់ការពឹងពាក់ និងជាផលប្រយោជន៍សម្រាប់គេតទៀតហើយ។
ទោះជាយ៉ាងណាក៏ដោយ ការដែលអ្នកជួបមនុស្សទាំង ៥ ប្រភេទនេះមិនមែនជារឿងដែលអ្នកគួរភ័យខ្លាច ឬខូចចិត្ត ឬត្រូវអស់សង្ឃឹមនឹងក្តីស្រមៃរបស់ខ្លួនទេ ព្រោះប្រភេទមនុស្សទាំងអស់នោះហើយដែលនាំអ្នកឲ្យមានភាពរឹងមាំ និងទទួលបានបទពិសោធន៍ច្រើនក្នុងជីវិត ហើយក៏ជាអ្នកដែលធ្វើឲ្យភាពជោកជ័យដែលអ្នកទទួលបានគឺជាភាពជោគជ័យដ៏ពិតប្រាកដ និងមានន័យបំផុត៕
