James Watt បិតាបដិវត្តឧស្សាហកម្ម
បដិវត្តឧស្សាហកម្មដែលបានចាប់កំណើតឡើងដំបូងនៅចក្រភពអង់គ្លេស ក្នុងឆ្នាំ១៧៦០ បានកែប្រែមុខមាត់របស់ពិភពលោកសារជាថ្មី ពីការដែលធ្លាប់ពឹងផ្អែកទាំងស្រុងទៅលើកសិកម្ម ទៅជាដំណើរការណ៍ផលិតដែលចំណាយថាមពលតិច តែប្រកបដោយប្រសិទ្ធភាពលើសពីមុនរបស់រោងចក្រឧស្សាហកម្ម ដែលអាចធ្វើការដ៏អស្ចារ្យបែបនេះទៅបានក៏ដោយសារគំនិតនៃម៉ាស៊ីនដើរដោយចំហាយទឹករបស់លោក James Watt។ តើ James Watt គឺជានរណា ?
មានជីតាជាអ្នកគណិតសាស្ត្រ ឪពុកជាជាងឈើនិងអ្នកសាងសង់នាវាដ៏មានថ្វីដៃប៉ិនប្រសប់មួយរូប រីឯម្ដាយកើតចេញពីគ្រួសារដែលមានខ្សែស្រឡាយជាអភិជន ដែលទទួលបានការអប់រំខ្ពង់ខ្ពស់ James Watt កើតនៅក្នុងឆ្នាំ១៧៣៦ ចាប់កំណើតជាពលរដ្ឋរបស់ស្កុតឡែន ដែលជាប្រទេសមួយដែលស្ថិតនៅក្រោមការគ្រប់គ្រងរបស់ចក្រភពអង់គ្លេស។ តាំងពីនៅជាក្មេងប្រុសរៀនក្នុងវិទ្យាល័យ គណិតវិទ្យា វិទ្យាសាស្ត្រ និងវិស្វកម្មគឺជាមុខវិជ្ជាជំនាញរបស់លោក រួមផ្សំនឹងបានជួយការងារឪពុកជាអ្នកសាងសង់នាវាក្នុងបន្ទប់ធ្វើការទៀតនោះ បាននាំមកនូវចំណេះដឹងជាច្រើនដែលនឹងធ្វើជាមូលដ្ឋានសម្រាប់របកគំហើញម៉ាស៊ីន ដែលជំរុញឲ្យមានបដិវត្តឧស្សាហកម្មខាងមុខ។
ច្បាប់ធម្មជាតិគឺអ្វីៗតែងតែមិនទៀងទាត់ គ្រោះធម្មជាតិជាបន្តបន្ទាប់បានបំផ្លាញនាវាដែលជាកេរ្តិ៍មរតករបស់គ្រួសារ ឪពុកក៏ចាប់ឈឺធ្ងន់ ហើយម្ដាយក៏ស្លាប់នៅពេលលោកមានអាយុទើបបាន១៣ឆ្នាំ។ ចាប់ពីពេលនោះមក លោកក៏បានបម្លាស់ទីទៅទីក្រុងឡុងដុង ដើម្បីស្វែងរកប្រាក់ ដោយប្រើប្រាស់ចំណេះពីជីតានិងឪពុក ក៏ក្លាយជាអ្នកបង្កើតឧបករណ៍ប្រើប្រាស់ក្នុងគណិតវិទ្យា និងសាងសង់នាវា។ ១ឆ្នាំក្រោយ លោកត្រូវបានសាស្ត្រាចារ្យនៅសាកលវិទ្យាល័យ Gasglow ផ្ដល់ការងារឲ្យលោកជាអ្នកជួសជុលឧបករណ៍នៅក្នុងអាគារសិក្សាផ្នែកតារាសាស្ត្រ។ បន្ថែមពីចំណូលនេះ លោកថែមទាំងបង្កើតនិងលក់នូវឧបករណ៍តន្ត្រីដូចជា វីយោឡុង ខ្លុយ និងហ្គីតាបានយ៉ាងមានថ្វីដៃទៀតផង។ អំឡុងរស់នៅក្នុងGasglow លោកបានបង្កើតចំណងមិត្តភាពជាមួយបិតាសេដ្ឋកិច្ចវិទូមូលធននិយម Adam Smith និងគីមីវិទូដែលបានរកឃើញធាតុគីមីម៉ាញេស្យូម Joseph Blackផងដែរ។ ឯការចាប់ផ្ដើមស្គាល់គ្នាជាមួយសាស្ត្រាចារ្យ John Robinson ក្នុងឆ្នាំ១៧៥៨ ដែលលោកបានរៀបរាប់អំពីគំនិតដែលមិនដំណើរការណ៍មួយនៃការបង្កើតរថយន្តដើរដោយចំហាយទឹក បានក្លាយជាចំណុចចាប់ផ្ដើមនៃការសិក្សាពិសោធន៍របស់ James Watt ក្នុងការប្រើប្រាស់គំនិតនេះឲ្យដំណើរការណ៍។
នៅឆ្នាំ១៧៦៣ លោកត្រូវបានសាស្ត្រាចារ្យក្នុងសាកលវិទ្យាល័យស្នើឲ្យជួសជុលម៉ាស៊ីនដើរដោយចំហាយទឹកមួយឈ្មោះថា Newcomen ដែលត្រូវបានប្រើប្រាស់សម្រាប់ខួងយកទឹកចេញពីរ៉ែខនិជ នៅអង់គ្លេសអស់រយៈពេល៥០ឆ្នាំមកហើយ។ វាជាគំរូនៃម៉ាស៊ីនបុរាណមួយដែលមិនសូវមានប្រសិទ្ធភាពនោះទេ ដោយ James Watt សម្គាល់ឃើញថាកម្ដៅទាំងអស់ក្នុងគំរូម៉ាស៊ីនដែលត្រូវបានបង្កើតឡើងដោយវិស្វករពីររូបរបស់អង់គ្លេសនេះ ខាតបង់អស់ជិត៣ភាគទៅលើផ្នែកនៃម៉ាស៊ីនដែលត្រូវធ្វើឲ្យត្រជាក់និងឡើងកម្ដៅបន្តជាវដ្ដដដែលៗដើម្បីឲ្យមានចលនាមេកានិច ជាជាងទៅលើដើម្បីបញ្ជូនកម្លាំងមេកានិច។ ២ឆ្នាំក្រោយមកនៅល្ងាចថ្ងៃអាទិត្យ លោកក៏បានរកឃើញដំណោះស្រាយមួយដែលនឹងជំរុញឲ្យមានបដិវត្តឧស្សាហកម្មនោះគឺ ការបង្កើតធុងដោយឡែកមួយដែលអាចបង្ហាប់ចំហាយទឹកបាន បែបនេះម៉ាស៊ីននឹងដំណើរការណ៍កាន់តែលឿននិងមានប្រសិទ្ធភាពជាងមុន។ គំនិតនេះក៏នាំលោកទៅវិវត្តគំរូម៉ាស៊ីនចាស់ ហើយក៏ទទួលបានប័ណ្ណកម្មសិទ្ធិបញ្ញានៅវ័យ៣៣ឆ្នាំ។
បើទោះជាមានគំនិតដ៏អស្ចារ្យហើយ តែឧបសគ្គហិរញ្ញវត្ថុបានបង្កជាការលំបាកយ៉ាងច្រើនដល់លោក រហូតដល់ពេលលោកចូលវ័យ៤០ឆ្នាំក៏បានស្គាល់អ្នកជំនួញម្នាក់គឺ Matthew Boulton ដែលបានទិញប័ណ្ណកម្មសិទ្ធិបញ្ញាទៅលើម៉ាស៊ីនរបស់លោក។ ការរួមសហការគ្នាដ៏ល្អរវាងរោងចក្ររបស់អ្នកជំនួញរូបនោះនិងប្រាជ្ញាឈ្លាសវៃរបស់James Wattទៅលើវិស្វកម្ម ក៏នាំមកនូវប្រាក់ចំណូលដ៏ច្រើនសម្រាប់ពួកគេទាំងពីរ។ បន្ទាប់មកពួកគេក៏បានបន្តយកមូលដ្ឋាននៃគំនិតដំណើរការណ៍របស់ម៉ាស៊ីននេះ វិវត្តឲ្យមានការបង្កើតម៉ាស៊ីនរ៉ូទ័រ ម៉ាស៊ីនចម្លងក្រដាស ម៉ាស៊ីនកិនម្សៅ ផលិតអំបោះ និងផលិតដែកផងដែរ និងនៅឆ្នាំ១៧៨៤ម៉ាស៊ីនប្រើប្រាស់ក្នុងរថភ្លើង។ បើទោះជា James Watt បានស្លាប់នៅឆ្នាំ១៨១៩ ក្នុងវ័យ៨៣ឆ្នាំ ប៉ុន្តែក្នុងឆ្នាំ១៨៨២ ខ្នាតរង្វាស់រង្វាល់របស់ថាមពលអគ្គិសនីនិងមេកានិច ដែលគិតជាwatt (វ៉ាត់) ត្រូវបានប្រើប្រាស់ជាសកលលោកដើម្បីផ្ដល់កិត្តិយសដល់បិតាបដិវត្តឧស្សាហកម្មរូបនេះដែរ៕
ប្រែសម្រួល៖ ស្រីពៅ
ប្រភព៖ famousscientists & history
