តិកនិកក្នុងការអានសៀវភៅឲ្យបានច្រើន បើទោះបីជារវល់ខ្លាំងប៉ុណ្ណាក៏ដោយ
បុគ្គលល្បីៗ លើលោក ក៏ដូចជាអ្នកជំនួញល្បីៗ ពួកគេសុទ្ធតែរវល់នឹងការងារដូចៗគ្នា ហើយពេលខ្លះសឹងតែរវល់លើសមនុស្សធម្មតា១០០ដងឯណោះ។ តែហេតុអ្វីពួកគេនៅតែមានពេលសម្រាប់អានសៀវភៅ បានច្រើនថែមទៀត? តើពួកគេមានតិចនិកអ្វីខ្លះ? នេះជាអ្វីដែលអ្នកគួរអាន៖
១) ខ្ចីសៀវភៅឲ្យច្រើនលើសពីអ្វីដែលអ្នកអាចអាន៖ បើអ្នកតែងតែខ្ចីសៀវភៅពីបណ្ណាល័យ អ្នកគួរសាកល្បងខ្ចីឲ្យបានច្រើនជាងអ្វីដែលអ្នកអាចអានបាន។ ការមានសៀវភៅច្រើននៅផ្ទះ អ្នកនឹងមានអារម្មណ៍ថាចង់អានសៀវភៅ លើពីផែនការដែលអ្នកបានរៀបចំ។
២) អានសៀវភៅឲ្យបាន២ក្នុង១ថ្ងៃ៖ អ្នកខ្លះចូលចិត្តអានតែសៀវភៅមួយប៉ុណ្ណោះក្នុងមួយថ្ងៃ។ តែតាមពិតទៅ អ្នកក៏អាចអានបាន២សៀវភៅក្នុងមួយថ្ងៃដែរ។ មនុស្សមួយចំនួន មានសៀវភៅមើល២ សម្រាប់មួយថ្ងៃ ដោយពួកគេចែកមួយទុកមើលពេលទំនេរ មួយទៀតទុកមើលពេលយប់។
៣) កំណត់នាទីអាន៖ បើអ្នកមិនបានកំណត់ពេលវេលាអាននោះទេ អ្នកប្រហែលជាមិនខំអានឲ្យឆាប់ចប់នោះឡើយ។ អ្នកប្រហែលជាបែកអារម្មណ៍ទៅអាន ឬទៅមើលទូរស័ព្ទអីផងក៏មិនដឹង។
៤) អានពាក្យគន្លឹះ៖ ពេលខ្លះ អ្នកក៏មិនបាច់ចំណាយពេលអានគ្រប់ពាក្យពេចន៍ ក្នុងសៀវភៅបានដែរ។ ពាក្យគន្លឹះ ក៏អាចឲ្យអ្នកយល់គ្រប់គ្រាន់ថា ឃ្លានោះមានន័យយ៉ាងណាទៅហើយ។
៥) អានមុនចូលគេង៖ អាចថា អ្នកនៅសល់ពេលខ្លះ មុនពេលចូលគេង អ្នកអាចកាន់សៀវភៅយកមកអានបាន ដោយវាអាចសម្រួលអារម្មណ៍អ្នកឲ្យបានល្អ មុនចូលគេង ហើយអ្នកក៏មិនរវល់អីទៀតដែរ ព្រោះអីវាជាម៉ោងគេង៕
ប្រែសម្រួល៖ ព្រំ សុវណ្ណកណ្ណិកា ប្រភព៖ lifehack
