តើអ្នកជាមនុស្សខួរក្បាលខាងឆ្វេង ឬខាងស្ដាំ ?
នេះគឺជាមេរៀនមួយដែលបង្ហាញថា មុននឹងជឿជាក់ថាអ្វីមួយពិត អ្នកត្រូវជជីករកឫសគល់និងសិក្សាអំពីវាឲ្យបានជាក់ច្បាស់ជាមុនសិន។ តើអ្នកធ្លាប់អានសៀវភៅជំរុញទឹកចិត្តមួយចំនួន ដែលរៀបរាប់ថាបើអ្នកជាមនុស្សច្នៃប្រឌិត នោះអ្នកនឹងមានខួរក្បាលដែលអឌ្ឍគោលខាងស្ដាំមានឥទ្ធិពលជាងអឌ្ឍគោលខាងឆ្វេង តែបើអ្នកជាមនុស្សគិតវិភាគ នោះអឌ្ឍគោលខាងឆ្វេងរបស់អ្នកមានឥទ្ធិពលជាងអឌ្ឍគោលខាងស្ដាំ ឬជាតេស្តកំណត់រកអត្តចរិតណាដែលមានទម្រង់ស្រដៀងៗគ្នានេះទេ ? យ៉ាងណាមិញ គ្មានការស្រាវជ្រាវវិទ្យាសាស្ត្រណាមួយបានបញ្ជាក់ភស្តុតាងថាអឌ្ឍគោលនៃខួរក្បាលណាមួយមានឥទ្ធិពលទៅលើមួយទៀតនោះឡើយ។
តើមានបញ្ហាអ្វីកើតឡើង នៅពេលអ្នកជឿថាខួរក្បាលរបស់អ្នកមានអឌ្ឍគោលម្ខាងមានឥទ្ធិពលជាងម្ខាងទៀត ? តាំងពីដើមមក ជំនឿខុសឆ្គងមួយនេះតែងតែត្រូវបានមនុស្សទូទៅជឿថា បើអ្នកជាមនុស្សពូកែគូររូប លេងដូរ្យតន្ត្រី ឬសកម្មភាពទាំងឡាយណាដែលទាមទារនូវភាពច្នៃប្រឌិត នោះមានន័យថាធម្មជាតិនៃខួរក្បាលរបស់អ្នក គឺមានអឌ្ឍគោលខាងស្ដាំមានឥទ្ធិពលគ្របដណ្ដប់ទៅលើអឌ្ឍគោលខាងឆ្វេង។ ដូចនេះអ្នកមិនអាចអភិវឌ្ឍសមត្ថភាពរបស់ខ្លួនទៅរកជំនាញទាំងឡាយណា ដែលទាមទារការគិតបែបតក្ក មានហេតុមានផល និងវិភាគដូចមនុស្សដែលខួរក្បាលរបស់ពួកគេមានអឌ្ឍគោលខាងឆ្វេងមានឥទ្ធិពលជាងខាងស្ដាំនោះឡើយ។
ផ្នត់គំនិតដ៏ខុសឆ្គងនិងមានលក្ខណៈអន់ថយនេះ នឹងក្លាយជាឫសគល់នៃការគិតរបស់អ្នកជារៀងរហូត ដែលធ្វើឲ្យអ្នកយល់ថាអ្នកមិនអាចពូកែគណិតវិទ្យានោះទេ បើអ្នកពូកែលេងដូរ្យតន្ត្រីនោះ។ គេតែងនិយាយថា អឌ្ឍគោលខាងឆ្វេងគ្រប់គ្រងទៅលើការគិតហេតុផល រីឯអឌ្ឍគោលខាងស្ដាំគ្រប់គ្រងទៅលើអារម្មណ៍ឬការច្នៃប្រឌិត។ វាមិនត្រឹមត្រូវនោះទេ តាមពិតទៅ មិនថាជាកិច្ចការដែលទាមទារការគិតច្នៃប្រឌិតឬការគិតបែបតក្កនោះទេ គ្រប់តំបន់ទាំងអស់នៅក្នុងខួរក្បាលរបស់អ្នកគឺធ្វើការរបស់វាយ៉ាងសស្រាក់សស្រាំទាំងអស់ ដើម្បីដំណើរការណ៍ការងារទាំងនោះបាន។
ណឺរ៉ូនគឺជាផ្លូវធ្វើដំណើររបស់ទិន្នន័យដែលបញ្ជូនមកកាន់ខួរក្បាល។ ដូចនេះ បើសិនជាអ្នកមានអឌ្ឍគោលខាងឆ្វេងមានឥទ្ធិពលគ្របដណ្ដប់លើខាងស្ដាំ នោះក៏មានន័យថាណឺរ៉ូននៅក្នុងផ្នែកខាងឆ្វេងក៏មានចំនួនច្រើនជាងផ្នែកខាងស្ដាំដែរ។ យ៉ាងណាមិញ ការសិក្សាមួយក្រុមរបស់ University of Utah ដែលបានសិក្សាទៅលើខួរក្បាលរបស់មនុស្សជាង១០០០នាក់ មិនរកឃើញភស្តុតាងណាមួយឡើយ ដែលបញ្ជាក់ថាណឺរ៉ូននៅក្នុងផ្នែកមួយមានចំនួនច្រើនជាងផ្នែកមួយទៀត។ ជាលទ្ធផលមធ្យម ណឺរ៉ូននៅក្នុងអឌ្ឍគោលទាំងសងខាងរបស់ខួរក្បាលមានចំនួនស្មើគ្នា។
ដូចនេះ វាគ្មាននោះឡើយ ជំនឿដែលអះអាងថាអ្នកមានផ្នែកនៃខួរក្បាលម្ខាងមានឥទ្ធិពលជាងផ្នែកម្ខាងទៀតនោះ។ ខួរក្បាលមនុស្សមានភាពបត់បែន មិនមែនធម្មជាតិមកបែបណាក៏បែបនោះមិនអាចផ្លាស់ប្ដូរបាននោះទេ។ នេះមានន័យថា នៅពេលអ្នករៀនសូត្រជំនាញថ្មីៗ វានឹងផ្លាស់ប្ដូរទម្រង់របស់វាទៅតាមនោះដែរ។ សក្ដានុពលរបស់អ្នកមានច្រើនហួសពីអ្វីដែលអ្នកធ្លាប់គិតស្រមៃដល់ ដូច្នេះចូរគិតវិជ្ជមាន ជឿជាក់លើខ្លួនឯង និងប្រើប្រាស់ធនធានធម្មជាតិដែលពោរពេញដោយសក្ដានុពលឥតមានដែនកំណត់មួយនេះឲ្យអស់ពីលទ្ធភាពរបស់អ្នក៕
ដោយ៖ ស្រីពៅ
