ស្ថាបនិក Facebook លោក Zuckerberg ភរិយារបស់លោកដើមកំណើតជនជាតិចិន ដឹងថា ហេតុអ្វីលោកជាប់ចិត្តនឹងនាងទេ?
ជាទំនៀបទម្លាប់ និងរបៀបរបបនៃការរស់នៅទៅហើយសម្រាប់សហរដ្ឋអាមេរិក ឬបណ្ដាប្រទេសអឺរ៉ុបដែលមានការរស់នៅជាមួយគ្នាមុនពេលរៀបអាពាហ៍ពិពាហ៍។ ទោះជាយ៉ាងណា រឿងរ៉ាងស្នេហាមានប្រវត្តិផ្សេងៗគ្នា។ ចុះហេតុអ្វីបានជាសេដ្ឋី និងជាស្ថាបនិក Facebook លោក Zuckerberg ជាប់ចិត្តប្រតិព័ទ្ធនឹងភរិយាមានដើមកំណើតជនជាតិចិនទៅវិញ?
នៅអំឡុងខែឧសភា ឆ្នាំ២០១២ គេបានប្រទះឃើញរូបថតមួយសន្លឹករបស់ Priscilla Chan ដែលជាភរិយាបច្ចុប្បន្នរបស់ស្ថាបនិក Facebook ដែលនាងបានបង្ហោះលើ facebook របស់នាងក្នុងឈុតអាពាហ៍ពិពាហ៍ជាមួយ Zuckerberg ហើយនាងថែមទាំងបាន update នៅលើ facebook របស់នាងថា នាងបានរៀបអាពាហ៍ពិពាហ៍ជាមួយ Mark Zuckerberg ហើយ។ តាមពិតទៅអ្នកទាំងពីរបានចាប់ចិត្តលើគ្នា តាំងតែពីពេលដែលអ្នកទាំងពីររៀននៅសាកលវិទ្យាល័យ Harvard។ បន្ទាប់ពីបញ្ចប់ការសិក្សាថ្នាក់វិទ្យាល័យនៅសាលា Quincy នៅឆ្នាំ២០០៣ Priscilla Chan បានបន្តការសិក្សាជីវវិទ្យានៅសាកលវិទ្យាល័យ Harvard ជាទីដែលនាងបានជួប Mark Zuckerberg។
អ្នកទាំងពីរបានឃើញគ្នាជាលើកដំបូង ក្នុងកម្មវិធីជប់លៀងមួយនៅសាកលវិទ្យាល័យ Harvard នៅឆ្នាំ២០០៣ ក្នុងពេលដែលពួកគេឈររង់ចាំចូលបន្ទប់ទឹក។សារព័ត៌មានមួយ បានទម្លាយព័ត៌មានថា នៅពេល Zuckerberg ដើរលេងជាមួយ Chan ជាលើកដំបូង លោកបានប្រាប់នាងថា លោកសុខចិត្តមកណាត់ជួបជាមួយនាង ដោយទុកការប្រឡងពាក់កណ្ដាលឆមាសធ្វើនៅផ្ទះ (Take-home midterm) ចោល។ នៅឆ្នាំ២០០៧ Chan បានបញ្ចប់ការសិក្សាពីសាកលវិទ្យាល័យ Harvard។ លោកZuckerberg ក៏ទៅចូលរួមអបអរនាងដែរ។
ក្រោយមក នាងបានបន្តការសិក្សានៅសាលា UCSF ហើយបានជួលផ្ទះមួយនៅក្បែរឧទ្យាន Golden Gate ស្នាក់នៅ។ Zuckerberg តែងតែទៅលេងញឹកញាប់នៅចុងសប្ដាហ៍។ដោយសារតែស្ថាបនិកវ័យក្មេងរបស់បណ្ដាញសង្គមយក្សមួយនេះរវល់វក់វីនឹង Facebook ខ្លាំងពេក Priscilla Chan បានដាក់កំហិតដល់លោក Zuckerber យ៉ាងហោចណាស់មួយសប្ដាហ៍មានពេលជួបគ្នាយ៉ាងតិចបំផុត ១០០នាទីដែរ។
នេះបើយោងតាមសេចក្តីរាយការណ៍របស់សារព័ត៌មាន TheTechCrunch។ អ្នកទាំងពីរបានរស់នៅជាមួយគ្នានៅខែកញ្ញា ឆ្នាំ២០១០ ហើយនៅខែឧសភា ឆ្នាំ២០១១ អ្នកទាំងពីរបាន post នៅលើ facebook ពីទំនាក់ទំនងជាផ្លូវការរបស់ពួកគេ។មួយឆ្នាំក្រោយមក គឺនៅខែឧសភា ឆ្នាំ២០១២ ពួកគេបានរៀបការជាផ្លូវការ។ ស្ថាបនិកក្រុមហ៊ុន Facebook រូបនេះក៏បានរៀនភាសាចិន ដោយមានភរិយារបស់លោកជួយបង្រៀន។ លោក Zuckerberg ធ្លាប់ឡើងនិយាយជាភាសាចិនក្នុងកម្មវិធីសំណួរចម្លើយ ធ្វើនៅសាកលវិទ្យាល័យមួយចំនួននៅប្រទេសចិនកាលពីកន្លងទៅថែមទៀតផង៕
